Aisaia 43:5-11

⁵Ena dage dali bidibao, dage wi me igio. Dage hani dabe te giliga pedalubo badu, me giliga dega sabo badu bidibo, te augwali eno ma odasa asaibao.

⁶Eno te bidi dabe te not badu, me saut badu bidibo bidi dabebolo olama, te dage ma asomainu ilao waibao. Te eno we bidi dabe te digibulu mu, te tǫ sesege badu bidali me, te augwali eno ma odasa asaibao.

⁷Dage te eno nogi elalubo hani mu da, te ena digi eno dage nigali, te gasa hani dabego dage sulama, te enaba genuai nogi momainu ebo dao,” wali.

⁸Godigo te po wai, “Te eno we bidi dabe i olama, sisinagasomainao. Te mu tama, augwaligo te nai subo gedu elalu, te po odobo olo elalubao. Tiali goli augwali gedu widai me olo degai tiwai bidibao.

⁹Te gasa bulu tǫ kantri we bidi dabe te po tų yabo pesageba sisingasalio. Te augwaligo mena godigo te mena sę nosali pedelaibao wabo po hania pusaliwe? Te augwaligo mena godigo polobadu po weyu, te pedelaibao wali nai megi pedalubowe? Te augwaligo ebo sę suali mena bidi hani dolugulama, te tiwai po weyu, agai te god me deligo te nai me pedelaibao po wali, tama nosali agai suali, te wali sę mu pedalubo dawe?”

¹⁰“Tialima, dage Israel, dage te eno po odolama, pusubo bage dao. Eno dage sa muyu, dąį ilama, te ena sę bidi bidimainu yalio. Tama tiyu da, te dagego ena koneama, enaba homu dąų weyu, tama te tiwai dagego bugagia koneyu, te ena deli naga te God mu da omainu ebao. Polobadu te god me deli me pedalisiąma, te aga polasa bidiyu, te ena nosali badu me elalubeo. Tama nosali me, te god me deligo ena bidali pesage me hasegelegobeo.

¹¹Ena naga ena Genuai Bidi dao, tama sesemane sogo eno dage ma sabo dao. Te gasa god dage dali me bidiyu, te dage tau me sabeo. Menio.