Падишаһлар «2» 15:8-36

⁸Йәһуда падишаһи Азарияниң сәлтәнитиниң оттуз сәккизинчи жилида, Йәробоамниң оғли Зәкәрия Самарийәдә Исраилға падишаһ болуп, алтә ай сәлтәнәт қилди.

⁹У ата-бовилири қилғандәк Пәрвәрдигарниң нәзиридә рәзил болғанни қилатти; у Исраилни гунаға путлаштурған Нибатниң оғли Йәробоамниң гуналиридин чиқмиди.

¹⁰Ябәшниң оғли Шаллум униңға қәст қилип, уни хәлиқниң алдида уруп өлтүрди вә униң орнида падишаһ болди.

¹¹Зәкәрияниң башқа ишлири һәм қилғанлириниң һәммиси «Исраил падишаһлириниң тарих-тәзкирилири» дегән китапта пүтүлгән әмәсмиди?

¹²Униң өлтүрүлүши Пәрвәрдигарниң Йәһуға: — Сениң оғуллириң төртинчи нәслигичә Исраилниң тәхтидә олтириду, дегән сөзини әмәлгә ашурди. Дәрвәқә шундақ болди.

¹³Ябәшниң оғли Шаллум Йәһуда падишаһи Азарияниң сәлтәнитиниң оттуз тоққузинчи жилида падишаһ болуп, Самарийәдә толуқ бир ай сәлтәнәт қилди.

¹⁴Гадиниң оғли Мәнаһәм Тирзаһдин чиқип, Самарийәгә келип, Ябәшниң оғли Шаллумни шу йәрдә уруп өлтүрди вә униң орнида падишаһ болди.

¹⁵Шаллумниң башқа ишлири, җүмлидин униң қәст қилишлири, мана «Исраил падишаһлириниң тарих-тәзкирилири» дегән китапта пүтүлгәндур.

¹⁶Шу чағда Мәнаһәм Типсаһ шәһиригә һуҗум қилип, у йәрдә туруватқанларниң һәммисини өлтүрди; у йәнә Тирзаһдин тартип униңға тәвә барлиқ зиминлирини вәйран қилди. Улар тән берип дәрвазини ачмиғини үчүн шәһәргә шундақ һуҗум қилдики, һәтта униңдики җими һамилдар аялларниң қарнини житип өлтүрди.

¹⁷Йәһуда падишаһи Азария сәлтәнитиниң оттуз тоққузинчи жилида, Гадиниң оғли Мәнаһәм Исраилға падишаһ болуп, Самарийәдә он жил сәлтәнәт қилди.

¹⁸У Пәрвәрдигарниң нәзиридә рәзил болғанни қилип, пүтүн өмридә Исраилни гунаға путлаштурған Нибатниң оғли Йәробоамниң гуналиридин чиқмиди.

¹⁹Асурийәниң падишаһи Пул Исраил зиминиға таҗавуз қилди; у вақитта Мәнаһәм: «Падишаһлиғимниң мустәһкәмлиги үчүн маңа ярдәм қилғайла» дәп униңға миң талант күмүч бәрди.   

²⁰Мәнаһәм Асурийәниң падишаһиға беридиған шу пулни Исраилниң һәммә бай адәмлиригә баҗ селиш билән алди; у һәр биридин әллик шәкәл күмүч алди. Шуниң билән Асурийәниң падишаһи қайтип кәтти вә бу зиминда туруп қалмиди.

²¹Мәнаһәмниң башқа ишлири һәм қилғанлириниң һәммиси «Исраил падишаһлириниң тарих-тәзкирилири» дегән китапта пүтүлгән әмәсмиди?

²²Мәнаһәм ата-бовилириниң арисида ухлиди вә оғли Пәкаһия орнида падишаһ болди.

²³Йәһуда падишаһи Азарияниң сәлтәнитиниң әллигинчи жилида, Мәнаһәмниң оғли Пәкаһия Самарийәдә Исраилға падишаһ болуп, икки жил сәлтәнәт қилди.

²⁴У Пәрвәрдигарниң нәзиридә рәзил болғанни қилип, Исраилни гунаға путлаштурған Нибатниң оғли Йәробоамниң гуналиридин чиқмиди.

²⁵Вә униң сәрдари Рәмалияниң оғли Пикаһ униңға қәст қилип уни Самарийәдә, падишаһ ордисидики қәләдә өлтүрди; шу ишта Аргоб билән Арийә вә әллик Гилеадлиқ киши Пикаһ тәрәптә турди; у Пәкаһияни өлтүрүп униң орнида падишаһ болди.

²⁶Пәкаһияниң башқа ишлири һәм қилғанлириниң һәммиси болса, мана «Исраил падишаһлириниң тарих-тәзкирилири» дегән китапта пүтүлгәндур.

²⁷Йәһуданиң падишаһи Азарияниң сәлтәнитиниң әллик иккинчи жилида, Рәмалияниң оғли Пикаһ Самарийәдә Исраилға падишаһ болуп, жигирмә жил сәлтәнәт қилди.

²⁸У Пәрвәрдигарниң нәзиридә рәзил болғанни қилип Исраилни гунаға путлаштурған Нибатниң оғли Йәробоамниң гуналиридин чиқмиди.

²⁹Исраилниң падишаһи Пикаһниң күнлиридә Асурийәниң падишаһи Тиглат-Пиләсәр келип Ийон, Абәл-Бәйт-Маакаһ, Яноаһ, Кәдәш, Һазор, Гилеад, Галилийә, җүмлидин Нафталиниң пүткүл зиминини ишғал қилип, шу йәрдики хәлиқни тутқун қилип, Асурийәгә елип барди.

³⁰Әлаһниң оғли Һошия Рәмалияниң оғли Пикаһға қәст қилип уни өлтүрди. Уззияниң оғли Йотамниң сәлтәнитиниң жигирминчи жилида, у Пикаһниң орнида падишаһ болди.

³¹Пикаһниң башқа ишлири һәм қилғанлириниң һәммиси болса, мана «Исраил падишаһлириниң тарих-тәзкирилири» дегән китапта пүтүлгәндур.

³²Исраилниң падишаһи Рәмалияниң оғли Пикаһниң сәлтәнитиниң иккинчи жилида, Уззияниң оғли Йотам Йәһудаға падишаһ болди.

³³У падишаһ болғанда жигирмә бәш яшқа киргән болуп, Йерусалимда он алтә жил сәлтәнәт қилди. Униң анисиниң исми Йәруша еди; у Задокниң қизи еди.

³⁴Йотам атиси Уззияниң барлиқ қилғанлиридәк Пәрвәрдигарниң нәзиридә дурус болғанни қилатти.

³⁵Пәқәт «жуқури җайлар»ла йоқитилмиди; хәлиқ йәнила «жуқури җайлар»ға чиқип қурбанлиқ қилип хушбуй яқатти. Пәрвәрдигарниң өйиниң «Жуқириқи дәрваза»сини ясиғучи шу еди.

³⁶Йотамниң башқа ишлири һәм қилғанлириниң һәммиси «Исраил падишаһлириниң тарих-тәзкирилири» дегән китапта пүтүлгән әмәсмиди?