Text copied!
CopyCompare
Buka Tumute - 2 Koliniti

2 Koliniti 6

Help us?
Click on verse(s) to share them!
1Dilavau au lovi noeveale kemo no la namigevei loui kosea, “Dilavau la huhuevei la hoesegeveale ke lainaho halevalive.”
2Bukae Hotomo Dilavau loui avoe, “La di hohavoale kemo di isiviale novae vani komo la tedaevei. Dana nova la tedaevei la malevei.” Di kemo hoto mole louge evive. Aike vani komo Dilavau isiviale la hotove evige elike au la malevei.
3No isiviholilu no lovimo vaveve toela vage ataeau ke elehai dobuluviliho.
4Isito no isiviai no lovimo vaveve dua vage ataeau ke elehai hilokage noeau Dilava esemuia. Katealemo vaveve toela onoleu noemo lohoge no kemo vatehani malei ke huhuholisito negolahama.
5Ataeau nohavei no malevei dibulae otovei no aiogevema. No vaeta lovi baluga vai ladeveholima.
6No no uvu mai ata kebia ove selevealemo no itumuholisito vaveve dua vai Dilava lulele hoto loui ata haivei hoesegevema. Ige kemo ataeau no elegevei hilokage noeau Dilava esemuia. Dilavau Munanae Tumumo no negotievege no hotove seleve loui ata haivema. Ige no vaveve inutolotolote keu no mihisi nahate.
8Ata degomoleau noheho hotoe dua loui no hoesegevema. Isege ata degomoleau no aiogevei noheho hotoe toela louma. Keau noheho loui avoe, “Laeau loboe hoto louma.” Isito no abuho hoto loumale keu hoto seleve unaha.
9Ata degomoleau no vaveve hilokaholilu. Isege degomoleau no vaveve bahata hilokalu. Ata degomoleau huhulahai avoe, “Keabuna mesoho haluvisi.” Isito noeabulike kou ua. Keau nohavei vatetumu noevema. Isito no kemo haluviholilu.
10Abu no aiogevemale kemo no uvulahama. Isito no vani bahata vahaeholahama. Noeau kunaite holioholilu. Isito no ata moaga malevei haivege abu otogoe vavevemo kunaite holima. Vatae onobeu noemo uoholinu. Isito no otogoe onobenobe malei vahaeholahama.
11Koliniti ataea, no hotobe laemo mahogovaholisito no uvumo hoto ke bahataike no loui la namigevema.
12No laemo no uvube dua bamuoholilu. Isito laeabulike noemo la uvu bamuma.
13La no ese nahate holilike vage no uvu bahata laemo uale ke nahate lata la uvu bahata mai noeveve.
14Lainaho evieviholimale kebiahi igaetoalive. Vaveve dua vamale keau bae vaveve toela vamale kebiahi igaetoalivebene. Ke nahate atagau bae vaviti igaetoalivebene.
15Kelisou Seteneti bae uvu igaealivebene. Ke nahate evievi ataeau bae evieviholimale kebiahi igaetoalivebene.
16Dilava ekalesia keabuna oleve kateai loboe dilava hoesehavomale kebiahi igaetolahai. Keu anekianu. Kosealemo ukolikolie Dilava ke ata nahiabuliko. Di hoto louale kemo Dilavau subuta hoto mole lounu. Avoe, “Dana di atae vigomo ui Dilavaeabe holige keabuna di ata holisi.”
17Katealemo Kosiveu Bukae Hotomo tota loui avoe, “Vaveve toela vamale kebia vaveve va halevai abuemo haliohatuve. Abuhi vaveveabe toela va halevave. Lana vaveveabe toela vaholige dana la malevei.
18Dana la mama holige lana di ese holive. Kosive vuvunete dailike hoto ke lounu.”