Text copied!
CopyCompare
Kagi Ka Manama - 2 Corinto

2 Corinto 6

Help us?
Click on verse(s) to share them!
1Su sikami tô mga ágsuguánnán katô Manama, ágpédu-édu ké gó ákniyu na yakó ágpanámdám na ándà ágpulusán katô dakál ginawa ka Manama na igtanggap yu tikud tun kandin.
2Su mà katô kagi ka Manama na igsulat, “Tô igdunggù dán tô nángngà timpo na igsalin ku, igpaminág ku gó sikuna. Tô igdunggù dán tô nángngà álló na tábbusán ka, igtabangan ku gó sikuna.” Purisu paminág kó kanak! Ikataganà dán gó tô Manama tumabang ákniyu! Ni gó tô nángngà timpo ébô tábbusán kó ka Manama!
3Kakalyag dé na dì gó ágkasawé tô mga áglumun dé agó duwán manubù na dì mamaké.
4Asal su mga ágsuguánnán ké ka Manama, ágpakita ké na madigár gó tô langun áglumun dé. Agad marapung tô mga kahirapan na inókitan dé, ágtiis ké gó.
5Ilagpás ké, ipriso ké, asta isamuk ké. Duwán timpo na tuu ké ibállé asta ipuló ké tingód katô kalumu dé, asta ándà ágkakan dé.
6Ágpasóddórán dé na mga ágsuguánnán ké ka Manama su ándà salà na áglumun dé, igbággayan ké ka kagpáttan, mallayat é ginawa dé, médu-édu ké, dini áknami tô Ugis Espiritu, asta bánnal ké ágginawa katô mga unawa dé.
7Kabánnalan dád tô gulit-ulitán dé. Duwán katulusan ka Manama dini áknami. Tô katanggap ka Manama áknami na nángngà tun ta saruwan din iring na laniban asta kalasag dé ébô manalu ké katô mga usig dé.
8Duwán ágpabantug áknami, duwán ágpayayyà áknami, duwán ágkagi ka madat áknami, asal duwán ágdurung áknami. Duwán ágkagi na bulalón ké, asal bánnal gó tô gulit-ulitán dé.
9Agad duwán na dì ágrespeto áknami, asal ágkilalan ké katô langun. Agad inalayun ké ágmatayan, asal manté ké pô. Agad ágsupakan ké, asal ándà ké pa matayi.
10Agad duwán ranu katô pusung dé, asal inalayun duwán dayó dé. Agad ágkayù-ayuan ké, asal marapung tô mga manubù na ágbággayan dé ka kadigárran tikud tun ta Manama. Agad ándà palang kaduwánnan dé, asal ándà ké kakulangi.
11Mga taga Corinto, ándà palang igbulun dé ákniyu, su dakál gó tô ginawa dé ákniyu.
12Atin ka duwán kassaan katô ginawa ta, ánnà su délák tô ginawa dé ákniyu, asal sikiyu tô duwán délák ginawa áknami.
13Igkagiya ákniyu iring na kanak mga gabatà. Ginawayi ké iring katô kaginawa dé ákniyu.
14Yakó ágpasábbad tun ta mga dì ágpamaké, su dì mému ka ágpadumaé tô manubù na igtanggap ka Manama na nángngà tun ta saruwan din asta tô masalà-salà! Dì ágpatákkássé tô kappawaan asta tô kangittángngan.
15Dì ágpanunugé si Cristo asta si Maibuyan. Purisu dì pagsik ágpasábbadé tô ágpamaké asta tô dì ágpamaké.
16Dì mému ka duwán mga ágmanaman tun ta templo ka Manama. Tô langun ta na ágpampamaké, sikita gó tô templo na góddóan ka manté Manama! Su igkagi tô Manama sayyan, “Móddô a duma kani mga manubù, asta dumuma a kandan. Sakán tô Manama dan, asta sikandan tô kanak mga manubù.”
17“Iwà kó tikud tun ta mga dì ágpamaké kanak. Liliyi yu sikandan. Yakó gilabut katô agad ándin maripà, Asta tanggapán ku sikiyu, mà katô Áglangngagán.”
18“Mémuwa na Ámmà yu, asta mému kó na mga gabatà ku. Tô gó tô igkagi katô Áglangngagán na matulus.”