BƐBAATÍBƐ̀ 11:5-26

⁵Mudoò ìtɛ́ dìì mɔ̀nnì kɛ̀ Kɑdɑɑdi ɛì kó bɛkótíbɛ̀ɛ kɔtɛ Tobu tempɛ̃ nSɛfutee wɑmmù,

⁶kóò yɑ̀, kóò nɑ̀kɛ́ kɛ dɔ̀: Kɔtɛní kɛ́niitɛ́ ti kó bɛhɑ̃ɑ̃pɔ̀mbɛ̀ kɛ̀ tí nɑ kɛ́dokɛ́nɛ̀ Amɔniibɛ.

⁷Kɛ̀ Sɛfutee bɛ̀ tɛ̃̀ńnɛ́ kɛ dɔ̀: Dɛ̀ í tú díì do n yetɛ kɛ́ m bɛti n cicɛ cĩ́ɛ̃̀tɑ̀ɑ̀? Dɛ̀ yĩ́mɛ kɛ̀ di tɑ mɛsémmɛ̀ miɛkɛ kɛ cokɛ́ní m bíɛ́kɛ̀?

⁸Kɛ̀ bɛ̀ɛ ò tɛ̃̀ńnɛ́ kɛ dɔ̀: Ti kɔ̀tɛní ɑ borɛ̀ kɛ dɔ́ ɑ kɔtoo kɛ̀ tí wɛ̃nnɛ́ kɛ́dokɛ́nɛ̀ Amɔniibɛ mbɛ kɑ̀ɑ ntú ti kóo kpɑ̀ɑ̀tì kɛ́mbɑkɛ́ Kɑdɑɑdi omɔu.

⁹Kɛ̀ Sɛfutee dɔ̀: Kɛ̀ n di nɛinɛ̀ mudoò kɛ̀ ti Yiɛ̀ nKuyie nyie nkɛ̀ m bɛ̀ nɑ, míì yó ntú di kòo kpɑ̀ɑ̀tì.

¹⁰Kɛ̀ Kɑdɑɑdi kó bɛkótíbɛ̀ɛ ò nɑ̀kɛ́ kɛ dɔ̀: Ti Yiɛ̀ nKuyie nti wúómmu, tíì bɛ́i nkɛ tú ti bo dɔɔ̀ ɑ bɛ́i ntì timɔu.

¹¹Kɛ̀ Sɛfutee nɛinɛ̀ Kɑdɑɑdi ɛì kó bɛkótíbɛ̀, kɛ̀ bɛ̀ɛ ò tùótɛ́ kòo mbɑkɛ́ bɛhɑ̃ɑ̃pɔ̀mbɛ̀, kɛ̀ bɛ̀ɛ kɔtɛ Misipɑɑ kɛ̀ Sɛfutee wɛ̃tɛ kɛ́bɛ́i ti Yiɛ̀ nKuyie nyììkɛ̀ ò do nɑ̀kɛ́ tì bɛkótíbɛ̀.

¹²Kɛ̀ Sɛfutee tɔ̃ nkɛ̀ bɛ̀ɛ nɑ́kɛ́ Amɔniibɛ kpɑ̀ɑ̀tì kɛ dɔ̀: Sɛfutee tu, ɔ̃̀nti bo di cuokɛ̀ fɔ̃́ nnɛ̀ we kɑ̀ɑ bɑ̀ɑ́tí kɛ bo ò do mudoò?

¹³Kɛ̀ Amɔniibɛ kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Isidɑyɛɛribɛ yɛ̀nní dìì mɔ̀nnì Esibiti, dɛ mɔ̀nnì ndi bɛ̀ fìètɛmɛ̀ n tenkɛ̀, kɛ́túótɛ́ Adinɔ biriku kɛ́tuɔkɛnɛ̀ kukó nSɑbɔki kɛ́tuɔkɛnɛ̀ Suditɛ̃ɛ̃ biriku. Wè tí duɔ́ nti tenkɛ̀ mɛyɔɔ̀mmɛ̀.

¹⁴Kɛ̀ Sɛfutee wɛ̃tɛ kɛ́tɔ̃ mbɛtɔbɛ̀ Amɔniibɛ kpɑ̀ɑ̀tì borɛ̀.

¹⁵Kɛ̀ bɛ̀ bo ò nɑ̀kɛ́ kɛ tú: Isidɑyɛɛribɛ do í fìètɛ Mɔɑbiibɛ nɛ̀ Amɔniibɛ tenkɛ̀ mɑkɛ̀.

¹⁶Bɛ̀ yɛ̀nní dìì mɔ̀nnì Esibiti kɛ́tɑ dikpɑ́ɑ̀ ndi dibiri miɛkɛ, kɛ́tuɔkɛ dɑ̀mɛ́ɛ̀rì tipèntì kou, kɛ́pɛ̃ɛ̃tɛ́ kɛ́kɔtɛ Kɑdɛɛsi.

