Text copied!
CopyCompare
परमप्रभु यावे आ लोव़ - हितोपदेस

हितोपदेस 3

Help us?
Click on verse(s) to share them!
1आं तौ, आं अरेशो मप्रेंदो। मिनु आं शेंशो लोव़ इ थुंमी वोतो। लेवी १८:५
2मारदे हना मेकोमी इ कली शुश बर्स ब्रोंइतीक नु थम रिम्‍शो बाक्‍चा गेनीस।
3गेना हना यो दाक्‍शा गेनायो मप्रोंइथु, बाक्‍को। मेको निक्‍शी कली माला खोदेंशो पा रेल्‍शा, इ थुंम ब्रेक्‍शो खोदेंशो पा वोतो। ब्‍यवस्‍था ६:८; येरमीया ३१:३३
4मो पाप्‍तीवी हना, गे परमप्रभु आ आसीक ताइनेवे। मुर नेल्‍लेमी इ कली रिम्‍शो देंनीम।
5गे इ थुं नेल्‍लेमी परमप्रभु यावे आ देंशो मिम्‍शा, थमा सुतो। इ आंम जोक्‍शो तुइश्शो थमा मसुतो।
6इ पतीक नेल्‍लेमी “परमप्रभु यावेमी मार दाक्‍बा” दे मिम्‍तो। मो पाप्‍तीवी हना, परमप्रभु यावेमी इ कली ठीक लां कोंइब।
7गे “गो जोक्‍ब तुइक्‍ब मुर नङ” दे ममिम्‍तो। तन्‍न परमप्रभु यावे कली मान पा हिनो। मरिम्‍शो पतीके रे ङोन बाक्‍को। यसैया ५:२१
8मो पाप्‍तीवी हना, मेको इ रां कली सापाइक्‍तीके बाक्‍ब। मिनु इ गुइ खोइल बोल्‍यो दुम्‍नीम।
9इ शोंपोमी परमप्रभु यावे कली मान पावो। मिनु इ बाली नाली रे नेल्‍ल क्‍येङा ङोंइती सिश्‍शोमी आ नें ठेयब सेलो। प्रस्‍थान २३:१९
10मो पाप्‍तीवी हना, इ कोठो भकारी अन्‍नमी शुश ब्रीशो बाक्‍नीम। इ अङगुर ख्राक्‍तीके अङगुर रसम ब्रीशो बाक्‍नीम।
11आं तौ, परमप्रभु यावेमी इ कली देंशो रिम्‍शो पावो। आ हुइश्‍शो नेंशा, मरिम्‍शो मसुतो। हिब्रू १२:५-६; अय्‍युब ५:१७-१९
12मारदे हना परमप्रभु यावेमी आ दाक्‍शो मुर आन कली ला हुइक्‍ब। मेकोमी रिम्‍शो आफोमी आ दाक्‍शो तौ कली खोदेंशो पा सजाइ गेब। १कोरिन्‍थी ११:३२; प्रकाश ३:१९
13तुइक्‍तीके ताइब नु रुप्‍ब‍पुकी ग्‍येरसीशो मुर बाक्‍नीम।
14मारदे हना तुइक्‍तीके चेम्‍शो चांदी क्‍येङा शुश रिम्‍शो बाक्‍ब। मिनु आ चेम्‍शो सुन क्‍येङा यो शुश क्‍येट लाइब बाक्‍ब। हितोपदेस ८:१०
15तुइक्‍तीके हीरा क्‍येङा शुश क्येट लाइब बाक्‍ब। इ माल्‍शो मारेइ मारेइ नेल्‍ल मेको क्‍येङा आइक्‍च बाक्‍नीम।
16मेको आ ग्‍युरा गुइमी शुश ब्रोंइतीक नाक्‍त बाक्‍नीम। आ पेरा गुइमी शोंप नु मान ततीके बाक्‍ब।
17मेको आ लां रिम्‍शो नु थुं नाइक्‍तीके बाक्‍नीम।
18मेको नु बाक्‍बपुकी शुश नाक्‍त ब्रोंइनीम। मेको कली मुप्‍शा बाक्‍ब आन पर्बम मुरपुकीमी “मेकोपुकी ग्‍येरसीशो मुर बाक्‍नीम” देंनीम। हितोपदेस ११:३०; हितोपदेस १३:१२; हितोपदेस १५:४

19परमप्रभु यावेमी आ तुइक्‍तीकेमी रागी सेल्‍तु। आ रुप्‍‍तीकेमी सरीङ वोइक्‍तु। हितोपदेस ८:२२-३१
20आ जोक्‍तीकेमी ब्‍वाक्‍कु बुक्‍पाइक्‍तु। मिनु गोस्‍स रे फुरश यिपाइक्‍तु।
21आं तौ, आं देंशो गेय पचा क्‍येङा ङोंइती मिम्‍शा, गेनायो मप्रोनो। ठीक तुइक्‍तीके नु होस पतीके गे नु बाक्‍ल।
22मारदे हना मेको इ ब्रोंइतीक नु इ दारस बाक्‍नीस।
23मिनु गे इ लांम रिम्‍शो पा गाक्‍ङे नु इ खोइल दाइल मपाइब।
24गे निस्‍सेनु, हिंचा ममाल्‍नेवे। इमेनु ब्रोव़शो निन्‍द्रा पाइनेवे। भजन संग्रह ३:६
25शुश हिंचा ङा दुम्‍मेनु, महिनो। फश पवानु, परमप्रभु यावे आ अरेशो मटीबपुकी खतम दुम्‍मानु, गे महिनो।
26मारदे हना परमप्रभु यावे गे नु बाक्‍ब, मेकोमी इ खोइल कली रेत्‍तीक रे प्रोंइब। हितोपदेस १०:२९
27मिनु मुर आन कली गेचा ङा गेवो। इ गुइमी बाक्‍त हना, शिं‍म मदुमो।
28गे नु बाक्‍त हना “दीसा जाक्‍को। मिनु गेनन” दे इ नेक्‍था ङा मुर आन कली मदेनो।
29इ नेक्‍था बाक्‍ब कली मरिम्‍शो पचा ममिम्‍तो। मारदे हना इ कली थमा सुइश्‍शा, इ नेक्‍था बाक्‍ब।
30इ कली मारेइ मरिम्‍शो मपथु जिचा मपोक्‍को।
31रोइक्‍ब मुर आ मारेइ मारेइ तशा, मवलो। मेको आ लांम काइ मगाक्‍को।
32मरिम्‍शो दूली पाइब तशा, परमप्रभु यावे ग्रांग्रा दी‍ब। रिम्‍शो थुं पाइश्‍शोपुकी चहिं मेको नु बाक्‍चा ताइनीम। भजन संग्रह २५:१४
33परमप्रभु यावेमी आ अरेशो मटीब आन खिं ङा मुर आ सराप राइब। तन्‍न ठीक पाइब आन खिंम आसीक राइब।
34मिनु परमप्रभु यावेमी ठेयब लेश्‍शो शुक्‍शी पाइब मुर आन कली शुक्‍शी पाइब। ब्रेम्‍शो थुं पाइश्‍शो आन कली चहिं शिशी पाइब। १ पत्रुस ५:५
35तुइक्‍ब मुरपुकी मान पाइक्‍चा पुंइसीनीम। तन्‍न मटीब मूर्खपुकी मुने दोक्‍नीम।