Text copied!
CopyCompare
Is Lalag te Megbevayà - Erubasa

Erubasa 3

Help us?
Click on verse(s) to share them!
1Mama, kenè nu lipati is menge penurù ku kenikew; tipiǥi nu ziyà te gehinawa nu is menge suǥù ku,
2su pinaaǥi kayi edluǥeyazan ka te untung wey ebmeuswaǥen ka.
3Kenè nu ewaa ziyà te kenikew is kebpekid-uunungen wey is kegkemetinumanen; ke và dà belieg ne ipurung nu ivevelieg, ne ke và dà litra ne isurat nu ziyà te ǥehinawa nu.
4Emun ed-ul-ulahan nu heini, egkezeliǥan ka ne ebpekepenunuat ka te Megbevayà wey menge etew, ne meupiya is kedtengtengi zan kenikew.
5Purung ka sarig te Nengazen ne kenè nu iyan seriǥi is kenikew he keugelingen he ketau.
6Minsan hengkey is ed-ul-ulahan nu ne isipa nu is Nengazen, ne iyan sikandin metau wey nu iyan meikul is metandang he zalan.
7Kenè nu isipa he utew ke en uluwanen, kekenà, tehuza nu is Nengazen, ne kenè nu ul-ulaha is mezaat.
8Iring heini te tambar he ibmeupiya te lawa nu.
9Beǥayi nu te zengeg is Nengazen pinaaǥi te kedhelaza nu te ketiǥeyunan nu wey te egkehuna he veǥas te langun he menge pinemula nu.
10Ne emun ed-ul-ulahan nu heini, ne egkepeuluwan is budiga nu, ne edrepey te inumen is menge teleǥuey nu.
11Mama, kenè nu isipa he mezaat is kebmansu te Nengazen wey kenè nu ikeepes is kedawey zin.
12Su ebmensuwen te Nengazen is menge mibpelanggè din iring te ebeelan te sevaha he amey ziyà te anak din he pelanggè din.
13Utew zeyzey is etew he zuen din ketau wey kedsavut.
14Su zekelè pa is pulus kayi kenà is selapì wey vulawan,
15ne mahal pa heini kenà is menge elahas, ne wazà minsan hengkey he egkesuatan nu he ebpekerepeng kayi.
16Is ketau ne ebpekepeluǥayad te untung nu wey ebpekeveǥey zaan te ketiǥeyunan nu wey zengeg.
17Ebpekeuǥup heini te kebpengungubpaan nu wey te meupiya he kebpekesavuk nu.
18Utew zeyzey is etew he edtulung ebpepenurù su wey mebmetau; is ketau ebpekelipey kandin wey ebpekepeluǥayad te untung din.

19Pinaaǥi te ketau wey keuluwanen, midlimbag te Nengazen is tanà wey langit, ne nemenlepew is menge serebseb ne nehimu is uzan pinaaǥi te ǥapun.
21Mama, tipiǥi nu is ketau wey keuluwanen nu. Ne kenè nu heini mehimuwa he maawà diyà te kenikew,
22su ebpekeveǥey heini kenikew te meluǥayad wey mekempet he ked-ubpà.
23Ebpengungubpaan ka he wazà ebpekekaid kenikew ne kenè ka egkemenu.
24Emun edhizeǥè ka ne kenè ka egkahandek wey meupiya zaan is kedlipezeng nu.
25Umbe, kenè ka ereg he egkehandek emun egketik-ew egkehitavù is mekahandekhandek he hitavù, etawa edezeetan is menge lalung,
26su ebpekesarig ka he iyan ebantey kenikew is Nengazen, wey ka kenà mekeizi.
27Tevangi nu is kinahanglan he edtevangan sumalà is egkehimu nu.
28Ne emun duen ebpekitavang ne kenè nu en kèkeeselema pa is kedtevangi nu kandin emun duen en igketavang nu kandin.
29Kenè ka mebpelanu te ebpekezezaat te sengeeetew he uvayè nu he midsarig kenikew.
30Kenè nu tebeka is sengeeetew emun wazà mezaat he neveelan din diyà te kenikew.
31Kenè ka mesina te etew he mesipala ne kenè nu zaan iringi is menge ulaula zin.
32Su egkeepesan te Nengazen is etew he mesinupaken, iyan, ebpekid-emiǥu mulà sikandin te etew he metazeng.
33Edrewakan te Nengazen is pemilya te etew he mezaat is menge vaal zin, iyan, edtuvazan din mulà is pemilya te etew he metazeng.
34Edsudien din is menge mesudì, ne edtuvazan din is kenà mepelevawen.
35Is menge uluwanen, ne egkezeliǥan, piru is menge tulebung ne egkepeel-elezan.