Text copied!
CopyCompare
GOT WENG ABEM Alokso Abino Kalin - 2 Kodin

2 Kodin 6

Help us?
Click on verse(s) to share them!
1Nuka Got so makuw wok fakudin kinim kayo nuka munyamuwo, kiba min gelemin Got ami dim kudusidiw uyo kudálodiw banim keidin kala. Watawo kaleyo bá, kiba alo bo kudáliw kaí, be ituwa kudálokabiw kala.
2Got ami godin weng uyo bako nadule, “naka ulum atan kal kimi gánin bo kidi nadinade watakáyamin atan kal dakoyamasi.” Kale naka bakoyamon, ulum atan ade kamane kal ade watakáyamin atan ade kamane kal ka.
3Num aket nuka num wok fakubuduw bewok masi wanang kinim mafak so mak atamodiwo kalbuw, kayo nuka wanang kinim gal sasonim kuyam leiw atiyamoduwo kanabuw.
4Kata num kukuw kanabuw be kuku nuka Got alam wok fakudino kalbuw, be ufek ufek fitin dukum kukayabidiw bo keno kalin so idum dukum kudamin so kál funin so uyo dakbu kufo kudew tabesuw.
5Kale kinim ika yanfau bom imadew tam kalabus am imti bidiw, kinim gu madik itane num kus itam yanfaumsiw, wok dukum kuw fit bom naduwe imin tew teinámin so kinok dudongin banim keiyámin so uyo kanamusuw.
6Kata nuka ulum kanom baim banim leiw kidel abo biyámin so nulum kal keimin so dakbu teinámin so nulum weng yáw bakanin so be nuka Got Sinik Abem dim kukumusuw ade atin kudawa kudawin tatun so
7weng tatun kuw bakanin so Got ami kitid dim teinámin so uta kanamusuw. Kale Got kukuw kidel tuw uta numi wasi ginanin gelei bil. Kale nuka umi tuw nulum kál ged mo naduwe wasi im adim isko unebuw kala.
8Kinim wanang madik ika num win kufáyamábiw, kata madik itane fatom dawkáyamábiw. Kinim wanang madik ika num sung kidel bakamaliw, kata madik itane weng fine dawkáyamábiw ade kinim wanang madik ika bako, ‘nuka ibakanino,’ yakanaliw, kata nuka weng tatun kuw bakanaluw ka.
9Ade kinim wanang madik ika bakoyam, “ika win finin banim.” Yakanábiw, kata wanang kinim madik itane itam, ika win finino, yakanaliw. Nuka mewso fikalongin keibuw, kata kiba itamiw, nuka ulum kano kaunsin buduw ka, kalbiw, nuka sok gei imusiw, kata yanbidongin banim keisiw.
10Nuka aket mafak mafak auyamába, kata nuka atin kalfalábuw. Nuka win banim keiyábuw, kata nuka wanang kinim kanoyamuw afan kalin kitid seng kuduyábiw. Nuka ufek ufek banim, kata Got ami ufek ufek uta seng fakubuduw ko.
11Nulum duw ifin Kodin abiw bidiw kiba, num weng dikal banim adik dakat bakoyamsuw ade num aket adik bámadá kuyamsuw.
12Num kim aket funin uyo kudálongin banim, kata kiwta num aket funin dako kudásiw ko.
13Kamane naka kiba atin nalam muduw taw keiyam nadi weng bakayabi ko. Naka dákadámiyo kiba numi aket dukum kuw dawkáyamábuw taw kibil num aket dukum kuw dawkáyamin kala.
14Kiba yak kan ita afan kalongin banim itaw kikiw bá kala, kale kiba iso wok makuw fakanin bá, watawo kaleyo bá, kidel so mafak so uyo alew kikiw makuw bá ade eidin so midilin so bidi ken alew kikiw makuw bá.
15Kadais so Mafakim so iyo alew makuw keidoliw banim. Ken kinim Kadais afan kalba ami aket fukanin be kinim afan kalongin banim ami aket fukanin taw keidomane?
16Got ami Yol am be, Got so ibakanin got so ken alew aket makuw keidoliw banim. Kale Got am Yol am ade nuta ka. Got ami godusa weng uyo bako nadule “naka ilim iwyak tem kal bom iliso ká bom nadi nata ilim Got keidokabi ika nalam kinim wanang keidokabiwo.” Kalesa.
17Ade Kamok dukum ayo bako, “wanang kinim bidi imadá maek kaek abe nadiwe kilimi uyo wanang kinim kidel kei nadiwe ufek ufek baim tabim mak malemamongin banim keidokabiw, beta naka bako, ‘kiba keno,’ yakokabi.
18Ade naka kimi kalaw keidokabi, á kiwtane nami muduw keidokabiw.” Kalesa.