Erubasa 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Heini pa is duma he menge erubasa ni Solomon he migkupya te menge maama he sakup ni Hadì Hezekia he hadì te Juda:

²Ebentuǥen tew is Megbevayà tenged te menge egkengeulaula he wazè din ipezayag kenitew; ebentuǥen tew is menge hadì tenged te menge ibpezayag dan kenitew.

³Kenè ta egkesavut is ed-isipen te menge hadì su iring heini ketikang te langit wey iring kezalem te zaǥat.

⁴Ewaa nu is tangis te pelata, ne is etew he pandey te pelata ebpekehimu te ǥelemiten puun dutun.

⁵Iring din ded daan emun ibpaawà te hadì is lalung he peresambag din, ne egkelig-enan is kedumala zutun te hadì pinaaǥi te ketazeng.

⁶Emun sevaha ka te menge upisyal te hadì, ne kenè nu isipa is keugelingen nu he lavew tenged te nekepinuu ka zuma te dungganen he menge etew.

⁷Deyzey pa ke egkeǥiyan ka zutun te hadì te zutun ka pinuu kenà ke egkeǥiyan ke zin te awè ka, ne egkepeel-elezan ka zutun te etuvangan te dungganen he menge etew.

⁸Emun duen egkeehè nu, kenè nu segugunà isumbung diyà te hukmanan su emun duen ebpekepenistiǥus he igkepeletew zin he nesayep ka ne zutun egkepeel-elezan ka.

⁹Emun ebpekedlawan kew te siringan nu, egkehimu ke ebpelewanè kew, piru kenè niw tudtula is in-eles niw.

¹⁰Su emun egketuenan heini te zuma, ne kela ke peel-elezi kew zan, ne egkezeetan is dengeg niw taman te taman.

¹¹Is lalag nu he edsungkad te hustu he timpu, iring heini te mensanas he vulawan he idsavuk diyà te selevukà he pelata.

¹²Is kedawey te etew he uluwanen te etew he egkesuat he ebpemineg mahal pa heini kenà te elahas he vulawan.

¹³Is egkeseriǥan he menunudtulà, ebpekepahagkap te egezamen te midsuǥù kandin, iring te meǥenew he wahig emun timpu te gulavung.

¹⁴Ne is etew he ebpenangdù he zuen ibeǥey zin, iyan, kenè din idlaus, haazà is penangdù din igkepetug-iring te ǥapun wey keramag he kenà egkezumahan te uzan.

¹⁵Is kebmepelevayen wey menayù he kegkaǥikaǥi ne ebpekeuwit te menge pengulu minsan te menge mezesen is gehinawa.

¹⁶Kenè ka mebpesubra te kegkaan te teneb su kela ke mekeutè ka.

¹⁷Kenè ka layun penumbaley ziyà te siringan nu, su kela ke meperahi sikandin ne egkeepesan ke zin.

¹⁸Is etew he ebpenistiǥus te tarù kuntra te zuma zin, ne ebpekezezaat iring te ispada, badas, wey panà.

¹⁹Emun timpu te kesamuk ne is kedsarig diyà te etew he kenà metinumanen, igkepetug-iring te ngipen he meǥaan en egkesepù wey iring daan te paa te pigket.

²⁰Is kedlengana te etew he utew egkeseeng, pinaaǥi te kegkentahi nu kandin, ne igkepetug-iring te edluwasen nu is kumbalè din dutun te timpu te meǥenew etawa edsevukan nu te sukà is palì din.

²¹Emun egkevitil is kuntada nu, ipekaan nu, ne emun egkemezahan ipeinum nu.

²²Ne emun ebeelan nu heini, ne egkeeled sikandin kenikew, ne is Nengazen ebales kenikew.

²³Is keramag he ebpuun diyà te zizaya ed-uwit te uzan, ne iring dutun is etew he pereituk su ed-uwit te tudtul he igkesavà.

²⁴Deyzey pa is kedsivey ked-ubpa kenà is kebpekid-amur te esawa he peretebek.

²⁵Is kebpemineg te meupiya he tudtulanen he ebpuun diyà te meziyù, ne iring te ked-inum te meǥenew he wahig emun egkemazahan ki.

²⁶Is metazeng he etew he egkeuwit te lalung he etew iring te leveg he serebseb etawa meremerik he teheb.

²⁷Kenà meupiya emun ebpesubra ki te kegkaan te teneb, iring din daan is kedtinguhà he mezeliǥi ka layun te menge etew.

²⁸Is etew he kenè din egkeeǥen is suat din ne melemu egkezeeti iring te sevaha he inged he wazè din berengbeng.