Text copied!
CopyCompare
Kije Manido Odikido8in: Ocki Mazinaigan - 2 Konit

2 Konit 6

Help us?
Click on verse(s) to share them!
1Nina8it dac ka 8idji mikimomagidj Kije Manido, kipagosenimigom kidji ega 8ebinameg okitci ca8endjige8in kagi minigo8eg.
2Kije Manido mega ikido Omazinaiganikag: “Maiagotc apitc egi odjitciseg kidji 8abadainan nikije8adizi8in, kigi nodaon e aiamiean. Maiagotc apitc egi odjitciseg kidji ag8acimigo8an, kigi pi nda 8idjiin.” Mi ka ikidodj Kije Manido. Ki8idamonom dac e odjitciseg nogom ogajigag kidji 8abadai8edj okije8adizi8in. Mi oo8e nogom ogajiganig 8a ag8acimigo8eg Kije Manido.
3Ka8in ninada8enimasi8ananag a8iagog kidji odji anodj inenimigo8ag adi e todamag e mikimo8ag. Midac 8edji kitci k8ag8edjito8ag ega kidji kibitinagidj a8iag kidji teb8etag.
4Tiegodj, adigotc todamag, pijicig ni8i iji 8abadai8emin teb8e e anokita8agidj Kije Manido. Kabe dac nikitci cacibendananan, misa8adj e kitci kodagito8ag, misa8adj e kitci sanagendjigeiag, acitc misa8adj e kitci madjiseiag.
5Nigi miganigomin, nigi takonigomin, acitc nigi ma8inanigomin. Maia nigi ka8ana8izimin e kitci mikimo8ag, ka8in nidodji kackitosinanan kidji nibaiag, acitc nigi kitci mamida8askademin.
6Pekic dac misa8adj, ni8abadai8emin teb8e e anokita8agidj Kije Manido, e paiekideeiag, e 8abadai8eiag 8e8enda e nisidotamag teb8e8in, e cacibendamag, acitc e kije8adenimagid8a kodagiag. Ni8idjiogonan Mino Manido acitc teb8egotc nisagiananag a8iagog.
7Kije Manido niminigonan omacka8izi8in kidji paba tibadjimo8agidj teb8e8ini. Nik8aiak8adizimin, acitc mi iidi eji nak8ita8agid8a igi ka manenimigo8ag.
8Nandam a8iagog nimanadjiigonanag, kodagiag dac nimanazomigonanag. Nandam a8iagog nimin8adjimigonanag, kodagiag dac nimadji mikomigonanag. Nandam a8iagog ikido8ag: “Kikagina8ickim,” pekic dac niteb8emin.
9Nandam a8iagog ikido8ag: “Ka8in a8ian okikenimigosi8an,” pekic dac kakina a8iagog maia nikikenimigonanag. Mi maia tabickotc aja pecodj ke nibo8ag enadjimigo8ag, pekic dac kiabadj nipimadizimin. Nanigodin nipajacteogomin, ka8in dac 8in ninisigosimin.
10Nikackendamiigomin, misa8adj dac kiabadj nimina8azimin. “Kidimagizi8ag” nidinenimigomin, misa8adj dac ni8anadiziananag kodagiag. “Ka8in kegoni odaiasina8a” nidinenimigomin, misa8adj dac kakina kegon nitibendananan.
11Kina8a ni8idji8agananag Konit ka tajikeieg! Kitci 8e8enda kigi aiamiigom. Kikitci sagiigom acitc kikitci apitenimigom.
12Ka8in kidodji poni sagiigosim. Kina8a dac 8in, ka8in ki8i sagiijisinam.
13Tabickotc nina8it ka todamag iji todamok, sagiicinam maiagotc ka iji sagiigo8eg. Tabickotc nidabinodjijimag kidineniminom, mi 8edji aiamiinagok iidi.
14Ka8in 8in tabickotc igi8e ega ka teb8eta8a8adjin Jesosan kitidisim. Ka8in dac 8ina8akag iji mama8akonidikegon. A8iag ka k8aiak8adizidj acitc a8iag ka 8agackizidj, kadagi iji mama8ino8ag na? A8iag 8asea8inikag ka iji pimadizidj acitc a8iag ka iji kacki tibikanig ka iji pimadizidj, kadagi mino 8idji8idi8ag na?
15Kadagi nakomidi8ag na Jesos Christ acitc madji manido? A8iag na ka teb8etag, ogagi mino 8idji8an ini8e ega ka teb8etamindjin? Ka8in odji pejig kada minosesinon ii!
16Ka8in odji pejig inendag8asinon kidji asagani8i8adj manidokanag Kije Manido okitci aiamiemigi8amikag. Kina8it dac Kije Manido ka pimadizidj okitci aiamiemigi8am kidijinagozimin. 8adan mega oo8eni ka ikidodj Kije Manido: “Niga 8idji tajikemag igi anicinabeg, acitc niga paba 8idji8ag. Ninikag kada iji Okije Manidomi8ag acitc niga odanicinabemi8age.”
17Midac 8edji ikidodj ka Tibendjigedj: “Naganikog igi a8iagog, acitc ka8in 8idji8akegonig. Ka8in odji pejig pamendakegon 8egonenigotc ka 8inendag8ag, kiga odapininom dac.
18Ninikag kiga iji odadamim, acitc nin igi nig8izisag acitc nidanisag kiga ijinikaninom.” Mi ka ikidodj ka Tibendjigedj ma8adji ka kitci macka8izidj.