1 Cronica 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Hein diyè en med-ubpà si David te turuǥan din, ne migkeǥiyan din is ebpeneuven he si Natan te, “Kayi e en med-ubpà te utew mekempet he turuǥan he kayu he sidru is inhiman duen, piru haazà is Kavan te Kebpekid-uyun te Nengazen ne ziyè dà te tulda.”

²Midtavak si Natan diyà te ki David te, “Beeli nu is egkesuatan nu te ebaal, su is Megbevayà eduma kenikew.”

³Piru te haazà he kezukileman mibpekidlalag is Megbevayà diyà te ki Natan,

⁴“Genat ka, ne keǥiyi is suluǥuen ku he si David he iyan heini migkaǥi ku: ‘Kenè ka iyan ebpehitindeg te valey he ed-ubpaan ku.

⁵Wazè e pa mekeubpà te valey he zutun a ed-ezapa is Megbevayà puun pa te timpu te kebpeǥewasa ku te menge Israilihanen puun te Ehipto taman guntaan. Nekehalinhalin ad is diyà ed-ubpà te tulda.

⁶Te kedhalinhalin ku he zuma ku is menge etew ku he Israilihanen, wazà ad megkaǥi ziyà te menge pengulu he midsuǥù ku te ked-elima kandan te, maan is wazè e zan tukuzi te utew mekempet he valey he zutun a ed-ezapa he sidru is menge pengawid din.’ ”

⁷“Keǥiyi nu pa si David he iyan a, is Nengazen he Mekeǥeǥehem, egkaǥi te, ‘Mibantey ke zà dengan te menge kerehidu, piru mibpilì ku sikew he edumala te menge etew ku he Israilihanen.

⁸Midumahan ku sikew minsan hendei ka mebpevayà, ne impezaag ku kenikew is langun he kuntada nu. Guntaan edhimuwen ku sikew he mevantug iring te zuma he menge etew he egkevantug diyan te tivuuk he kelibutan.

⁹Mibeǥayan ku en is menge etew ku he Israilihanen te ubpeey he pirmeninti, para zuen dan en keugelingen he ubpeey he wazè en ebpekesamuk kandan wey ebpekezaagdaag iring duen te nehuna,

¹⁰puun pa te timpu te kedsevuki ku te menge pengulu te menge etew ku he Israilihanen. Edaaǥen ku is langun he menge kundata nu David. Iyan a, is Nengazen egkaǥi kenikew he edhadì layun is sevaha te menge kevuwazan nu.

¹¹Emun ebpatey kad ne idleveng ka zuma te menge kepuun nu, ibpuli ku kenikew is sevaha te menge anak nu, ne edlig-enan ku is ginhedian din.

¹²Iyan sikandin ebangun te valey para kedì, wey edsigureduwen ku he is menge kevuwazan din ebpekahadì taman te taman.

¹³Ne iring a te amey zin, ne iring daan sikandin te anak ku. Kenà egkehalin is kebmahala ku kandin, kenà iring te mibeelan ku ki Saul he nepuliyan nu he hadì.

¹⁴Iyan sikandin ibpezumala ku te menge keet-etawan ku wey ginhedian ku, ne is menge kevuwazan din ne edhadì te taman te taman.’ ”

¹⁵Midtudtul ni Natan ki David is langun he impezayag te Megbevayà diyà te kandin.

¹⁶Dutun midseled si Hadì David dutun te Tulda he zutun kes Kavan te Kebpekid-uyun. Ne mibpinuu sikandin diyà te etuvangan te Nengazen ne mibpengemuyù te, “He Nengazen he Megbevayà, hentei e ves wey is pemilya ku maan is midtuvazan a kenikew te iring kayi?

¹⁷He Megbevayà, duen pa insaad nu he edtelinguma te pemilya ku. Midhimu a kenikew he utew dungganen he etew. He Nengazen he Megbevayà,

¹⁸wazè en egkekaǥi ku kayi te kebeǥayi nu kedì te zengeg. Su netuenan nu en man ke hentei a is suluǥuen nu.

¹⁹He Nengazen, tenged kedì te suluǥuen nu wey tenged te iyan egkesuatan nu, midhimu nu heini is dekelà he menge vaal ne impetuenan nu kediey.

²⁰Wazà iyan ebpekerepeng kenikew, Nengazen, wey wazè en minsan hentei pa he Megbevayà gawas kenikew. Wazè dey nezineg he megbevayà he iring kenikew.

²¹Wey wazè en daan menge etew he iring te keet-etawan nu he menge Israilihanen. Iyan dà heini nasyun kayi te kelibutan he midluwas nu te kegkeuripen wey mehimu he keet-etawan nu. Nehimu ka he ventuǥan tenged te ǥehem nu wey egkein-inuwan he menge vaal nu hein midsegseg nu is menge etew ziyà te menge nasyun pinaaǥi te menge keet-etawan nu he midluwas nu puun te Ehipto.

²²Midhimu nu is menge Israilihanen he keet-etawan nu te wazà pidtemanan, wey iyan ka, Nengazen he Megbevayè dan.

²³Ne ǥuntaan, Nengazen, tumana nu is menge saad nu kedì te suluǥuen nu wey te pemilya ku, para mehitavù heini, ne iyan ka mevantug te wazà pidtemanan. Ne egkaǥi is menge etew te, ‘Is Nengazen he Mekeǥeǥehem iyan Megbevayà te Israel.’ Ne is kedhadì te pemilya ku ebpedayun taman te taman.

²⁵Duen ku kevurut te kebpengemuyù kayi ziyà te kenikew, tenged te impahayag nu kedì te suluǥuen nu he layun duen egkehimu he hadì he sevaha te menge kevuwazan ku.

²⁶“He Nengazen, iyan ka kes tutuu he Megbevayà. Insaad nu heini is menge meupiya kedì te suluǥuen nu.

²⁷Ne ǥuntaan ingkelipey nu is kedtuvazi nu te pemilya ku para mekepedayun heini taman te wazà ketepusan diyà te etuvangan nu. Emun edtuvad ka Nengazen, is kedtuvad nu wazà pidtemanan.”