1Nini Anutu nanŋaŋgö nup meme alaurupŋi akzinaŋgöra aka uruŋini kewö kuŋguzin: Anutugö kalem möriamŋan omaŋi akapuköra mi mönö buŋa qem aŋguba malme.
2Anutunöŋ keu kun kewö jii Buŋa Kimbinöŋ ahöza, “Gehorimamgö nalönan kam kuŋguiga nöŋön köuluki möral. Amötqeqe nalönan kam kuŋguiga miaŋgöreŋ bauköm gihial.” Keu mewö ahöiga mötket! Nalö dölkiaŋön mönö Anutugö amötqeqe nalöŋi akza. Anutunöŋ eŋgehorimamgö möri nalöŋan kam kuŋguiga ak-kömukömuŋi mi mönö dölki buŋa qem aŋgume. Mewö.
3Neŋön mönö kungö uruŋan neŋgöra aka bölii etpapuköra galömnini mem aŋgumakzin. Jim neŋgigetka nupninan keuŋambuk aka etpapuköra mewö ahakzin.
4Anutugö nup meme ambazip ölöp sorokŋi akzini, ahakmeme pakpakninan mönö mi kondelakza. Kahasililiŋ aka jaŋgauraŋga könaŋi könaŋi ak neŋgigetka wahöjaliŋ uruŋe maljinmö, miaŋgöreŋ mönö mökösöŋda kapaŋ köla kin köhöimakzin.
5Ihilek wahiŋambuknöŋ neŋguba kösö miriŋi miriŋi miaŋgöreŋ al neŋgigetka malin. Karimŋi karimŋi asuhugetka miaŋgö uruŋe kömumbinbukö keŋgötnini möta malin. Gaun guli aka nenegöra wösönini aliga malinmö, töndup silenini qeba nup memba malin.
6Ahakmeme sarakŋi wuataŋgöba Anutugö sihimŋi möt asariba lömböt möta mökösöŋda ambazip ala ak eŋgimakzin. Uŋa Töröŋan urunini kokolak qeiga sutŋine geŋmoŋi qahö jöpaköm eŋgiba maljin.
7Keu ölŋanök jiinga Anutugö kukösumŋan bohon köl neŋgiiga ahakmeme solanŋaŋgö timbi saiwaŋi meinga börö ölnine aka qaninine ahöiga kinjin. Mewö kinda likep Buŋa keu jim sehiba likep keu muneŋi silenine algetka miaŋgö likepŋi jim mindiŋgöba malin.
8Qetbuŋa neŋgigetka silenini qahö möpöseimakzin. Yom jiba gamu qem neŋgigetka uruninan qahö erakza. Neŋgöra kösohot ölöpŋi kösohot bölöŋi mi laŋ jimakze. Muneŋ jiji ambazip ewö ak neŋgimakzemö, töndup keu ölŋanök pakpak jimakzin.
9Ambazipnöŋ könanini ölöp möt kutumakzemö, töndup tosatŋan nönöŋgan aka nesampurek ak neŋgimakze. Nalö tosatŋe kömumbingö aka malinmö, töndup toroqeba jebuk maljin. Kegwek-kahasililiŋ ewö neŋguba malgetmö, töndup qahö kömuin.
10Wösöbiriknöŋ neŋguiga töndup nalö dop söŋgaiba maljin. Wanapŋi mala töndup ambazip gwötpuk bauköm eŋgiinga uruŋinan pomŋi ahakze. Gölmegö sukinapnini qahöpmö, töndup oyaeŋkoyaeŋ pakpak buŋa qem aŋguba pipsimbawoŋ maljin.
11O Korint ambazip, neŋön mönö uruninaŋgö naŋguŋi eŋgöra öröba keu kun qahö kölin geiga könanini aukŋeyök jibiga mötze.
12Eŋön neŋgö urumötmötnini mötpepuköra mi qahö aŋgön kölakzinmö, neŋön eŋgö uruŋini mötpinbuköra mönö nanŋinanök aŋgön köl aŋgumakze.
13Nöŋön urumötmötni eŋgibiga eŋön mönö miaŋgö likepŋi mewöyök törörök niŋgime. Nöŋön nahönböraturupni ewö tandök keu eŋgöra kewö jiba ohozal: Iŋini mewöyök mönö nanŋini uruŋinaŋgö naŋguŋi öröba urukalemŋini mi sehiba kondel neŋgime. Mewö.
14Ambazip uruŋini qahö meleŋgeri, yembuk mönö uruŋini kude jöhöba öröröŋ kude malme. Malmal solanŋi aka malmal goŋgoŋi mi nanŋök nanŋök akzahot. Mi mindirim etkibingö osibin. Söŋaup aka asakŋi mi mohotŋe qahö akzahot. Qahö!
15Kraist aka Katakömulat (Satan) yetkön mönö urumohot aka mohotŋe malbitkö osimahot. Miaŋgöra urumeleŋ ambazip kunŋan ahakmemeŋi urumeleŋgö kopa ambazip kun yambuk mohotŋe mindiriba akitkö osimakŋahot.
16Anutu nanŋak keuŋi kun kewö jii ahöza, “Nöŋön könagesöni yeŋgö uruŋine mala sutŋine anda kaba Kembuŋini ak eŋgibiga yeŋön nöŋgö weleni qeba möpöseim niŋgiba malme.” Keu miaŋgö dop Anutugö Uŋaŋan uruŋine maliga sileninan Anutu malmal köhöikŋi Toŋaŋgö jikeŋi akza. Anutunöŋ nanŋi jöwöwöl jikeŋe tandö lopioŋ möpöseibingö soŋgo ali ahöi osimakzin. Anutugö jikeŋi aka asa jikeŋi mi inanŋök inanŋök. Miaŋgö dop neŋön urumeleŋgö kopa ambazip yembuk qekötahöbingö soŋgo ali ahöi osimakzin.
17Miaŋgöra iŋini mönö Kembunöŋ keu kewö jiyöhaŋgö dop akŋe, “I mönö eŋgömosöta yaigep kaba kambu nanŋi kun malme. Aŋgöjörakŋinambuk ahakzei, mi mönö kude eŋgoseigetka nöŋön möt aŋgön köla köyan köl eŋgiba malmam.
18Nöŋön mönö Iwiŋini akiga iŋini nöŋgö nahönböraturupni aka malme. Kembu kukösum pakpakö Toŋan mewö jiza.” Mewö.
