Text copied!
CopyCompare
Awaeha Vovouna Minaveha Movia - 2 Korinita

2 Korinita 6

Help us?
Click on verse(s) to share them!
1Ka itoai Yaubada nui apaipaisewa. Wayahina, ahidahidami eha Yaubada yanꞌ am‑venena awawaehina wayahimi udewa‑kavokavovoe.
2Iuna tauna ivona, “Tuta ahiahina nihenina yami viama anononi, e anau‑patami ahiahina, ka kadu ito‑yavuha anꞌ auyewa wayahina ana‑ivaitemi.” Ka yauke avonevonemi, tuta ataina vivane tuta‑nana ahiahina Yaubada wayahina na‑ivaitemi, ka kadu tuta ataina vivane ito‑yavuha anꞌ auyewa‑nana.
3Eha aitam pai vito‑paine ata‑boubou tomotau yai etawana nihenina. Iuna yama nuanua yama paisewa anꞌ anamana mamaei ahiahina tomotau habuhabui mataia.
4Vona ahiahina, itoai Yaubada ya tau paisewa. Wayahina, nau‑wawaniai yama dewa aitamoata aitamoata adune‑vi‑avini ahiahina. Ika, tuta tuta nau‑wawaniai atoha‑vi‑anai ananina, ka tuta tuta vita, ka viha, ka kadu inahe avaniahei,
5ka kadu vunua, ka yohona, ka vitana‑wahewahe, ka kadu paisewa vitana, ka ioyoma eha ama pata aino‑aineai, ka am anavovo,
6ka kadu dewa hadahadanina kadedewei, ka abebebewa mani tomotau yai dewa anua‑haui, ka taui wayahia atoha‑vi‑anai, ka dewa bigana adedewei, ka kadu yama paisewa apaipaisewei Nuana Ahihinata nihenina, ka yama dewa‑vidovidoha eha vitupu.
7Ka yama vona vivane vona tunutunuhina, ka ama havia anau‑haviei Yaubada ya bagibagi wayahina, ka kadu dewa tunutunuhi wayahia avi‑naua kadu abou‑pota. Wayahina, yama dewa tau nau‑havia yai dewa deina, vivane taui nima ateia ivi‑naua, ka nima akenia ibou‑pota.
8Ka aituhu tomotau didigai ivo‑vi‑natei, o aituhu iapa‑goyogoyoeai, ka aituhu vane goyona anononi, o aituhu vane ahiahina anononi, akanai itoai eha ata‑genuana yama paisewana wayahina. Ika, itoai tau hae‑hoiai, kate mani tomotau inuanua itoai tau vitupu.
9Ka Yaubada anamaneai, kate tomotau inuanua itoai ama wava eha aitam aviani. Ka tuta tuta ama dune anianiga, kate nonova a itoava tuta ataina wayahina itoai yawayawaiai. Ka ai vi‑am tuta ivunuvunuai, kate eha ita‑nau‑vi‑anigiai.
10Ka itoai yama nua‑vita wayahiaia, kate tuta tuta adewa‑haiawa. Tanopi taina a gugua wayahi itoai tau payapayayai, kate tomotau habuhabui ivi‑tau kaikaiwabo wahuma a gugua wayahi iuna yama paisewa. Ka ama dune awakabiai, kate avi gugua Iesu wayahina, akanai guguaia habuhabui wayahiaia mamaei yama gugua.
11Me Korinita, tupwami unuanua itoai eha adune‑nuanuaiemi, kadu tupwami unuanua avaha atana‑tavunemi. Kate eha. Itoai avona‑vuvunaha wayahimia, kadu avaha ama nau‑dadana habuhabuna ahaeyei ivinꞌ‑omo wayahimia, e avaha uanamane‑yehai. Itoai eha yama dune‑nuanuai avito‑potami, kate itomi yami dune‑nuanuai uvito‑potai.
13Tuta ataina wayahina, yauke Paulo, avonevonemi natunatu deina, iuna yauke yami vitumahana amana deina. Ka aituhu yaka dewa tunuhina, akanai, nau‑wawanimi udune‑nuanuaieai, adune‑nuanuaiemi aitamoata deina.
14Eha nau‑wawanimi uawaehei aitamoata taui eha ivitumahana wayahia. Unononi avonemi. Medeina dewa tunutunuhina ka dewa goyogoyona ainua iawaehe aitamoata? Eha ai pata. O kaiwadi, medeina maheta ka novanovana ainua ivi‑yaiana? Eha ai pata.
15O medeina Tau Ito‑yavuha ka Satana ainua iawaehe aitamoata? Eha ai pata. Wayahina, medeina tau vitumahana ka tau va‑hamwahamwana ainua iawaehe aitamoata? Avonemi, eha ai pata.
16O medeina Yaubada ya manua vito‑pota ka yaubada vitupu ainua iawaehe aitamoata? Eha ai pata. Itoka tau ekalesia vivane Yaubada Yawayawaina ya manua vito‑pota. Ka tauna avaha vonei deina, ivona, “Yauke taui nui kamamaei, ka nui kani‑awana. Ka kadu Yauke ivi‑wahaniu yai Yaubada, ka taui avi‑wahani yau tomotau.” ka kadu aitam iginuma Iginuma nihenina ivona,
17“Kauvea ivona, ‘Wayahina, itomi nau‑wawanimi mani tomotau uni‑tawanei, utana‑vewani. Ka eha taui nui unau‑tamoia. Eha aitam aviani gawagawamina uvo‑dadani. E yauke anau‑kaiwemi avi‑yaianemi.’” ka kadu aitam iginuma Iginuma nihenina ivona,
18“Kauvea Bagibagi‑vainena ivona, ‘Apaina Yauke Amami, kadu itomi natunatu ononotomi ka natunatu vaivinemi.’”