2 HANUA PAVAPAVADIA 15:8-36

⁸Asaria, Iuda pavapavana, ena lohia laḡanina ihatoiahui-taurahanina ai, Sekaria Ieroboam ese Israel e lohiaia Samaria ai, hua tauratoi hona.

⁹Ia na Iehova vairanai e kara havara, senena heḡeregeredia; Ieroboam Nebata ena kara dika, Israel taudia e hakaradia dikalai ḡaudia na se rakatanidia.

¹⁰Salumu Iabese ese ia iala-masena dalana e tahua, bena Ibleama ai e botaia hekida diho, e alaia mase; bena ia gabuna ai e lohia.

¹¹Sekaria ena kara oredia sivaraidia na Israel Pavapavadia Sisigadia Bukana ai vada e hetore.

¹²Ina na Iehova ena gwauhamata, ia ese Iehu e gvau henia hamata, eto, Oi garamu na Israel teronona ai bae helai ela bona uru ihahanina. Bena unu vada e vara toma.

¹³Usia, Iuda pavapavana, ena lohia laḡanina ihatoiahui-taurahani-tana ai, Salumu Iabese na e lohia matama; Samaria ai e lohia, hua tamona mo.

¹⁴Bena Menaheme Gadi na Tirisa amo ema, Samaria ai e kau, bena ia ese Salumu Iabese e botaia hekida diho, e alaia mase Samaria ai; bena ia gabuna ai e lohia.

¹⁵Salumu ena kara oredia bona ena ala-ala karana sivaraidia na Israel Pavapavadia Sisigadia Bukana ai vada e hetore.

¹⁶Una negana ai Menaheme ese Tapua hanuana bona lalona taudia iboudiai bona tanona idoinai, Tirisa amo e laomu, na e habuadia tari; badina be hanua na asie kehoa ia ena, una dainai e habuaia tari. Bona rogorogo hahinedia iboudiai una hanua lalonai ia ese e dapadia.

¹⁷Asaria, Iuda pavapavana, ena lohia laḡanina ihatoiahui-taurahani-tana ai, Menaheme Gadi ese Israel e lohiaia matama. Ina na laḡani gwauta Samaria ai e lohia.

¹⁸Iehova vairanai e kara havara; ena dina iboudiai Ieroboam Nebata ena kara dika, Israel taudia e hakaradia dikalai ḡaudia, na se rakatanidia.

¹⁹Pulu, Asuria pavapavana, ese Israel tanona e tuari henia; bena Menaheme ese silver talent daha-ta Pulu e henia, pavapava dagina ai do baine hanohoa davana.

²⁰Menaheme ese Israel taudia edia amo una moni na taḡa taudia iboudiai ta ta ediai silver sekeledia imahui imahui amo e abi bagubagu, Asuria pavapavana baine henia totona. Taunabunai, Asuria pavapavana e lou, Israel tanona ai se noho.

²¹Menaheme ena kara oredia, e kara karadia iboudiai, sivaraidia na Israel Pavapavadia Sisigadia Bukana ai e hetore, ani?

²²Bena Menaheme na tubu tama dekediai e mahuta; ia natuna Pekahia na ia gabuna ai e lohia.

²³Asaria, Iuda pavapavana, ena lohia laḡanina iha-imahuina ai, Pekahia Menaheme ese Israel e lohiaia matama Samaria ai; ena lohia laḡanidia na rua hona.

²⁴Iehova vairanai e kara havara; Ieroboam Nebata ena kara dika, Israel taudia e hakaradia dikalai gaudia, na se rakatanidia.

²⁵Peka Remalia, ena tuari biaguna ta, na Gilead taudia imahui ida e henega bou, ia iala-masena totona; bena idia ese Samaria ai e alaia mase, hanua pavapavana ena ruma laloma daiutuna e haginia tutuka-tutuka ḡauna lalonai. Ia ese e alaia mase, bena gabuna ai e lohia.

²⁶Pekahia ena kara oredia, e kara karadia iboudiai, sivaraidia na Israel Pavapavadia Sisigadia Bukana ai e hetore.

²⁷Asaria, Iuda pavapavana, ena lohia laḡanina iha-imahui-ruana ai, Peka Remalia ese Israel e lohiaia matama, Samaria ai. Ena lohia laḡanidia na ruahui.

²⁸Ia na Iehova vairanai e kara havara; Ieroboam Nebata ena kara dika, Israel taudia e hakaradia dikalai ḡaudia, na se rakatanidia.

²⁹Peka, Israel pavapavana, ena nega ai Tiglata-pilesere, Asuria pavapavana, ema. Ia ese lono bona Abele-bete-maka bona lanoa bona Kede bona Hasoro bona Gilead bona Galilea, bona Napatali tanona idoinai, na tuari ai e abidia; bona unu gabu taudia na e ḡuidia, Asuria e laohaidia.

³⁰Bena Hosea Elaha ese Peka Remalia iala-masena dalana e tahua; bena e botaia hekida diho, e alaia mase; bena ia gabuna ai e lohia, Iotama Usia ena lohia laḡanina iharuahuina lalonai.

³¹Peka ena kara oredia, e kara karadia iboudiai, sivaraidia na Israel Pavapavadia Sisigadia Bukana ai e hetore.

³²Peka Remalia, Israel pavapavana, ena lohia laḡanina iharuana ai, lotam Usia, Iuda pavapavana, e lohia matama.

³³E lohia matama negana ai ena mauri laḡanidia na ruahui-ima; ena lohia laḡanidia na gwauta-tauratoi Ierusalem ai. Sinana ladana be Ierusa; ia na Sadok natuna hahinena.

³⁴Ia na Iehova vairanai e kara maoromaoro, tamana Usia ena kara iboudiai hegereḡeredia ai e kara.

³⁵Ḡau tamona, atai gabudia helaḡadia na se abidia oho; taunimanima na dounu boubou karadia e karava bona muramura mai bonadia e gabuva unu atai gabudia ai. Ia ese Iehova ena dubu atai kahana ikoukouna e karaia.

³⁶Iotam ena kara oredia, e kara karadia iboudiai, sivaraidia na Iuda Pavapavadia Sisigadia Bukana ai e hetore, ani?