Text copied!
CopyCompare
Fúka Moodaanaki Kira Ufa Afaqínaasa Ufa - 2 Koorinti

2 Koorinti 6

Help us?
Click on verse(s) to share them!
1Qinée Pauroosa qiní faqa mária namusa maasá Ánutuna aanáiqikirausara foora máridaqa Ánutuna faqa moodáanaki aináinidaqa ínni Koorinti máqannaasa fuki faakí ídaqa dóo ínnee Ánutuna káaqa áfaarira anoona dóo máraafanoo sía quqásaifanoo maqásaa áqufi rairaaíani.
2Ánutufa minára maaqí qímasee tamummáqara fasiqa qímannimufaqa ákara ríqau. Qinée qeeqá dídira áukuana ínnee qiníara dadaaqíanifee qinná naméeraqirana íriqa. Qinée asumu márirana nímira aukuana ínni ufa irisée dadaaqíqa. Qinée Pauroosa minára maaqí qídaqa. Maa-kamúqoo kai Ánutuna dadaaqírana máree maría kamuqoo máridanoo. Maqee fáasaana Ánutufa innaarúna asumu nímifaqa máreemaria faasaanafa máridanoo.
3Akaqáusa maasá ínniki saikíranara áaqeeaafoo qifóora maasá qeeqá rakísidaqa ínni níku nímaarusirafa máriandoo qímasee eeráiridaqa.
4Maasá qeeqá aiqáma ainainaki maasá Ánutuna aináinira faiqi namu márunnanara kooroo iaqéera qímasee firaaqóo reendeenámandee ummaara faqa kadáapirirana faqa tooqaamu dárirana faqa aupúrarana óosana óosana máraidaqa.
5Maasá maa-namúsa dárirana faqa karabúsaki rumbáqimaqarana faqa moómoo fasiqa áanoomandee anirée dári dáriisoona faqa maqee miqídaqa. Maasá dáararee márifaqa sía faiqárana maréeqa kísaaqasaa kadáapiriri ifaqa nifaaqa ummooqukámandee máridaqa aináinidaqa.
6Maasá qisakadikí qikairí síaisa ámiqimandee andeeqásee márunnanannái faqa maasá íriranannai faqa reendeenámasee ubiásee máriranannai faqa qímuqusifaqa dadaaqúnnanannai faqa maasá qeeqára Ánutuna aináinira faiqi márunnanara koorooídaqa. Maasá Ánutuna náaquqara máraqunannai faqa maasá ánoona ufá kai qímarunnanannai faqa Ánutuna afeekannái faqa maasá qeeqára Ánutuna aináinira faiqi márunnanara koorooídaqa. Andeeqára oosana nímirafa maasá durú saamuara foora márifaqa akaqáusa maasá dáruafaqa misamúnannai qeeqásaa rukíqasee misá náruani qímasee misamunánnai misá nárirara foora ídaqa.
8Akaqáusa maasára ámiqira ufa qídaqa akaqáusa mandá ufa qídaqa, akaqáusa maasára sukúfa qídaqa akaqáusa qimooqídaqa akaqáusa maasára únnufa qídammiafoo qímariafaqa maasá ánoona ufá kai qídaqa.
9Faiqí ánaasee maasára fífau fasiqee qímariafaqa akaqáusa maasára Ánutuna ufa máraqa nuasee qímasee ámiqimmasee maasára íridaqa. Akaqáusa maasára kúqirausara foora máriaa foo qiafaqa ínnee qíqafaidee maasá káqi máridaqa sía kúqiqa máridaqa. Misá dáruafaqa maasá sía kúqidaqa káqi máridaqa.
10Maasá maqee maqee qifaaqa kudoosaápanoo márifaqa Ánutunara óonu máfi irisáidaqa maqee maqee asasídaqa. Maasá kudi fasiqara foora máridaqa moómoo fasiqa anaasee innaarúnai ainaina faqáasaikamannisaidaqa. Maasá maa-maqánasaa ainaina síaisa máridaqa aiqáma innaarúnaindaraa ainaina maasáindi máridanoo. Mi-aiqama ainainnánnoo maasá Ánutuna ámiqira ainainira faiqiuqaindi márunnanara akoorooídaqa.
11Óo qiní qíqoondíuqa Koorinti máqusai máriasa. Maasá ínni akooqóo kooroommásee ínni qímannimiqa qímuqusa óo raqáfimarufaqa qeeqá daunurákinaana nímuqusira írirana ínni qímannimiqa.
12Maasá ínniara sía qeeqá qímuqusa rafáaqa fúsee káqikaaqoo ummeeréeqa akooqóo aiqáma qímannimiqa ínnee ínneeqá kai ínneeqa nímuqusa mandáikámmida rafáaqafusee sía maasára nímuqusi maríafanoo.
13Ínnee qiní faiqinámuara foora máriafaqa maqee qímannimianaura. Ínnee maasá daanna réeqa ínnee maasára nímuqusinaqa akooqóo maasá faqa ufa qiaqa.
14Óo Koorinti máqusanaasa ínnee Yísuna ufa írimariasa faqa sía írimariasa faqa sía moodáanaki qaindúsira saqáriara foora aináiniaqa, sía amana amana kái ínni faqa fifáranoo. Náqimmásee andeeqárana faqa áaqarafa faqa náqimandee moodáanaki qaindúsu máree fifáree, sía amana. Náqimmásee káaqa qarafa faqa asukuna faqa moodáanaki máriannoo, sía amana.
15Náqimmásee ásauku mundírafa faqa kudi fasiqa Sadannafa faqa moodáa ufara eedóo qifáree sía amana, namuqáa máridanoo. Yísuna ufa írimarifa faqa sía Yísuna ufa írimarifa faqa náqimmásee fee moodáanaki kifáree.
16Náqimmásee Ánutuna amaana máqaki máriasa faqa túmunnai áuqira afaanna faqaasa faqa moodáanaki kifáree, sia amana. Maasá káqi maríra Ánutuna amaana máqara foora máridaqa. Ánutufa minára maa-anoonufána tamummáqara fasiqa qímamufanoo ákara rínau. Qinée qeeqá máaqa misáki usakásee márianaura. Qinée misá Ánutusa márianaqá misá qiní qíku qísauku márifaranoo.
17Minára karaambáiqa maaqí qímasee qímannimidanoo. Mandóosana máree máriasa faqa moodáa maqusaki máridaqa misá mandóosanara eeráiriaqa. Ínnee mandáinaina máree máriasa mandóosanara rufíasee sía miná umáraaqa. Ínnee miqídaqa ánukaranaki márifaqa qinée aiqáma ainaina úriqarara karaambaiqa fannoo ínniara qiníndi fee qínaqa ínnee qiní faiqinámu qiní qíraamummaaka márifaranoo.