1Koasa mami tinavetavete somanae koe Tamasa, si tepa atu si gami koa gamu pu ele somana tagoa sa tataru variharupi te Tamasa, pude mi lopu somana hoboro nia si Asa meke loke vuana.
2Ura guahe sapu zama nia sa Tamasa: “Pana mae sa totoso garona, si kote avosigo Rau. Totoso mae sa rane pude harupigo, si kote toka nigo Rau,” gua. Ke mi avoso mae! Hie sa totoso garo valeana, pude ade vagia sa tataru variharupi te Tamasa, meke hiera sa rane tinaharupu!
3Lopu hiva ta zutu pa keke tie si gami koasa mami tinavete ninabulu, gua asa ke podekia gami pude lopu va tasuna ia si keke tie, meke hukatia pude va hinokara.
4Ba gua sapu evaṉia gami doduru totoso, si pude vata dogoro nia sapu gami si na nabulu hinokara te Tamasa, ke turu va nabu meke ṉoṉo si gami koari na totoso kaleadi hola, na ṉinovaṉovala, meke na tinasuna.
5Ta seke va kaleana, ta veko pa vetu varipusi, ta rapatae pa kobi tie si gami, meke tavetavete va ṉiṉira, ovia, meke lopu puta valeana si gami.
6Koari na mami tinoṉoto, na ginilagilana, na ṉinoṉo, meke na tataru vatukana pa tie, si vata dogoro nia gami sapu na nabulu te Tamasa si gami. Meke gua tugo koasa tinagona sa Maqomaqo Hope, meke mami tataru hinokara,
7na mami inavoso hinokara, meke pa ṉiniraṉira te Tamasa. Tavetavete pa tinoṉoto si gami, kekeṉoṉo guana tie varipera pu lavelave pule nia, meke razai sari na kana.
8Kaiqa tie si va lavata gami, kaiqa si va kurekure gami, kaiqa arini si zama ṉoṉovala gami, ba kaiqa si vahesi gami. Ta zutue tie kokoha si gami, ba na hinokara si tozia gami.
9Guana lopu ta gilana pa tie si gami, ba doduru tie si gilana gami dia mo. Guana ele mate mami tu si gami, ba dogoro gami mia mo. Korapa toa mo si gami. Ta komiti va kaleana pa vina kilasa si gami, ba lopu mate.
10Va talotaṉa gami rini, ba qetuqetu si gami doduru totoso. Habahuala pa tinoa tini si gami, ba tagotago va soku pa rinaṉeraṉe. Guana malaṉa si gami koari na likakalae pa pepeso, ba tagotago va hola si gami koe Karisito.
11Kasa mami baere ta tatarue mia pa Koriniti, ele zama va lodaka atu si gami koa gamu. Lopu tomea gami sa mami tataru nomana koa gamu.
12Gami si vata dogoro valeana nia koa gamu sa mami tataru. Ba gamu si lopu va vura valeania sa mia tataru koa gami.
13Zama guni gamu na qua koburu soti rau si gamu. Mi va dogoro valeanani gami sa mia tataru, kekeṉoṉo gua sapu tavetia gami koa gamu. Mi lopu tomea sa tataru pa bulomia.
14Mi lopu variva egoi pude koa keke pa tinavetavete koari na tie huporodi. Sa tinoṉoto si lopu boka koa baere koasa kinaleana, meke sa kalalasa si lopu boka koa keke koasa hinuporo.
15Vegua meke boka keke hiniva se Karisito meke se Setani? Lopu boka kekeṉoṉo dia hahanana sari na tie te Karisito, meke sari na tie sapu lopu te Karisito.
16Lopu boka koa keke sa Zelepade te Tamasa meke sari na beku tana hinuporo. Ura gita si na Zelepade tanisa Tamasa toana, gua sapu ele zama nia telena sa Tamasa, sapu guahe: “Kaqu koa turaṉi Rau si arini, meke kaqu ene turaṉi Rau si arini. Kaqu na dia Tamasa rini si Arau, meke kaqu na Qua tinoni Rau si arini,” gua si Asa.
17Gua asa ke zama guahe sa Tamasa: “Mi rizu vura koari na tie huporodi sara, pude mi koa varipaqahi koa rini. Lopu tiqua keke tiṉitoṉa bonina, meke kaqu va kamo gamu Rau.
18Kaqu na Tamamia gamu si Arau, meke gamu si na Qua koburu,” gua sa Baṉara pu tagoi sari doduru ṉiniraṉira.
