Muqâqiŋ Dâŋ 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Motec‐mae, no dâŋ gaza qazuc eekopac irec moc mi nikecguzejec, â wiac ebac ecmurâ mutâcne‐gareekopac i manasuhuc juzemec.

²Dâŋ wiac qazu‐gareekopac i bajucmuo ine dameŋ ʒora juhâc qâhâmocmu.

³Go âgo miriŋ â siocmâc juju i moc mi râpeckezemec, ehame izi hâcne upegere qoqonaŋ â maŋgere fosiŋ erâ fozejec.

⁴Go iŋuc ecmuo ine Anutu mecne â ŋic jaŋe mecne mâmâc mana‐garepie biaŋkeocmu.

⁵Go gahacne mamanao mi roweckehuc Wofuŋte dapeŋko soŋkerâ juzemec.

⁶Erâ wiac sasawa ebac ehuc Wofuŋte manasuzemec, eme eki juju hata fâretiŋ jaha gaza gowatuc eocmu.

⁷Go mamanagere manatec fefene boc mi ezejec, ehuc wiac hehesicne râpeckehuc Wofuŋ mocjaha araŋ bacnezemec.

⁸Go iŋuc ecmuo ine izi hâcne nârâ bibiaŋ irec sâc egareha wicge somieocmu â ʒâicge wâc mâteŋkeocmu.

⁹Giegaŋgao nânâ monʒaŋ wiac fuaekac sâc irecnec biaŋne gâcne rorâ bâzi rikehuc Wofuŋ muac baafec ecnezemec.

¹⁰Go iŋuc ecmuo ine nânâficgezi fufusuc jaha foocmu, â waiŋ giegao mazuc mâriri fuame ficge hefusetec tiwâne foocmu.

¹¹Motec‐mae, Wofuŋzi bâtiŋgume manatec wawahane mi ezejec.

¹²Wofuŋ e ŋic moc jauŋkezo murâ ba bâtiŋ ecneekac; e mamac moczi ŋokâ‐ticne qa bâtiŋ ecneekac irec sâc eekac hâcne.

¹³Ŋic moc maŋɋârâŋ â mamana tarahec juekac ere manape ʒerine ekac.

¹⁴Wiac izi hâcne siliwa â gol jahere sâc sirickehuc wiac furi sâko jâmbâŋ ekac.

¹⁵Maŋɋârâŋzi qânâ furi sâko irec sâc wâc jâurukac, â wiac i me i bajuzo muekic izi irec wahamicne.

¹⁶Maŋɋârâŋzi juju dameŋge bâʒoraocmu, ehuc moneŋ mafa â ʒâŋe biŋe wâc bâfua‐gareocmu.

¹⁷Maŋɋârâŋhec juocmuzi bubiaŋ â wama faio juocmu.

¹⁸Maŋɋârâŋhec juniŋmu jaŋe juhâc qâhâmoniŋmu, ehame izi hâcne juju fârine bâfua‐jareocmu.

¹⁹Wofuŋ e maŋɋârâŋhec jukacte mâreŋte hobeteŋ râewec, â mamana tara focnekacte qânikiŋ qaratiewec fokac.

²⁰E maŋɋârâŋheczi mume opâ jaŋe fisieŋgopieŋ, â karoraczi opâ hoŋkeme mâreŋko hoe wahaekac.

²¹Motec‐mae, go maŋɋârâŋ â mamana tarage soŋaŋkehuc juhaŋtec moc mi sifucke‐garezejec.

²²Wiac izi hâcne juju biaŋ â jujuhâmo bâfua‐gareocmu.

²³Go iŋuc ecmuo ine hatagao sâcne racmu â kikege wâc mi fâfâcguocmu.

²⁴Go wiac irec me irec mi hâwicguha waha guŋ biaŋne fohaŋtec hae fureocmu.

²⁵Ŋic sindaŋne jaŋere wiac hâhâwicnezi mâŋâŋ ɋicwânʒâŋnehec iŋucne fisiekac, irec sâc jaha ututuŋ fisi‐garezacte mana mezac mi ecmu.

²⁶Wofuŋzi hone soŋaŋ egareha sâcne jucmu, eki hâcne wiwiticko fezicte kikege sapeckeocmu.

²⁷Go tâpiri fogarekac sâc ŋic qarâ suriŋne jaŋe ehâmo‐jarezemec.

²⁸Go miŋecgac jaha ŋic âgoge bafickezo manasukicko tomâckore biŋe mi râetec fozejec.

²⁹Me ŋic âgoge moc gorao roweckehuc maŋfuŋgao juekac e râsi ecnehuc wiac sâqocne moc mi ecnezemec.

³⁰Ŋic moczi wiac hehesicne i me i mi egareha fuŋne tâmiricko ehec dâŋ mu qaqatarac mi ezepirec.

³¹Ŋic ʒâʒâicne tâpiri‐jeŋicte iiŋguuŋ mi ejarezemec, ehuc jaŋe wiac eeŋgopieŋ irec sâc jaha mi ezemec.

³²Wofuŋzi ŋic hehesicne jaŋe hâcne qaisoc‐jopaekac â ŋic tiŋne jaŋe ine âgo ejareekac.

³³E ŋic sindaŋne jaŋere fic hae sâweckeekac â ŋic tiŋne jaŋere ine jambuŋkeekac.

³⁴Ehuc ŋic mu âke sisicne jaŋe gâwie‐jareekac â maŋhuhuŋ jueŋgopieŋ jaŋe ine mana biaŋ‐jopaekac.

³⁵Ŋic maŋɋârâŋhec jaŋe ʒâŋe biŋe sâkohec eniŋmu â ŋic mutuc matacne jaŋe ine mimi busâqoczi fai‐jeŋicko feocmu.