2 Kings 15:8-36

⁸U lan e duw ni guyey nge meruk ko gagiyeg rok Uzziah ni Pilung nu Judah, me mang Zekariah nib mo’on ni fak Jeroboam e pilung u Israel, me yog e thin u lan yu Samaria ni nel’ e pul.

⁹Ma ku bod e pi’in yad ba m’on rok, ni denen nib togopluw ngak SOMOL. Ni i rin’ e tin kireb ni ki rin’ Jeroboam ni Pilung nib mo’on ni fak Nebat, ni waliy yu Israel nga fithik’ e denen.

¹⁰Me Shallum nib mo’on ni fak Jabesh e makath nib togopluw ngak Zekariah ni Pilung, me li’ nge yim’ u Ibleam, me yan nga luwan nge mang pilung.

¹¹Gubin e tin ki rin’ Zekariah e kani yoloy ngalan e babyor ni Chepin e Pilung nu Israel.

¹²Ma aram me yib i m’ug nib riyul’ fare bugithin ni micheg SOMOL ngak Jehu ni Pilung, ni fa’ani ga’ar: “Pi’in owchem i yib nge mada’ ko bin aningeg e mfen e bay ur manged pilung nu Israel.”

¹³U lan e duw guyey nge mereb ko gagiyeg rok Uzziah ni Pilung nu Judah, me mang Shallum nib mo’on ni fak Jabesh e pilung u Israel, me yog e thin u Samaria ni ta’reb e pul.

¹⁴Me yan Menahem nib mo’on ni fak Gadi u Tirzah nga Samaria, nge li’ Shallum nge yim’, me yan nga luwan nge mang pilung.

¹⁵Gubin e tin kabay ni rin’ Shallum nib mu’un murung’agen e makath ni tay ngay, e go’ kani yoloy ngalan e babyor ni Chepin e Pilung nu Israel.

¹⁶Ngiyal’nem e chuw Menahem u Tirzah me kirebnag fare binaw nu Tappuah, nge girdi’ riy nge ga’ngin yang e binaw u charen, ni bochan e de wenig fare binaw ngak. Mus ngak e pi’in ppin nib diyen ma yi go’ sey e yal rorad.

¹⁷U lan e duw ni guyey nge mereb ko gagiyeg rok Uzziah ni Pilung nu Judah, me mang Menahem nib mo’on ni fak Gadi e pilung nu Israel, me yog e thin u Samaria ni ragag e duw.

¹⁸Me denen nib togopluw ngak SOMOL, nge mada’ ko ngiyal’ ni yim’ riy nde pag e tin kireb ni i rin’ Jeroboam ni Pilung nib mo’on ni fak Nebat, ni ir e waliy yu Israel nga fithik’ e denen.

¹⁹Me Tiglath Pileser, ni ir e pilung u Assyria, e yib i mael ngak yu Israel, me pi’ Menahem guyey nge meruk e ton e silber ngak ni nge fel’ u wan’ nge ayweg Menahem nge pi’ gelngin ni nge gagiyegnag fare nam.

²⁰I fek Menahem e pi salpiy ney rok e pi pumo’on ni bfel’ rogorad u lan yu Israel ni i tay gelngin ngorad ni nge bagyad ma wugem e salpiy ni silber ni nge pi’. Ma aram me sul Tiglath Pileser ko nam rok.

²¹Gubin e tin kabay ni rin’ Menahem e go’ kani yoloy ngalan e babyor ni Chepin e Pilung nu Israel.

²²Me yim’ min k’eyag, me Pekahiah nib mo’on ni fak e yan nga luwan nge mang pilung.

²³U lan e duw ni wugem ko gagiyeg rok Uzziah ni Pilung nu Judah, me mang Pekahiah nib mo’on ni fak Menahem e pilung nu Israel, me yog e thin u Samaria ni l’agruw e duw.

²⁴Me denen nib togoluw ngak SOMOL, ni i rin’ e n’en nib kireb ni i rin’ Jeroboam ni Pilung nib mo’on ni fak Nebat, ni ir e waliy yu Israel nga fithik’ e denen.

²⁵I Pekah nib mo’on ni fak Remaliah ni ir e ga’ ko fa raba’ i salthaw rok Pekahiah, e makath ngak wugem i pumo’on nu Gilead, ngan li’ Pekahiah nge yim’ u lan fare yoror ko naun ko pilung nu Samaria, me yan nga luwan nge mang pilung.

²⁶Gubin e tin i rin’ Pekahiah e go’ kani yoloy ngalan e babyor ni Chepin e Pilung nu Israel.

²⁷U lan e duw ni wugem nge l’agruw ko gagiyeg rok Uzziah ni Pilung nu Judah, me mang Pekah nib mo’on ni fak Remaliah e pilung nu Israel, me yog e thin u Samaria ni rliw’ e duw.

²⁸Me denen nib togopluw ngak SOMOL, i rin’ e kireb ni bod Jeroboam ni Pilung nib mo’on ni fak Nebat, ni ir e waliy yu Israel nga fithik’ e denen.

²⁹Ma ngiyal’ nib pilung Pekah me kol Tiglath Pileser ni ir e pilung nu Assyria fapi binaw nu Ijon, Abel Beth Maakah, Janoah, Kedesh, ngu Hazor, nge nug nu Gilead, Galilee, ngu Naftali, me fek e girdi’ nga Assyria ni kalbus.

³⁰U lan e duw ni 20 ko gagiyeg rok Jotham ni Pilung nu Judah, nib mo’on ni fak Uzziah, me makath Hoshea nib mo’on ni fak Elah nib togopluw ngak Pekah ni Pilung, me li’ nge yim’, me yan nga luwan nge mang pilung.

³¹Gubin e tin i rin’ Pekah ma yi go’ ni yoloy ngalan Chepin e Pilung nu Israel.

³²U lan e bin l’agruw e duw ko gagiyeg rok Pekah ni Pilung nu Israel nib mo’on ni fak Remaliah, me mang Jothan e pilung nu Judah nib mo’on ni fak Uzziah

³³ni rliw’ nge lal e duw yangren, me yog e thin u Jerusalem ni ragag nge nel’ e duw. Chitinngin e Jerusha, ni be’ ni bpin ni fak Zadok.

³⁴Miki rin’ e tin i rin’ e chitamngin ni Uzziah, ni Jothan e rin’ e tin nib m’agan’ SOMOL ngay.

³⁵Machane de gathay fa yungi tagil’ e meybil rok e pi’in ndar nanged SOMOL, ma girdi’ e dar talgad i pi’ e maligach nge incense ni yad be urfiy u rom. I Jotham e ireram e cha’ ni ngongliy fare Garog ni Lel’och ko fare Tempel.

³⁶Gubin e tin ki rin’ Jotham e go’ kani yoloy ngalan Chepin e Pilung nu Judah.