Text copied!
CopyCompare
Uyojroner e Dios xeꞌ Tzꞌijbꞌabꞌir Tama e Onian Tiempo - 2 Corintios

2 Corintios 6

Help us?
Click on verse(s) to share them!
1Pues entonces non era, cocha war capatna tacarox tama upatnar e Dios, cꞌani cawareox tuaꞌ machi iwacta bꞌan taca utacarsiaj e Dios lo que cay ichꞌami umen que cay cachecsu tunor era tiut.
2Porque chꞌar tzꞌijbꞌabꞌir tama uyojroner e Dios tiaꞌ che que: Tama inteꞌ día conda cay acꞌajti tacaren, che e Dios, cay umbꞌi tunor lo que awaren, y tama e día conda cay impejquet tuaꞌ achꞌami e corpesiaj, cay intacriet, che e Dios. Bꞌan chꞌar tzꞌijbꞌabꞌir tama uyojroner e Dios. Pues coner jax e día conda Cadiosir cꞌani utacriox. Y coner jax e día conda ucꞌani tuaꞌ ichꞌami tunor e corpesiaj era.
3Entonces tunoron ucꞌani tuaꞌ cache cabꞌa tuaꞌ machi caqꞌuijnes nien inteꞌ y nien inteꞌ, porque tamar era machi tuaꞌ axin oꞌjronobꞌ upater lo que war cachecsu tamar e Cristo que majax imbꞌutz tunor era.
4Y tamar era war cawirse cabꞌa tut tunor e gente axin que war cache lo que ucꞌani tama tunor bꞌan cocha ucꞌani tuaꞌ uche inteꞌ xeꞌ uman e Dios. Y tamar era cawacta anumuy bꞌan taca tunor lo que watar tama cajor, bꞌan cocha e cꞌuxner, o conda ma tzꞌacar lo que ucꞌani inteꞌ, o conda aquetpa intran tunor ticoit.
5Y cawacta bꞌan taca conda ayan chi xeꞌ axin uwatzꞌion, o conda caqꞌuejcha axin tama e cárcel, o conda axin upucujcse ubꞌobꞌ e sian gente ticoit, o conda cꞌoyon umen que meyra patnon, o conda ma cocha uyubꞌion tuaꞌ cawayan, o conda canumse cabꞌa tama e winar.
6Y war cawirse tunor lo que war cache tut e gente axin tuaꞌ unatobꞌ que erach cawirnar. Y war cachectes cabꞌa que erach cawirnar umen que war canata uyojroner e Dios, y umen que war caquetpa tzꞌustaca conda ayan tin e war uchion canumse cabꞌa, y umen que incꞌun cawirnar. Y war cawirse e gente axin que ayan Unawalir e Dios tacaron, y que majax majresiaj que war cayajta ut e gente axin ubꞌan.
7Y war cawirse e gente axin que erach cawirnar umen que war cacansiobꞌ lo que erach, y umen que war cacꞌampes ucꞌotorer e Dios tamar cacanseyaj. Y cacuxtar xeꞌ erach war aquetpa bꞌan cocha inteꞌ arma xeꞌ acꞌampesna tama e tzꞌojyir, y bꞌan cocha era war cacorpes cabꞌa ubꞌan.
8Y conda war cachecsu uyojroner e Dios tut e gente axin ayan tin e war utattzꞌion, pero ayan tin e intaca axin usubꞌajreson. Y ayan e gente xeꞌ uyareon que atzay uwiron, pero ayan tin e ucꞌayon ubꞌan. Y motor que non war caware ajtaca lo que erach iraj iraj, pero ayan e gente xeꞌ acay uyareon que non ajmajresiajon ubꞌan.
9Y motor que non natanbꞌiron umen tunor e gente axin, pero ayan tin e che que: “¿Chi e Pablo? o ¿chi e Timoteo?” Y ayan tin e qꞌuix uchamsion, pero iranicto que non bꞌixironto. Y ayan e gente xeꞌ uwatzꞌion, pero machi uchamsion.
10Y motor que tzajtaca ut cawirnar tamar lo que war canumse cabꞌa, pero non tama cawalma war catzay que war caxana tama ubꞌir e Dios. Y motor que ayan conda matucꞌa catumin, pero Cadiosir war ubꞌutꞌi cawalma axin tuaꞌ uyubꞌion catacre e gente axin. Y motor que ayan conda matucꞌa ayanon inyajrer, pero war cacojco cachꞌami tunor lo que ucꞌani tama Cadiosir.
11Entonces cawermanuox xeꞌ turox tama e chinam Corinto, cꞌani cawareox era que war capasi cabꞌa tiut tuaꞌ cawareox tunor lo que war cabꞌijnu y que pasar cawalma tiut ubꞌan.
12Y non era matucꞌa war camuqui tiut, pero nox ayan ixto lo que war imuqui ticoit non.
13Y tamar era cꞌani incꞌajti tacarox bꞌan cocha inteꞌ tatabꞌir xeꞌ war upejca umaxtac tuaꞌ ipasi ibꞌa ticoit tuaꞌ iwirsion tunor lo que ayan tamar bꞌan cocha cay cache non tiut.
14Pues entonces ira ibꞌijnu tuaꞌ inutꞌi ibꞌa taca inteꞌ xeꞌ machi war acꞌupseyan tama Cawinquirar. Porque ma cocha erer anutpa lo que erach tacar lo que mabꞌambꞌan, y machi uyubꞌi anutpa e janchꞌaquenar taca e incsibꞌaner.
15Pues chequer que e Cristo ma erer unutꞌi ubꞌa taca e diablo, porque ma erer atzay uwirobꞌ ubꞌobꞌ. Y bꞌan ubꞌan tama inteꞌ xeꞌ war acꞌupseyan tama Cawinquirar, ma erer unutꞌi ubꞌa taca inteꞌ xeꞌ machi war acꞌupseyan tama Cawinquirar.
16Y ma cocha erer unutꞌi ubꞌobꞌ inteꞌ chamen dios taca uyotot Catata Dios, pues jax non xeꞌ ajcꞌupesiajon tama e Cristo xeꞌ uyototon Cadiosir xeꞌ bꞌixir. Y tamar era non xeꞌ uyototon Cadiosir ma cocha erer canutꞌi cabꞌa taca inteꞌ chamen dios. Bꞌan cocha chꞌar tzꞌijbꞌabꞌir tama uyojroner e Dios tiaꞌ che: Nen tuaꞌ inturuan tama uyalmobꞌ tunor nimaxtac, che e Dios, y cꞌani inxana tacarobꞌ iraj iraj. Y nen tuaꞌ inquetpa Udiosirenobꞌ, y jaxirobꞌ tuaꞌ aquetpobꞌ nimaxtacobꞌ ubꞌan, che e Dios, Bꞌan chꞌar tzꞌijbꞌabꞌir tama uyojroner e Dios.
17Y tamar era ojron Cawinquirar Dios otronyajr y che: Loqꞌuenic tujam e ajmabꞌambꞌanirobꞌ y ira iyose ibꞌa tacarobꞌ. Y ira ipijchꞌi lo que erer uchiox ixbꞌontzꞌa, porque jay ixixin ixobꞌian tama niwojroner era nen cꞌani inchꞌamiox, che e Dios.
18Y nen tuaꞌ inquetpa Itaten, y nox tuaꞌ ixquetpa nimaxtacox. Bꞌan che Cawinquirar Dios xeꞌ nojta ucꞌotorer.