Aisaya 43:5-11

⁵Namba nakama role karoŋo dokona paka nao karalapape. Nambame neta pyakaenge dorena pisowape dee neta yalyingi dorena pisowape nakamana wambu dupwa range nyuo anda lanyoko eparo.

⁶Dopa pyuo karaminyi dokopa yuu dulurena wambu dupwa lamaiyuo dokopa nambana wambu dupwa kakaso pena kaeyakana laro. Dee donorena wambu dupwa lamaiyuo dokopa penaleŋe minya sili sili laa nana lao piru. Dokopa kamame panda lao saka nange yuu muu wakale wakale dupwana naneta kararaminyi dupwape dee yuu muu peparae kipwa kipwa dupwana kararaminyi dupwape andako kili kali pyuo epena.

⁷Nakama namba rangena wambu. Nakamame nambana kingi andakinyi nembo yulu pirami lao nambame nakama wasiyu.

⁸Anatumi lao, Nambana wambu dupwa kote lala epena lao lamailapape. Nakama lenge rao karaminyipape lenge koo ingilyaminyi. Dee nakama kale kata siminyipape kalepoenge ingilyaminyi.

⁹Yuu muu peparaena rara dupwa api mende porailyamo doko makande pyuo kandala epena lare. Dopa pirinyi dokopa nakamana mee bange anatu dupwana api mendeme rengya piramo dupwana larase? Dee nakama dupwa anjuku mendeme dakepa pyaka silyamo dupwa dopa piraŋa lao leyase? Mee bange anatu dapwame nakama kinyi angi rolae leyamiŋi lao lakarami usinisi dupwa lanyuo epena.

¹⁰Isaraele wambu dupwa nakama nambana usinisi lakarami. Namba nakamame soo nyuo suu pyao dee namba Anatu mendaki iki lao serami lao nambame nakama nambana kendemande wambu ingyuo rombo palyiyu. Namba iki Anatu karo. Anatu wakale mende kara nalyamo. Dokonako ingyuo wamba mende kara nange. Dee rengyape mende kara narako.

¹¹Nakama lete wai pyao nyeramo Kamongo doko nambako iki karenge.