2 KING TAUDIA 15:8-36

⁸Usaia, Iuda ena king, ena lohia lagani 38 lalonai, Sekaraia Ieroboama ese Israela ena king dagi ia hamatamaia, bona hua 6 lalonai Samaria dekenai ia lohia karaia.

⁹Sekaraia Ieroboama ese iena tamana bona tubuna bamona ia karaia. Ia ese Lohiabada ena vairanai ia kara dika, bona ia ese Ieroboama Nebata ena kara dika, unai dekena amo Israela taudia ia hakererea kara dikana, ia karaia noho.

¹⁰Salumu Iabese ese Sekaraia do ia hamasea dalana ia tahua, bona Ibileama dekenai Salumu ese Sekaraia ia alaia mase. Salumu ese king dagi ia abia, Sekaraia ena gabu dekenai.

¹¹Sekaraia ena kara orena ena sivarai be Israela Ena King Edia Sivarai Buka lalonai idia torea vadaeni.

¹²Unai dainai Lohiabada ena gwauhamata, ia ese Iehu dekenai ia gwauraia gwauhamata, be momokani ia vara, ia gwau, “Oiemu natuna bona tubuna ese Israela ena king dagi do idia abia ela bona uru 4.”

¹³Usaia, Iuda ena king, ena lohia lagani namba 39 lalonai, Salumu Iabese ese Israela ena king dagi ia abia, bona hua tamona sibona Samaria dekenai ia lohia karaia.

¹⁴Vadaeni Menahemo Gadi be Tirisa dekena amo ia mai, Samaria dekenai ia ginidae, bona ia ese Salumu Iabese ia alaia mase. Menahemo ese king dagi ia abia, Salumu ena gabu dekenai.

¹⁵Salumu ena kara orena, bona iena alaia kara ena sivarai be Israela Ena King Edia Sivarai Buka ena lalonai idia torea vadaeni.

¹⁶Unai Menahemo Gadi ese Tirisa dekena amo ia raka mai neganai, Tapua hanua taudia ese ia totona edia magu iduara idia kehoa lasi dainai, ia ese Tapua ia tuari henia. Menahemo ese Tapua hanua, mai ena tano, bona ena noho taudia ibounai ia hadikaia ore. Menahemo ese danu Tapua ena rogorogo hahine taudia ibounai edia bogana ia utua parara.

¹⁷Usaia, Iuda ena king, ena lohia lagani namba 39 lalonai, Menahemo Gadi ese Israela ena king dagi ia abia, bona lagani 10 lalonai Samaria dekenai ia lohia karaia.

¹⁸Menahemo Gadi ese Lohiabada ena vairanai ia kara dika, bona ia ese iena king dinadia ibounai lalonai Ieroboama Nebata ena kara dika, unai dekena amo Israela taudia ia hakererea kara dikana, ia karaia noho.

¹⁹Pulu, Asuria ena king ese Israela ia tuari henia. Vadaeni Menahemo ese siliva moni ena metau 34,000 kilogaram Pulu dekenai ia henia, Pulu ese do ia durua, bona Menahemo ese king dagi do ia abia noho totona.

²⁰Menahemo ese Israela taudia dekena amo unai moni ia abia dalana, be moni momo taudia ibounai ia gwauraia, idia ta ta ese siliva moni 50 idia henia, bona idia haboua, Asuria ena king do ia abia totona. Vadaeni, moni ia abia dainai, Asuria king ia giroa lou, Israela ena tano dekenai ia noho lasi.

²¹Menahemo ena kara orena, iena kara ibounai, be Israela Ena King Edia Sivarai Buka lalonai idia torea.

²²Vadaeni Menahemo ia mase, bona idia guria, bona iena gabu dekenai, iena natuna tau, Pekahaia ese king dagi ia abia.

²³Usaia, Iuda ena king, ena lohia lagani namba 50 lalonai, Pekahaia Menahemo ese Israela ena king dagi ia abia, bona lagani rua sibona Samaria dekenai ia lohia karaia.

²⁴Pekahaia Menahemo ese Lohiabada ena vairanai ia kara dika, bona ia ese Ieroboama Nebata ena kara dika, unai dekena amo Israela ia hakererea kara dikana, ia karaia noho.

²⁵Peka Remalaia, Pekahaia ena tuari biaguna ta, be Gileada taudia 50 danu idia hereva hebou, Pekahaia do idia alaia mase totona. Vadaeni idia ese Samaria dekenai Pekahaia idia alaia mase. Idia alaia mase gabuna be king ena ruma ena lalona momokani daiutuna, idia haginia auka masemase gauna, ena lalonai. Peka ese ia alaia mase, vadaeni ia ese king dagi ia abia, Pekahaia ena gabuna dekenai.

²⁶Pekahaia ena kara orena, iena kara ibounai, be Israela Ena King Edia Sivarai Buka ena lalonai idia torea vadaeni.

²⁷Usaia, Iuda ena king, ena lohia lagani namba 52 lalonai, Peka Remalaia ese Israela ena king dagi ia abia, bona lagani 20 lalonai Samaria dekenai ia lohia karaia.

²⁸Peka Remalaia ese Lohiabada ena vairanai ia kara dika, bona ia ese Ieroboama Nebata ena kara dika, unai dekena amo Israela ia hakererea kara dikana, ia karaia noho.

²⁹Peka be Israela ena king neganai, Asuria ena king, Tigolata Pilesere ese Israela ia tuari henia. Ia ese inai hanua ia halusia bona ia abia: Iono, Abele Bete Maka, Ianoa, Kedesi, Hasoro, Gileada, Galilea, bona Napatali tano ibounai. Ma Tigolata ese unai Israela hanua edia taudia ia guia, Asuria dekenai ia abidia lao.

³⁰Vadaeni Hosea Elaha ese Peka Remalaia do ia alaia mase dalana ia tahua, bona Hosea ese Peka ia alaia mase. Unai dainai Hosea ese king dagi ia abia, Peka ena gabu dekenai. Unai kara be Iotama Usaia, Iuda ena king ena lohia lagani namba 20 lalonai ia vara.

³¹Peka ena kara orena, iena kara ibounai, be Israela Ena King Edia Sivarai Buka ena lalonai idia torea vadaeni.

³²Peka Remalaia, Israela ena king, ena lohia lagani iharuana lalonai, Iotama Usaia ese Iuda ena king dagi ia hamatamaia.

³³King dagi ia hamatamaia neganai, Iotama ena mauri lagani be 25, bona lagani 16 lalonai Ierusalema dekenai ia lohia karaia. Iotama ena sinana be Ierusa, ia be Sadoka ena natuna hahine.

³⁴Iotama ese Lohiabada ena vairanai ia kara maoromaoro. Ia ese iena tamana Usaia ena kara ibounai hegeregerena ia karaia.

³⁵To gau tamona, ia ese ataiai idia noho tomadiho gabudia ia kokia lasi. Bona taunimanima ese unai gabudia dekenai boubou karadia idia karaia noho, bona mai bonana muramura idia gabua noho. King Iotama ese Lohiabada ena Dubu Helaga ena mirigini kahana magu ena iduara ia haginia.

³⁶Iotama ena kara orena, iena kara ibounai, be Iuda Ena King Edia Sivarai Buka ena lalonai idia torea vadaeni.