2. Kraľengero 15:8-36

⁸Sar kraľinelas andre Judsko o Azarijah tranda the ochto (38) berš, ačhiľa kraľis upral o Izrael o Zecharijah, o čhavo le Jarobeamoskero. Ov kraľinelas andro foros Samarija šov čhon.

⁹Kerelas oda, so na sas le RAJESKE pre dzeka, avke sar the leskere dada a na preačhelas te kerel ola bini, so kerelas o Jeroboam, le Nebatoskero čhavo, savo anďa le Izrael andro binos.

¹⁰O Šallum, le Jabešoskero čhavo, pes počoral dothoďa pro Zechariah a murdarďa les anglo manuša. Avke ov pal leste ačhiľa kraľis.

¹¹Savore aver veci, so kerďa o Zecharijah, hin pisimen andro Zvitkos le Izraelike Kraľengero.

¹²Avke le RAJESKERO lav, so phenďa pal o kraľis Jehu, pes the ačhiľa: “Tire čhave bešena pro Izraeliko tronos dži andro štarto pokoleňje.”

¹³Sar andre Judsko kraľinelas o Uzziah tranda the eňa (39) berš, andro Izrael ačhiľa kraľis o Šallum, le Jabešoskero čhavo, a kraľinelas andro foros Samarija jekh čhon.

¹⁴Paľis o Menachem, le Gadioskero čhavo, geľa andral e Tirca andre Samarija, murdarďa le Šallum a ačhiľa pal leste kraľis.

¹⁵Savore aver veci, so kerďa o Šallum, the sar kerďa e vzbura, hin pisimen andro Zvitkos le Izraelike Kraľengero.

¹⁶Andre oda časos, sar o Menachem džalas andral e Tirca, zňičinďa o foros Tappuach the o gava pašal, bo ola manuša na kamle te phundravel o foroskere brani. Avke murdarďa savoren andro Tappuach a le khabne džuvľen rozčhingerďa.

¹⁷Sar andre Judsko kraľinelas o Uzziah tranda the eňa (39) berš, andro Izrael ačhiľa kraľis o Menachem, le Gadioskero čhavo. Kraľinelas deš berš andro foros Samarija.

¹⁸Ov kerelas oda, so na sas le RAJESKE pre dzeka, a medik kraľinelas, na preačhelas te kerel ola bini, so kerelas o Jeroboam, le Nebatoskero čhavo, savo anďa le Izrael andro binos.

¹⁹Sar avľa andro Izrael o Asiriko kraľis Tiglat-Pileser, o Menachem les diňa tranda the štar (34) toni rup, hoj leske te pomožinel zoraleder te doľikerel o kraľišagos.

²⁰Avke o Menachem ispidelas pro barvale Izraeliti, hoj dojekh lendar te počinel penda (50) rupune, a diňa oda le Asirike kraľiske. Paľis o Asiriko kraľis geľa het andral odi phuv.

²¹Savore aver veci, so kerďa o Menachem, hin pisimen andro Zvitkos le Izraelike Kraľengero.

²²Sar o Menachem muľa, ačhiľa kraľis leskero čhavo o Pekachiah.

²³Sar andre Judsko kraľinelas penda (50) berš o Azarijah, andre Samarija pro duj berš ačhiľa kraľis upral o Izrael o Pekachiah, le Menachemoskero čhavo.

²⁴Ov kerelas oda, so na sas le RAJESKE pre dzeka, avke sar the leskere dada a na preačhelas te kerel ola bini, so kerelas o Jeroboam, le Nebatoskero čhavo, savo anďa le Izrael andro binos.

²⁵O Pekach, le Remaljoskero čhavo, pes počoral dothoďa le penda (50) muršenca andral o Gilead pro Pekachiah a murdarďa les andre palaciskeri veža andre Samarija. Avke pal leste ačhiľa kraľis.

²⁶Savore aver veci, so o Pekachiah kerďa, hin pisimen andro Zvitkos le Izraelike Kraľengero.

²⁷Sar imar andre Judsko kraľinelas o Azarijah penda the duj (52) berš, andro Izrael ačhiľa kraľis o Pekach, le Remaljoskero čhavo. Ov kraľinelas andro foros Samarija biš (20) berš.

²⁸Kerelas oda, so na sas le RAJESKE pre dzeka, a na preačhelas te kerel ola bini, so kerelas o Jeroboam, le Nebatoskero čhavo, savo anďa le Izrael andro binos.

²⁹Sar sas andro Izrael kraľis o Pekach, avľa ode o Asiriko kraľis Tiglat-Pileser a zaiľa peske o fori Ijon, Abel-Bet-Maacha, Janoach, Kedeš the Chacor a o phuva Gilead the Galileja, oda hin caľi phuv Naftali. A le manušen odarik odľigenďa andre Asirija.

³⁰Andro bišto (20.) berš, sar kraľinelas le Uzzioskero čhavo Jotam, le Eloskero čhavo o Hošea pes vzburinďa pro Pekach a murdarďa les. Sar o Hošea les murdarďa, ačhiľa pal leste kraľis.

³¹Savore aver veci, so kerďa o Pekach, hin pisimen andro Zvitkos le Izraelike Kraľengero.

³²Sar andro Izrael kraľinelas o Pekach, le Remaljoskero čhavo, dujto berš, andre Judsko ačhiľa kraľis o Jotam, le Uzzioskero čhavo.

³³Sas leske bišupandž (25) berš, sar ačhiľa kraľis, a andro Jeruzalem kraľinelas dešušov berš. Leskeri daj sas e Jeruša, le Cadokoskeri čhaj.

³⁴O Jotam kerelas oda, so sas le RAJESKE pre dzeka, avke sar leskero dad o Uzziah.

³⁵Ale o thana, kaj lašarenas le modlen, na sas zňičimen a o manuša pre lende mek furt obetinenas a labarenas o kaďidlos. O Jotam ačhaďa the e Upruňi Brana andro Chramos.

³⁶Savore aver veci, so kerďa o Jotam, hin pisimen andro Zvitkos le Judske Kraľengero.