Bugagia Bidibo Kolesagade Po Asęai Buku 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Waio, eno nage ola mawainu ebao, tama nago homude te po munu me tagaligio. Menio. Te sesemane sogo nago bugagia homu kone palao.

²Nago te po wali peyu da, te nage bobobage sogo sesabi elama tǫde bididu, tama nage bugagia mu dualalu bidaibao.

³Nago te gasa bidi godolo ebo kolesaga, me te gasa bidi dali te mu kisa sabo kolesaga ebo me te munu me tagaligio. Nago te kolesaga si wali pelama, tama te nago dogonide au ilibo nai tiwai pedelaibao. Tama nago naga homuba bugagia dąų olama muao.

⁴Te nago tama tibaso da, te Godigo nage godolo ebadi, te bidi dabego me nage godolo homu yaibao, tama nago sę te wiegi yai pedelaibao.

⁵Nago konealubo po Genuai Bidiba bomonama dąų wao. Nago te homu eyu, te naga digi koneani kolesagago te naga tau sabo usu yaibao homu munu me elamu dao.

⁶Te tigidali sę nago ebo, nago bomai homu Genuai Bidiba elama, tama nago te sę yao, tama agai nagebolo te wali pabo doloba pai sunumi ola mawaibao.

⁷Te nago homugo tiyu, te nago koneani kolesaga te mu nai da homu elamuo. Menio. Nage te Genuai Bidi wi eyu, aga dologoba pelama, tama dwai kolesagaba tudi ola mao.

⁸Nago tama tiyu da, teda nage tego mu tau siyu, te marasingo nage tigi tau sabo tiwai yaibao, tama nage bugagia bidimainu ilaibao, te dili dǫgai hauwa elalubo hasa tiwai bidaibao.

⁹Nago te naga gide te polasa ina yani nai te selama, tama te ofa tiwai ilama, te Genuai Bidiba mao, te tama tebogo te agaba genuai nogi mawaibao.

¹⁰Te nago tama tiyu da, te Genuai Bidigo nago gide te nai hauwa umabo walama elalumainu ilaibao. Tama naga nai mubo be te naigo mu pągąnama, tama nago te wain ąį tabiali te moni tank pągąyu, tama te wain ąį meba te olo buluba gelaibao.

¹¹Waio, te Genuai Bidigo nage dodolainu ebo sogo, nago wado po olama, te haliga dwai me igio. Agai nagede po elaluyu da, nago aga dali sębę igio.

¹²Magi baso meni, Genuai Bidigo te agai godolo homu ebo bidi dabe dodolaibao, te aya dabego te aga godolo homu ebo wai dabe dodolobo tiwai gilama ebo dao.

¹³Te wiegi yai homu kolesaga koneama sabo bidi, aga te wiegi yai homu pemene mu yaibao.

¹⁴Magi baso meni, te wiegi yai doloba pai homu kolesaga ebogo te silva, me gol,

¹⁵me te wiegi yai masigi dabe te aiyaba mu elaluaibao. Tama nago te godolo homu ebo tigidali nai me te aiyaba elalubo dao.

¹⁶Te wiegi yai homu ebo kolesagago te nage tau selama, tama nage te tǫde bobobage sogo sesabi elama bidaibao. Tama agai nageba genuai nogi mayu, tama nageba doado bage hauwa mawaibao.

¹⁷Te wiegi yai homu kolesagago te nage sesemane sogo te nage bugagia wiegi yai haliga ilama, tama homu tegaluama, nage bidibo te wiegi yai mu pedelaibao.

¹⁸Wiegi yai homu ebo kolesaga te bidibo ula mabo ni tiwai yaibao. Tama te wiegi yai homu ebo kolesaga te dali kęą pabo bidi dabe, augwa te bidabo ula wiegi yai mu elalubaso, tama augwa wiegi yai homu pemene yaibao.

¹⁹Te Genuai Bidigo digi te wiegi yai homu kolesaga elama koneyu, tama agai te tǫ de dagalu si nigilama,

²⁰tama agai te tǫba wę pedalumainu iliyu, te agai te dagalude elalubo pǫ dabe sisinimainu ilama, tama te tulubage tulubo dao.

²¹Wai, nago te bugagia tonalu, te nago naga wiegi yai homu kolesaga, me koneani kolesaga te bugagia dąų olama, tolaluao. Tiyu, nago tagalabuo.

²²Te wiegi yai homu ebogo, me te koneani homu kolesaga dali, tego nage ula mayu, tama nago wiegi yai au elalubo tiwai gilama yaibao.

²³Tama nage te sunumidu bugagia biliyu, tama te magi nai me deligo te nago sągąde me selegobeo.

²⁴Tama te pibo sogo te nage wi me isiąma, tama nage bugagia mu piaibao. Awe, nage pila muyu, tama bugagia bidaibao.

²⁵Nago konealubo po te Genuai Bidiba bomonama dąų wali da, tama te agai nage bobogela selama, te nago tonalu, tama te boi bidi dabego augwa wade te nage me kęą sogobeo. Tama te dwai sę ebo sogo te dwai bidi dabeba pedelama, te augwali dolobaso da, nage wi me elamuo. Te tobage dwai sę pedalubo sogo te augwaliba polo tama pedalu, te genuai wali me tulubage asobo tiwai ebo dao.

²⁷Te bidi me deli aga te doado bage sǫą pobaso, tama agai nagebolo mao olama, hanalu obaso da, nago te po me sela sągio, nago agabolo te po “Menio,” wagio. Te nage usu elalubaso da, nago aga mao.

²⁸Te abagi agai nageba hanalubo sogo, te nago aga tau sabo homu usu ebaso da, teda nago agabolo te tiwai po weyu, “Tonalu bolo yao. Te do nage ma aselama, te nage eno mawaiba,” te po wagio.

²⁹Te naga abagi dabe te nage pąde bidalu, tama augwaligo homugo te nage augwa abagi da homu yaibao. Tama tibaso, nago augwali dwai me ilamuo.

³⁰Te nage dali dwai sę me isiąbo bidi dali te nago odolali po konila me wagio.

³¹Te hwįbo bidi dabego kolesaga wali painu te nago haliga me hodalugio, tama nage te augwaligo sunumidu me bilamu dao.

³²Magi baso meni, Genuai Bidigo digi te tobage bidi wei me isąwai. Te doloba pai kolesaga ebo bidi dali agai abagi homu ebo dao.

³³Genuai Bidigo te po wali, te dwai sę ebo bidi dabe te augwa we wai puluba dabe dali dolaibao, wai. Tiali goli, Genuai Bidigo te doloba pai bidi te aga we wai hani dabe dali te bugagia bidimainu elama, tama agai augwali tonalubo dao.

³⁴Te bidi dabego te posobo po gasa bidiba obaso da, teda Godigo te tobage tiwai kolesaga te augwaliba wei ponaibao. Tiali goli, agai te augwa digi augwa aiyaba elalubo bidi dabeba te wiegi yai sę bugagia ebo dao.

³⁵Te we bidi dabego te wiegi yai homu elalubo bidi dabeba te genuai nogi mawaibao. Tiali goli, te wiegi yai homu kolesaga meni yai bidi dabego te augwa digi augwa nogi doloyu, moni hale yaibao.