Text copied!
CopyCompare
Bulu ntam pɔpwɛ; Nkonya - 2 Korintofɔ

2 Korintofɔ 6

Help us?
Click on verse(s) to share them!
1Anɩa Bulunyɔ anɩdɛ́ agyʋ́má yɔ. Mʋ́ sʋ anɩdɛ́ mlɩ kokóli anɩaa, mlɩmáha Bulu awɩtɔlɛ amʋ́ʋ́ mlɩlanyá ámʋ ɩbwɛ kpaalɩ.
2Tsúfɛ́ Bulu lɛ́blɩ́ mʋ asʋn wanlɩ́nhɛ́ amʋtɔ ɔbɛ́ɛ, “Brɛ́á mɩ́ brɛ́ lɔfʋn ánɩ́ nówun ahá nwɛ a, nonu mlɩ ɔmɛ. Mɩ́ nkpa ɔhɔ́kɛ amʋ ɩlɔfʋn ɛ́ á, negyi mlɩ bʋalɛ.” Mlɩnu! Brɛ́ ámʋ láfʋn a. Ndɛ gyí mlɩ nkpa ɔhɔ́kɛ amʋ nɩ!
3Anɩmédékléá abétin ɔhaa anɩ Wíe wá ba ɔkpa, mɛ́nɩ ɔhaa méenya asʋansʋ blɩ́ tsú anɩ agyʋ́má ánfɩ ɩwɩ.
4Mboún anɩ bwɛhɛ́ fɛ́ɛ́tɔ́ a, anɩtɛlɛ́ súná ánɩ́ Bulu asúmbi anɩgyí ɔnɔkwalɩsʋ. Anɩtotomi anɩ ɩwɩɔsɩn, anɩ ɩkplán pʋ́ anɩ asʋn wunhɛ kugyíkʋ ɛ́tɔ́.
5Bɛpɩtɩ́ anɩ atɔ́, wá anɩ obu, bɛkpa bun anɩsʋ dá anɩ. Anɩlɔ́yɔ agyʋ́má ánɩ́ ɩdʋn anɩ. Nkɛkʋ́ anɩtamadɩ́dɩ, nkɛkʋ́ ɛ́ anɩtetsíá akʋ́n.
6Anɩlɔ́tsʋn anɩ tsiátɔ́sʋ lɛ́ súná ánɩ́ ifin kʋkʋ má anɩ ɩwɩ. Anɩyin asʋ́n, anɩtenyá ɩklʋn. Anɩbʋ awɩtɔlɛ, Ɔŋɛ Wankɩ́hɛ́ amʋ tsie anɩtɔ. Anɩtɛhɩ́ɛ́ dwɛ́ ahá ɛ́ tsú anɩ klʋntɔ.
7Anɩtɛdá Bulu asʋ́n ámʋ ɔkan ɔnɔkwalɩsʋ pʋ́ Bulu túmitɔ. Yilébwɛ gyí ɩsá-akɔtɔ́á anɩdɛ́pʋkɔ́ ahá, anɩdɛ́pʋtin anɩ ɩwɩ ɛ́.
8Akʋ bʋtobú anɩ, akʋ ɛ́ bʋtɔsʋ́pa anɩ. Akʋ bʋtɛkánfʋ́ anɩ, akʋ ɛ́ bʋtɔkpɔ́ɩ́ anɩ. Anɩ asʋ́n da ɔkpa, támɛ bʋdɛ anɩ bu afunupʋ.
9Fɛ́ anɩmégyí tɔtɔ ahá ansɩ́tɔ́, támɛ ahá anɩgyí. Fowun anɩ fɛɛ anɩdéwu nɩ́, támɛ kɩ, anɩbʋ nkpa. Bʋtesian anɩ mɔ, támɛ anɩtɛdálɩ mʋ́tɔ́.
10Anɩbʋ ɩwɩɔsɩntɔ, támɛ Kristo sʋ anɩbʋ ansigyítɔ́. Ahiánfɔ anɩgyí, támɛ anɩlahá ahá bamlí ɩwɩ anyapʋ́. Anɩmá tɔtɔ, támɛ anɩbʋ tógyítɔ́ Kristo sʋ.
11Korintofɔ! Anɩtɛhɩ́ɛ́ nyá mlɩ ɩwɩ ansigyí, lɛ́ ɩwɩtɔ bláa mlɩ asʋ́n.
12Anɩtamakʋ́lá ɩwɩ mlɩsʋ, támɛ mlɩ mʋ́ mlɩdɛ́ ɩwɩ kʋlá anɩsʋ.
13Ndɛ mlɩ asʋ́n bláa fɛ́ mɩ́ onutó abí. Mlɩ ɛ́ mlɩmápʋ asʋansʋ ŋáín anɩ.
14Mlɩa ɔmátɔ́fɔ mlɩmágyi mba. Nkálɩ yilé mʋ́a lalahɛ bɛ́talɩ́ tsíá tsukʋlɛ? Nkálɩ wankɩ mʋ́a oklún ɛ́ bɔ́bwɛ kʋlɛ?
15Kristo mʋa Ɔbʋnsám bɛ́talɩ́ bwɛ́ agywɩɩn kʋlɛ? Ɛkɛkɛɛkɛ! Nkálɩ ohógyipʋ mʋa ɔhá ánɩ́ ɔma hógyi bɔ́bwɛ kʋlɛ?
16Nkálɩ bɔ́tswɛ ɔkpɩ Bulu ɔtswɛ́kpa? Tsúfɛ́ anɩgyí Bulu Ɔkɩankpapʋ amʋ ɔtswɛ́kpa nɩ. Igyi fɛ́ alɩá bɔwanlɩ́n wá Bulu asʋ́n ámʋtɔ bɛɛ, “Bulu ɔbɛ́ɛ, ‘Nétsiá mɩ́ ahátɔ, mɩ́a amʋ́nyɔ abɛ́natɩ́. Nɔ́bwɛ amʋ́ Bulu, amʋ́ ɛ́ bɔ́bwɛ mɩ́ ahá.’ ”
17Bɔwanlɩ́n wá Bulu asʋ́n ámʋtɔ ɛ́ bɛɛ, “Anɩ Wíe Bulu ɔbɛ́ɛ, ‘Mlɩdalɩ amʋ́tɔ́, amlɩmaɩn ɩwɩ lɛ amʋ́sʋ́.’ ” Bɛtrá wanlɩ́n wá Bulu asʋ́n ámʋtɔ bɛɛ, “Mlɩmáwa ɩbɩ lalahɛtɔ, mɩ́ anhɔ mlɩ.”
18Bɛtrá wanlɩ́n wá Bulu asʋ́n ámʋtɔ bɛɛ, “Bulu ɔbɛ́ɛ, ‘Nɔ́bwɛ mlɩ Sɩ́, mlɩ ɛ́ mlɔ́bwɛ mɩ́ abí.’ Alɩ́ anɩ Wíe Otúmípʋ dɛ́blɩ́ nɩ́.”