Text copied!
CopyCompare
Masas Pit Jesucristowa - 2 Corintios

2 Corintios 6

Help us?
Click on verse(s) to share them!
1Na Diospa kal kimtu akwa, nane uruza paikwanamtus, Dios uruza pashinamtu mainñamanpa. Uskas uruza kwisha kiwainara.
2Sunkana Dios kaiz kit paiña pɨnkɨhta ka panintɨt: “Nane wat payura at kit u paikuamtu aizpa mɨrau. Nane wat payura uruza kiwainnarau, uruza watsarɨt mɨlnanpa.” Mɨzha. Mane Diosne awaruza wat kiwainashimtu. Mane Diosne awaruza watsarɨt mɨlnashimtu.
3An sukin uztuasmin, nane nil uzshimtus, ap kal wat puznapa. Nane mɨnpazha na kimtu aizpa kwail i kaiznapa pashitchish, mɨnminkas Dios watsal pit kwayamanpa.
4Sunkana nane, Diospa kiwainmikane, u iztakin nil uztau, paiña pit kainammtuasmin. ¡Sunkana nɨjkultain! Nane awa nawa parishiznintu aizpa tailchamtus. Masetne na pashimtu aizpa we mɨjish. Masetne awane nawa kajchira sɨppamtu, na puzmanpa.
5Masetne awane nawa iyamtu. Masetne awane nawa kajchira sɨpnintu. Masetne awane nakin wanmakkamtu, nawa kwail kiana. Tɨnta kal kimtuasmin, tɨnta kwaiztu. Masetne nane akkwan payukima pittuchish, ap kal akwa. Masetne yak kimtus, kumira mɨjchi akwa.
6Mane nane na miza uztus uruza kaiznamtus, na Diospa kal kimtu piankamanapa. Nane sɨnam awakana uztus. Diospa watcha pianish. Awa nawa kwail kimtu aizpa tailchamtus, aliz kultachin. Mamaztuza wat kinamtus. Dios Sɨnam Izpulne nawa kiwaintu. Nane watcha wan awaruza panashimtus.
7Uruza watcha kamtanamtus. Diosne nawa tɨnta kiwaintu, paiña kal kinpa. Dios nawa maiztɨt akwa, usne nawa nil namninta, wat kinpa, aliztuza anuppanapa.
8Masetne mazantuz nawa wat minñamtukas, mɨnpazhane nawa wat minñamtchi. Na ɨrɨkane, masetne mazantuzne nawa kwail pit parara. Masetne mɨnpazhane nawa kwail pit paramtuchi. Na watcha kaiztukas, mazantuzne na pɨrail kaiztu kizamtu.
9Mazantuz kamtamtuz nawa piankas, uspane nawa kainsɨh awa i kizamtu. Apane nawa wat awa kizamtu. Mazantuz nawa piantashimtukas, nane uzmɨztus. Mazantuz nawa palishiznintukas, uspane nawa piantasachi.
10Masetne tayaltukas, nane pailta payu watsal kultus. Na puizakana uztukas, nane akkwantuza Dios watsal pit kainanamtus, usparuza Diospa kwal namninnanapa. An sura chinkas mɨjchikas, na Diosta pian akwa, nane Diosta pianchiruzkin an akkwan mɨj ish.
11Corinto pɨpulura uztuz, Cristora nɨjkulturuz, mɨzhain. Na uruza kwisha pashinamtu akwa, nane uruza wan chiwal ap kaijchukin mintu aizpa paranamtus, wan piankamanapa.
12Na uruza kwisha pashinamtukas, uruzne u kaijchukin nawa pashiarachi. Une nawa wat sapparachi.
13Mane nane, u papihshkana, uruza ap pashparuzakanain paikwanamtus, na uruza pashinamtukanain nawa pashianapa.
14An sura uzamtuasmin, une Cristora nɨjkultuchiruzkasa paiña dios tɨkasa sarɨtta wakpuj wainman. Cristora nɨjkultumikane Cristora nɨjkultuchimikakasa kasara kiman. Sun kiasachi. Cristora nɨjkulturuzne Dios pit mɨat kit nil kiat kit nil uzamtu. Cristora nɨjkultuchiruzne sun pit mɨashitchi, uspa kwail kiashimtu akwa. Wat kimturuzkas kwail kimturuzkas pareju nɨjkulasachi, Diosta piantuz wat kiashimtu akwa. Anparuzne kwail kianazi.
15Cristokas Diablokas mizurainkas nɨjkulsachi. Cristora nɨjkultumikakas Cristora nɨjkultuchimikakas usparuzpain nɨjkulasachi.
16Diosta wakpuj wainturuzkas Diosta wakpuj waintuchiruzkas usparuzpain wat nɨjkulasachi. Aune Diospa yalkana makpas, sua Dios aukasa uztu akwa. Ñamin Diosne sunkana pɨnkɨhta panin kit kaizta: “Nane uspa kaijchukin uznash, uspakasa chan. Nane uspa Dios ish. Nane usparuza ap kwal namninnanash.”
17Katmizna Anpatne ma pitchin ka kaizta: “Wan kwail kimturuzkasa wanmakman, uspa kwail kiamanpa. Nane kwail kin chɨhkamturuza sapnanash, nakasa uzanapa.
18Suasne nane u Papihsh namnash. Nane uruza ap pashparuzkasa namninnanash. Sunkana tɨnta Diosne, wantuza ɨninmikane, ka kiznara.”