Erubasa 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Iyan heini sikan is menge erubasa ni Solomon he anak ni David te hadì diyà te Israel.

²Heini he menge erubasa, ebpekeveǥey te ketau wey ebpekemansu kenikew, ne egkesavut nu is mezalem he menge lalag he ebpekeveǥey te ketau.

³Ebpekemansu heini kenikew para mehimu ka he uluwanen, he ebpengungubpaan te hustu, metazeng, wey mezait he menge ulaula.

⁴Ebpkeveǥey heini te ketau te wazè din ketau, wey ebpekeveǥey heini te keuluwanen te menge vetan-en te ked-isip-isip ke hengkey is hustu.

⁵Pinaaǥi te kebpemineg kayi, ne egkeumanan pa is ketau te menge uluwanen wey egkegiyahan is duen din menge netuenan,

⁶su wey zan mesavut is ibpesavut te menge erubasa, menge sempità, wey menge peentukà te menge metau.

⁷Is kedtahud te Nengazen iyan ebpuunan te hustu he ketau, piru is tulebung he etew kenè din egkesuatan is hustu he ketau, ne kenè din daan egkesuatan he metulid is mezaat he vetasan din.

⁸Mama, pemineǥa nu is sambag ku ne kenè nu iniyuǥi is penurù te ǥinikanan nu.

⁹Is penurù dey ebpekeveǥey kenikew te meupiya he vetasan iring te kuruna he menge vulak etawa velieg he ebpekeveǥey kenikew te mekempet he kedezagwey wey zengeg.

¹⁰Mama, kenè ka peuwit te menge mekesesalà.

¹¹Emun ke sikandan te, “Duma ka kenami su ed-ayan kiw, ne edhimetayan tew is edsaǥad minsan pa te wazà mekesalà.

¹²Is edsanggar ziyà te kenitew ne kenè tew en edsemaan te ǥehinawa.

¹³Su emun egkepatey tew sikandan egkaangken tew is mahal he menge azen dan su wey mepenù is menge valey tew te menge azen he tinakew.

¹⁴Duma ka kenami ne emun egketiǥayun kiw en, ne ebehinen tew is tinakew tew.”

¹⁵Mama, kenè ka zuma te menge etew he iring dutun, kekenà, likayi nu sikandan.

¹⁶Su utew sikandan meǥaan he ebaal te mezaat wey ebunù te etew.

¹⁷Wazà pulus te penuǥes te tagbis emun netuenan en dutun te menge tagbis he edtuǥesen nu sikandan.

¹⁸Ne iring kayi is tulebung he menge etew: ne iring dà te iyan dan edhimatey te lawa zan etawa iring dà te iyan dan ed-eyanan is keugelingen dan.

¹⁹Iyan heini egkehitavù te menge etew he mid-angken te ketiǥeyunan pinaaǥi te mezaat he paaǥi. Haazà is paaǥi, iyan kes dalan pehendiyà te kemetayen.

²⁰Is ketau, iring te sevaha he etew he edwali te mezaǥing diyà te menge zalan, menge pelasa, menge mirkadu, wey ziyà te menge pultahan te menge inged. Ke sikandin te,

²²“Sikiyu is menge wazè din hanew, taman te taman en be he iring kew keniyan? Sikiyu is menge mesudì, taman te taman en be is kegkelipey niw te kedsudì? Sikiyu is menge tulebung, taman te taman en be he kenè kew egkesuat he mebmetau?

²³Mebpezumazuma kew te kedawey ku keniyu. Guntaan, egkeǥiyen ku keniyu is egkeisip ku; ibpetuenan ku keniyu is egkeǥiyen ku keniyu.

²⁴Tenged te kenè kew ebpezumazuma te ked-umew ku wey kenà a keniyu edseǥipaan,

²⁵ne tenged te mibey-anan niw is menge sambag ku wey kenè kew egkesuat he ebpepenurù,

²⁶bà ku zà sikiyu ed-engiti emun ebpekebmereǥen kew; bà ku zà sikiyu ed-un-undaha zutun te kemereǥenan wey mekahandekhandek he egkeulaula niw he iring te eribpures.

²⁸Ne ed-umawen a keniyu, iyan, kenà ad edtavak; ebpen-ahaan a keniyu, iyan, kenà a keniyu egketuredu.

²⁹Su geina te kenè kew egkesuat he ebpenuruen wey wazè niw kedtahud te Nengazen.

³⁰Wazè niw seǥipaa is menge sambag ku wey wazè niw itetenged is kedawey ku keniyu,

³¹ne egkeraǥun niw is mezaat he menge beǥas te vaal niw, wey is menge mezaat he pelanu niw.

³²Su is kewewalì te etew he wazè din hustu he ketau iyan ibpatey zin, ne is kebpeeyehey te tulebung iyan ebpekezezaat kandin.

³³Iyan, is ebpemineg kedì, dezeyaan is kebpekesavuk din. Ne kenà sikandin egkehandek he egkekeizan.”