Text copied!
CopyCompare
Anutu Sua Kini Potomaxana - Sua Tutŋana

Sua Tutŋana 3

Help us?
Click on verse(s) to share them!
1Lutuŋ, sua ta nio aŋkam pu na, motom mbelele pepe. Motom iŋgalŋgal tutu tio ta boozomen mi kiskis la lelem.
2Pa ina ko ikamu ma mbot ambai, mi iseeŋge mbotŋana ku ma molo.
3Mbulu ki tu'urur lelende pa Anutu mi zin tomtom mi tototo sua kiti mbukŋana na, zem pepe. Mbulu ru tana, kiskis la lelem mi zzwe totomen. Pa ina ko iwe kembei aigau ta imbot la ketem na.
4Tana kiskis mbulu ru tana. Naso ndeeŋe kampeŋana biibi, mi Anutu ziŋan zin tomtom tire u kembei nu lem ŋgar ambaiŋana.
5Re: Kokena pase pa itum ŋgar ku. Ur lelem imap ila ki Yooba, mi pase pini men.
6Mi so zaala i ta lelem iur pa be to, na kam ŋgar pa Yooba muŋgu, mana kam. Naso ni ikam peeze piwi mi iso u pa ka zaala.
7Re itum kembei nu rao kat pa ŋgar pepe. Moto Yooba, leŋleŋ la kalŋaana, mi pizil ndemem pa mbulu sananŋan ta boozomen.
8Pa mbulu ta kembei ko iuulu kulim ma imbot ambai, mi ikam ma kulim iŋgeeze mi nim se pa uraata.
9Yooba, ni ikam lem koroŋ boozo kek. Tana pimilmiili koroŋ pakan ma ilala kini bekena pakuri pa. Koroŋ ku paazaŋan ta boozomen na, motom iŋgal be pazas mataana kana ma ilala kini.
10Naso Anutu ikam ma mokleene ku ipiyooto kini boozo, mi diditu ku bokbok men. Mi baen ku ko ipiyotyooto ŋonon ta sorok som, mi baen piiziŋana muriini bokbok kat pa yok baen popoŋana.
11Lutuŋ, sombe Yooba ikam mbulu sa pu bekena ipazalu pa, na parsiki pepe. Mi sombe iyaambu, na lelem iŋgis pa pepe.
12Pa zin wal ta Yooba leleene pizin na, ni ipazalzal zin, kembei ta takamam pa lutundu bizin tau lelende pizin ilip na.
13Tomtom ta so iru ŋgar ambaiŋana ma indeeŋe, mi ikilaala ŋgar iŋgoi ta ambai ma ilip, nako leleene ambai kat, mi kampeŋana ki Anutu imbotmbot se kini.
14Pa ŋgar ambaiŋana ipiyotyooto ŋonoono ambaimbaiŋan boozomen piti. Ilip pa silba ma gol.
15Mi ilip pa pat milmilŋan pakan ta ndabokbokŋan kat. Tana koroŋ boozomen ta nu lelem pa i na, sa irao kembei ŋgar ambaiŋana na som.
16Ŋgar ambaiŋana namaana ru iteege koroŋ boozomen be ikam piti. Namaana woono irao iseeŋge swondo ma molo. Mi namaana ŋas na, irao ikam lende koroŋ boozo, mi ikam ma zanda iwe biibi.
17Zin wal ta so titoto zaala ki ŋgar ambaiŋana, nako tiyamaana ambai. Pa mboti kizin ko ndabok kat.
18Ŋgar ambaiŋana, ina iwe kembei ke ki mbotŋana mata yaryaaraŋana. Pa zin wal ta so tikami ma iwe len mi tikiskisi, nako timbot ambai, mi kampeŋana ki Anutu imbotmbot se kizin.

19Muŋgu kat Yooba ito ŋgar kini ambaiŋana, mi iur toono uunu ma imbol. Mi ikam kat ŋgar, mana iur saamba.
20Muŋgu kat yok ta imbot meleebe na, ise raama mburaana biibi. Ito ni ŋgar kini. Mi ŋgar kini, ta izzo i pa mbulu tabe ikam ma yaŋ izzu pa gubur tiene, mi tolou iwedet.
21Lutuŋ, motom iŋgal be kiskis ŋgar ambaiŋana. Ŋgar ta iurur ŋonoono na, zem pepe.
22Pa ina ko ikamu ma mbot ambai, mi ipeŋgeeze mbulu ku, kembei aigau ta imbot la ketem na.
23To pa pai ku ma ambai men. Pa kosasa ko ipasaanu som, mi irao tutkat kumbum na som.
24Mi sombe su murim be keene, nako moto som. Ko keene kat lem.
25Tana pataŋana biibi tabe ipamurur zin wal sananŋan mi ipasaana zin i, nu ko irao moto na som.
26Pa Yooba ko imbotmbot zilŋom uunu mi imborro u. Tana kilis sa ko irao ikeene kumbum na som.
27Sombe pataŋana indeeŋe tomtom sa mi nu lem uraata be uuli, na titi pepe. Sombe rao be uuli, na kam pataaŋa. So pini be ila ma gaaga to imiili mini pepe. Sombe lem koroŋ imbot, na kam pini pataaŋa.
29Tomtom ta so ruumu kini igarau u, na kam ŋgar be pasaani pepe. Pa ina ni indemeere kembei nu ko kam mbulu ambaiŋana men pini.
30Mi tomtom ta so ikam ŋoobo mbulu som, na maŋga mi kam sorok sua pini pepe.
31Zin wal ta tikamam zaaba pizin tomtom na, motom berber pa mburu kizin pepe, mi to zin pa zaala kizin pepe.
32Pa zin wal ta tikamam ŋoobo mbulu na, Yooba leleene pizin ri sa som kat. Tamen zin wal ta mbulu kizin iŋgeeze men na, Yooba igabgaaba zin mi izzwe leleene mi ŋgar kini pizin.
33Wal sananŋan ziŋan wal kizin na, Yooba kete malmalŋana kini imbotmbot se kizin. Mi wal ndeeŋeŋan ziŋan wal kizin na, kampeŋana kini imbotmbot se kizin.
34Zin wal ta tipakurkur zitun mi matan pasom ŋgar ambaiŋana na, Yooba irepilpiili zin. Mi zin wal ta tikototo zitun na, ni leleene pizin mi ikampewe zin.
35Zin wal ta len ŋgar ambaiŋana, nako zan iwe biibi. Mi wal kankaanaŋan ta tizorzooro, nako kan miaŋ biibi.