¹⁷Bɛ̀ do dɛ mbo kɛ́tɔ̃ nkɛ̀ bɛ̀ɛ nɑ́kɛ́ Edɔmmu kóo kpɑ̀ɑ̀tì kòò bo bɛ̀ pɑ̃ kucɛ kɛ̀ bɛ̀ɛ pɛ̃ɛ̃tɛ́ o ɛì miɛkɛ, kòo yetɛ kɛ̀ bɛ̀ɛ sɔɔtɛ́ kɛ́mɔɔ Mɔɑbu kou kucɛ kòo múnkɛɛ yetɛ, kɛ̀ bɛ̀ɛ yóu kɛ́mbo Kɑdɛɛsi.

¹⁸Bɛ̀ dɛ nyìtɛ́ kɛ́kétɛ́ dikpɑ́ɑ̀, kɛ́mpɛkɛ́nɛ̀ Edɔmmu nɛ̀ Mɔɑbu ɛkɛ̀, kɛ́tuɔkɛ Mɔɑbu ɛì diyiè yìɛ̀ní kɛ̀ɛ̀ bíɛ́kɛ̀, kɛ́bɑ́tɛ́ kukó nhAdinɔ yɑ́ɑ̀ bɛ̀ í ntɑ dihɛì. Adinɔ weè do tú Mɔɑbiibɛ tenkɛ̀ mɑ̀nku.

¹⁹Bɛ̀ dɛ mbo kɛ́tɔ̃ nkɛ̀ bɛ̀ɛ nɑ́kɛ́ Sionni Amɔdiibɛ kpɑ̀ɑ̀tì Ɛsibonni ɛì kou kɛ dɔ̀: Isidɑyɛɛribɛ tu ɑ bɛ̀ pɑ̃ kucɛ kɛ̀ bɛ̀ɛ pɛ̃ɛ̃tɛ́ ɑ ɛì miɛkɛ, kɛ́kɔtɛ bɛ̀ kɔ̀ri kɛ̀.

²⁰Bɑ́ Sionni í nhò tɑ̃́, kɛ́yetɛ kɛ́tíí nho ɑ̃ɑ̃pɔ̀mbɛ̀ Yɑɑsi ɛì kɛ́bɑ́ɑ́tí kɛ́do Isidɑyɛɛribɛ mudoò.

²¹Kɛ̀ ti Yiɛ̀ nKuyie nyIsidɑyɛɛribɛ tũ nkùu duɔ́ nkɛ̀ bɛ̀ɛ nɑ Sionni nɛ̀ o nìtìbɛ̀, kɛ́fietɛ o tenkɛ̀ kɛmɔu,

²²kɛ́túótɛ́ Amɔriibɛ tenkɛ̀ kɛmɔu kɛ́ketɛ́ Adinɔ kubiriku kɛ́tuɔkɛnɛ̀ kukó nYɑɑbɔku, kɛ́túótɛ́ dibiri kó dikpɑ́ɑ̀ kɛ́tuɔkɛnɛ̀ Suditɛ̃ɛ̃.

²³Ti Yiɛ̀ nKuyie ntínti Isidɑyɛɛribɛ tũ nkù, kuù duɔ́ nkɛ̀ ti fìètɛ Amɔdiibɛ tenkɛ̀ kɛ̀ fɔ̃́ nnɛ́ dɔ́ kɛ́ kɛ̀ cɔutɑ́ɑ̀?

²⁴A kó dibɔɔ̀ Kemɔɔsi dɑ duɔ́mmu kɛtenkɛ̀ kɑ̀ɑ kɛ̀ te. Ti Yiɛ̀ nKuyie nti duɔ́ nkɛ̀, ti kɔkɛ nkɛ, kɛ̀ ti dò nkɛ́ nkɛ̀ te.

²⁵A yɛ̀mmɛ̀ dò nhɑ kpeńnìnɛ̀mu Sipɔɔ birɛ Bɑdɑki Mɔɑbu ɛì kóo kpɑ̀ɑ̀tɑ̀ɑ̀? Ò í wɑmmú nɛ̀ Isidɑyɛɛribɛ dikpɑ̀nnì, ò í bɛ̀ dokɛ́nɛ̀.

²⁶Nɛ̀ Isidɑyɛɛribɛ bomɛ̀ Ɛsibonni ɛì nɛ̀ di pɛɛ́mmɛ̀ nɛ̀ Adowɛɛ ɛì nɛ̀ di pɛɛ́mmɛ̀ nɛ̀ Adimɔɔ pɛɛ́mmɛ̀ kpɛyɛ dɛ̀ mɔ̀kɛ yɛbie nsikɔusìtɑ̃ɑ̃ti ndi (300), dɛ̀ yĩmɛ kɛ̀ di í cɔutɛ́ dɛ kó kɛtenkɛ̀ nɛ̀ yíenní?