Text copied!
CopyCompare
I tnalù dwata - Dad Fngewe

Dad Fngewe 3

Help us?
Click on verse(s) to share them!
1Tingàgu, nangam nlifet i tdògu ge, bay toom busek di nawam i dad fngewegu ge.
2Du i tdògu ge, én flawil ge, na mlé di ge kafye kneam.
3Nangam kah kakdom Dwata na kagsaligan ge, na toom fkah ani di fandamam, na di nawam du fye laam glifet.
4Ku ani nimoam, toom gaflehew Dwata, na nun dengegam di dad to.
5Too ge smalig di Dwata mdà di nawam, na nang ge smalig di ge kaglabat.
6Kabay di kdee nimoam funam Dwata, na fiten di ge i glut dalan.
7Nangam fandam ku too ge fulung, bay toom kanlikò Dwata, na knangam i kdee sasè.
8Na ku ani nimoam, mbaling fye laweham, na matnù i kgalam.
9Toom nafè Dwata fagu di kablém kenen i too fye di kdee mdà di ulê tanaam.
10Na ku ani nimoam, too fnò i folam na landè gusfayu i dademe, na i gufkaham ninumam gal sambél.
11Tingàgu, nangam knang i kaflayam mdà di Dwata, na nangam tatì fbayà i kngakan ge,
12du Dwata, nngakan di gusasè i to kandon, gambet i kngak i satu mà di tingaan toon kando.
13Nun kafye di to ku nun kfulungan na kaglabatan,
14du mdatah fa i gweam di kfulung i gweam di salafì, na mabtas fa di ge di blawen.
15Na i kfulung faldam, mabtas fa di kabtas i dad too fye kas, na landè dademe knayeam gufsalngadam dun du too mdatah.
16Mdà di kfulung gdawatam klawil, knun, na kafè.
17Na i dalanan dunan klehew, na i ktanak knè.
18I to mbaling fulung nun gufyen, na mlawil kenen.

19Mgimò Dwata klamang tanà mdà di kfulungan, na mdà di bong gnadean tafkahan langit ditù di tah.
20Mdà di kfulungan tafalohan yéél, na mdà di kfulungan, ftatekan i alù mdà di dad labun.
21Tingàgu, toom fkah i kfulung faldam na i kfulung mebe ktom difandamam, du fye laam glifet dun,
22du ku nun kfulungam faldam fye kagkah i nawam, na nun klehew i kneam.
23Na di kagum di dalan, landè sasè gaslokam, na là ge tlaab.
24Di kileam, too fye kakudangam, na landè gamlikò ge.
25Na landè klikoam i dad kaflayam makto i kakelan, ku demen i kalmo kel kadang di dad to sasè,
26du Dwata i gusmaligam, na laan ge faloh ku mfawel i fawel.
27Ku nun kiboam, galam tnabeng i demem to nun klidù.
28Na nangam man di demem to, “E fayah ktabengta ge”, ku nun kiboam tmabeng dun di duh ani.
29Nang ge faldam mimò sasè di to demem saldan, du ge i gusmaligan.
30Nang ge dmalam i demem to, lumban i to landè sasè nimoan di ge.
31Nang mibal i knun i to labè, na nang ge mlalò i kenen nimò,
32du Dwata too mnang nawan i dad to mimò sasè, bay fgadean i fandaman di dad to matlu.
33Too mnè i kalbut Dwata di malay i dad to sasè, bay too mnè i kafye di malay i dad to matlu.
34I dad to madoy, knang Dwata, bay blén i kafye di dad to fdanà i ktola.
35I dad to fulung faldam too mgafè, bay i dad to là fulung faldam tatì matnù i kyàla.