Text copied!
CopyCompare
BIBLE MUTAL - Soakas

Soakas 3

Help us?
Click on verse(s) to share them!
1Tulik nutik, nimet mulkunla ma nga luti nu sum. Esam ma nukewa ma nga fahk nu sum in oru.
2Mwe luti luk ac fah akloesye moul lom ac akinsewowoye.
3Nimet lela kulang ac inse pwaye in wanginla liki kom. Kapriya inkwawom, ac simusla insiom.
4Kom fin oru ouinge, kom ac fah ohi yurin God ac mwet uh.
5Lulalfongi LEUM GOD ke insiom kewa. Nimet lulalfongi etu lom sifacna.
6Esam LEUM GOD in ma nukewa kom oru, ac El ac fah akkalemye inkanek suwohs nu sum.
7Nimet sifacna nunku mu kom arulana fas in lalmwetmet lom; akos LEUM GOD ac fahsr liki ma koluk.
8Kom fin oru ouinge, ac fah akkeye monum, ac sot ku nu sum.
9Akfulatye LEUM GOD ke mwe sang lom nu sel ke mwe kasrup lom, ac ke fahko se meet ke ima lom.
10Kom fin oru ouinge, nien filma lom ac fah nwanala ke wheat, ac nien wain lom ac fah kahkkakla ke wain.
11Tulik nutik, nimet pilesru kas in kai lun LEUM GOD nu sum, a lohang nu kac ac eis mu mwe sensenkakin kom.
12LEUM GOD El kaelos su El lungse, oana ke sie papa kai tulik su el insewowo kac.
13Insewowo mwet se su konauk lalmwetmet, ac su sun etauk.
14Ma laesla kac yohk liki ma laesla ke silver, ac yohk sripa nu sum liki gold.
15Lalmwetmet el saok liki wek saok. Wangin kutena ma kom lungse ku in lumweyuk nu kac.
16Lalmwetmet uh ac akloesye moul lom, akkasrupye kom, ac oru in sunakinyuk kom.
17Inkanek lun lalmwetmet uh ac mwe engan nu sum, ac kol kom nu ke moul in misla.
18Lalmwetmet uh oana sak in moul nu selos su eisal, ac mwe insewowo nu selos su akfulatyal.

19LEUM GOD El orala faclu ke lalmwetmet lal, Ke etu lal El oakiya ma oan inkusrao.
20Lalmwetmet lal uh oru kof ye faclu in unonak, Ac pukunyeng uh in kahkunma af nu fin faclu.
21Tulik nutik, sruokya ku liyaten, ac lohang in wo nu ke ma kom oru.
22Ma inge ac sot moul wo ac insewowo nu sum.
23Kom ac fah fahsr ke inkanek in misla, ac tiana tukulkul.
24Kom ac fah tia sangeng ke kom motul, ac kom ac fah motul folosowosla ke fong uh.
25Kom ac tia sensen ke mwe fosrnga su ac sa sikyak, oana paka ma sun mwet koluk uh.
26LEUM GOD El ac karingin kom. El ac fah tia lela niom in sremla.
27In pacl nukewa ma kom ku, kom in kasrelos su fal in eis kasru, ac tia sruokya ma wo lukelos.
28Nimet fahk nu sin mwet tulan lom in soano nu ke len tok ah, kom fin ku in kasrel ingena.
29Nimet akoo kutena ma ac tuh akkolukye mwet tulan lom; el muta siskom ac lulalfongi kom.
30Nimet akukuin nu sin sie mwet ke wangin sripa, fin wangin ma el oru in akkolukye kom.
31Nimet mwel ma lun mwet sulallal, ku nunkauk in oru oana elos oru,
32mweyen LEUM GOD El srunga mwet orekma koluk, a El insraelak nu sin mwet suwoswos.
33Mwe selnga lun LEUM GOD oan fin lohm sin mwet koluk, a mwe insewowo lal oan fin lohm sin mwet suwoswos.
34El tiana lohang nu sin mwet inse fulat, a El kulang nu sin mwet pusisel.
35Mwet lalmwetmet uh ac akfulatyeyuk, a mwet lalfon uh ac yokelik mwekin lalos.