Text copied!
CopyCompare
Is Lalag te Megbevayà - 2 Cronica

2 Cronica 13

Help us?
Click on verse(s) to share them!
1Nehimu he hadì diyà te Juda si Abia hein ike-18 he tuig te kedhadi ni Jeroboam te Israel.
2Diyà med-ubpà te Jerusalem si Abia, ne midhadì sikandin seled te tetelu he tuig. Iyan iney zin si Maaca he anak ni Uriel he tig-Gibeah. Mibpetebekà si Abia wey si Jeroboam.
3Nenurung si Abia duma is 400,000 he menge mevurut he menge sundaru, ne mid-andam daan si Jeroboam te 800,000 he memetau he ebpekidtebek he menge sundaru.
4Hein nekeuma ensi Abia ziyà te vuvungan te Efraim, ne midhitindeg si Abia ziyà te Buntud he Zemaraim ne migkulahì din si Jeroboam wey is menge tig-Israel, “Pemineg kew kedì.
5Wazè niw ve metueni he is Nengazen he Megbevayà te Israel, nekid-uyun ki David te uyun he wazà pidtemanan, he iyan sikandin wey is menge kevuwazan din ebpekahadì te Israel te taman te taman?
6Piru sikew Jeroboam is anak ni Nebat midsukul ka te egalen nu he si Solomon he anak ni David.
7Miduma kenikew is engey wey wazà pulus he menge etew, ne nekidsukulè kew ki Rehoboam he anak ni Solomon dutun te vatè pa si Rehoboam wey wazè din pa neseǥazan ne kenè pa ebpekehimu he edsukul keniyu.
8Ne ǥuntaan egkesuatan niw te egkuntada is ginhedian te Nengazen he ziyà isarig te kevuwazan ni David. Mibpegalbu kew he mezakel is menge sundaru niw wey neuwit niw kes bulawan he menge vaka he mibpeveelan ni Jeroboam he iyan menge megbevayè niw.
9Midsegseg niw is menge memumuhat te Nengazen, he menge kevuwazan ni Aaron wey kes menge Levihanen. Ne mibpilì kew te keniyu he menge memumuhat iring te ebeelan te menge etew ziyà te zuma he menge nasyun. Su is minsan hentei he zuen din tudu he vaka wey pitu he kerehidu ne egkehimu en he edhimuwen he memumuhat te kenà tutuu he megbevayè niw.
10“Sikami mulà, ne iyan is Nengazen Megbevayè dey, ne wazè dey sikandin iniyuǥi. Ne is menge memumuhat dey he ebpenilbi te Nengazen menge kevuwazan ni Aaron, ne ed-uǥupan sikandan te menge Levihanen.
11Kada meselem wey mezukilem ne ebpemuhaten dan is Nengazen te menge ibpemuhat he edtutungen wey menge mehemut he veyewà. Edsavuk dan te supas diyà te lemisahan he ed-isipen he lumpiyu. Ne kada mezukilem edtemteman dan is menge sulù he zutun te selevukè din he vulawan. Ebpezumdumahan dey is menge suǥù te Nengazen he Megbevayè dey. Piru sikiyu mid-iniyuǥan niw sikandin.
12Is Megbevayà ne eduma kenami; iyan sikandin pengulu zey. Ne emun edsurung key keniyu ne iyan ebpengulu kenami is menge memumuhat he ebpezaǥing te menge trumpita. Sikiyu is menge keet-etawan te Israel, kenè niw sukuli is Nengazen, he Megbevayà te menge kepuun niw, su kenè kew ebpekezaag.”
13Hein kemulu pa si Abia egkaǥikaǥi, ne mid-eles-eles medsuǥù si Jeroboam te menge sundaru ziyà te egkeiniyuǥan te menge tig-Juda para meeyani sikandan.
14Hein naahà te menge tig-Juda he nelingutan en sikandan te menge kuntada zan, ne mibuyù dan te tavang diyà te Nengazen. Impezaǥing te menge memumuhat is menge trumpita,
15ne nemengulahì dan ne midaag te Megbevayà si Jeroboam wey is menge sundaru te Israel. Mibpendal-as sikandan ni Abia wey te menge sundaru te Juda.
16Nemelaǥuy zan ne imbeǥey sikandan te Megbevayà diyà te menge tig-Juda.
17Utew mezakel is nepatey ni Abia wey te menge sakup din–500,000 he menge memetau he menge sundaru te Israel.
18Umbe, nezaag te menge tig-Juda is menge tig-Israel dutun he tebek, tenged te midsarig sikandan te Nengazen he Megbevayà te menge kepuun dan.

19Midal-as ni Abia si Jeroboam ne naaǥew zin diyà te kandin is menge inged te Betel, Jeshana wey Efron, wey neragkes is menge inged he nekelingut dutun.
20Wazè en mekelikù diyà te ki Jeroboam is gehem dutun te timpu ni Abia, ne taman en te midsilutan sikandin te Nengazen ne minatey.
21Ne mid-iseg mulà is gehem ni Abia. Duen din 14 he menge esawa ne 22 is menge maama he menge anak din ne 16 is menge anak din he menge vahi.
22Is duma pa he ǥuǥud mehitenged te kedhadì ni Abia, is menge paaǥi zin wey menge migkaǥi zin, ne ingkesurat diyà te Guǥud ni Iddo he ebpeneuven.