Text copied!
CopyCompare
PIIPILI ƖSƆ TƆM TAKƎLAƔA - Kɔlɛntɩ II

Kɔlɛntɩ II 6

Help us?
Click on verse(s) to share them!
1Pǝ tɔɔ kɛ́ tɑ́ mpɑ nɑ Ɩsɔ tǝ lɑkɩ tǝmlɛ tɔ, tǝ wiinɑ-mɛ sɩ ɩ́ tɑɑ yele nɑ Ɩsɔ hʋlɑ-mɛɣɛ pɛɛlɛɛ nnɑ tɔ ɑ́ pǝsɩ yem.
2Ɩsɔ yɔɣɔtɑ ɩ tɔm tɑɑ sɩ: Wɑɑtʋ wei mɑ lɑkɑɣɑ mɑ kʋpɑntʋ tɔ mɑ nɩɩnɑ-ŋ. Yɑpʋ kʋyɑkʋ wule mɑ sǝnɑ-ŋ. Tɔʋ, pǝnɛntɛɣɛ pǝ mʋnɑ Ɩsɔ kʋpɑntʋ hikuɣu. Sɑŋɑ kɛ pǝ pǝsǝɣɩ nɑ pǝ́ yɑ yʋlʋ nyʋɣʋ.
3Tɩɩ cɑɑ sɩ nɔɣɔlʋ ɩ́ footi tɑ́ tǝmlɛ, pǝ tɔɔ kɛ́ tɩɩ cɑɑ tǝ́ tusi nɔɣɔlʋɣʋ pɑɑ mpi pǝ tɑɑ.
4Amɑ tǝ hʋ́lǝ́ɣɩ́ pǝ tǝnɑ pǝ tɑɑ kɛ́ sɩ tǝ kɛ́ Ɩsɔ tǝmlɛ nyǝ́mɑ. Pǝ tɔɔ kɛ́ tǝ cɑɣɑnɑ suulu kɛ sɔsɔm nɑ tǝ́ tɔkɩ kʋnyɔmǝŋ nɑ tǝ́ wɛ ɩsǝnyǝŋlɛ nɑ lɑŋwɑkǝllɛ sɔsɔɔlɛ tɑɑ.
5Pɑ mɑpɑ-tʋ, pɑ tʋ-tʋɣʋ sɑlǝkɑ, pɑ lɑpɑ nɑ yǝlɑɑ tǝnɑ yoonɑ-tʋɣʋ yem yem. Tǝ lɑpɑ kɑŋkɑŋsi tǝmɑ, tǝ keelɑ tɑ́ tom, tǝ sǝpɑ nyɔɣɔsɩ.
6Tǝ hʋ́lǝ́ɣɩ́ kɛ́ sɩ tǝ kɛ́ Ɩsɔ tǝmlɛ nyǝ́mɑ, nɑ tɑ́ yɑɑsi kʋpɑŋ tɑɑ nɑ tɑ́ nyǝm tɑɑ nɑ tɑ́ suulu tɑɑ nɑ tɑ́ kʋpɑntʋ lɑpʋ tɑɑ. Nɑ tǝ lɑpɑ mpʋ tɔ nɑ Ɩsɔ Feesuɣu Nɑŋŋtʋ toŋ kɛ́ nɑ tɑ́ tɑmpɑnɑ sɔɔlʋɣʋ.
7Nɑ tɑ́ wɑɑsʋ tɑmpɑnɑ tɑɑ kɛ́ nɑ Ɩsɔ tomɑ tɑɑ. Tɑmpɑnɑ tǝŋʋɣʋ kɛnɑ-tʋɣʋ yoou wontu nti tǝ yoonɑ nɑ tǝ́ kentiɣinɑ tɑ́ tɔɔ tɔ.
8Pɑ tʋɣʋnɑ-tʋɣʋ pǝyele pɑ tʋɣɩ-tʋɣʋ fɛɛlɛ tɔtɔ. Pɑ tʋʋkɩ-tʋɣʋ, pǝyele pɑ sɑŋ-tʋ tɔtɔ. Pɑ nyǝnǝɣɩ-tʋɣʋ pɔpɔtʋnɑɑ kɛ́, pǝyele tɑɣɑlɛ tɑmpɑnɑ yɔɣɔtǝlɑɑ.
9Pɑ nyǝnǝɣɩ-tʋ ɩsɩɩ mpɑ pɑ tɑ nyɩ tɔ pǝyele tɑɣɑ pɑ tǝnɑ pɑ nyǝmɑ́. Pɑ nyǝnǝɣɩ-tʋɣʋ sǝtɑɑ, pǝyele tɑ́ nɑ tɑ́ ɩsɛ, nɑ ɩ́ pǝsǝɣɩ nɑ ɩ́ nɑ́ mpʋ. Pɑ tʋɣɩ-tʋɣʋ sɑlǝkɑ, pɑɑ nɑ mpʋ pɑɑ kʋɣɩ-tʋ.
10Pɑ nyǝŋsǝɣɩ tɑ́ ɩsɛ, pɑɑ nɑ mpʋ lɑŋhʋlʋmlɛ tɑɑ kɛ́ tǝ wɛ tɑm. Tǝ wɛɛ kɛ́ ɩsɩɩ kʋnyɔntʋnɑɑ, ɑmɑ tǝ sʋsǝɣɩ yǝlɑɑ pɑɣɑlɛ kɛ ɑpititu. Tǝ wɛ ɩsɩɩ mpɑ pɑ fɛɩnɑ pʋlʋ tɔ, pǝyele tɑmpɑnɑ tɔɔ tɑ́ wɛnnɑ pǝ tǝnɑ.
11Tɑ́ tɑɑpɑlɑɑ kʋpɑmɑ kɛ Kɔlɛntɩ, tɑmpɑnɑ kɛ tǝ heeliɣi-mɛ, ye pɑ fɑɣɑ tɑ́ tɑɑ mɛɣɛ pɑ mɑkǝnɑ.
12Tǝ sɔɔlɑ-mɛɣɛ, ɑmɑ mǝ́ tɑ́ sɔɔlǝnɑ tɑ́.
13Pǝ tɔɔ kɛ́ mɑ yɔɣɔtǝnɑ-mɛ ɩsɩɩ piyɑ. Nti tɑ́ hʋʋ mǝ tɔɔ tɔ mɩ́ɩ́ hʋʋ ḿpʋ́ɣʋ́ tɑ́ tɔɔ, ɩ́ sɔɔlɩ-tʋɣʋ mpʋ tɔtɔ.
14Ɩ́ tɑɑ yele nɑ mǝ nɑ mpɑ pɑɑ tɛŋ pɑ tɑɑ nɑ Ɩsɔ tɔ ɩ́ kpɛntɩ. Pǝ tɑɣɑ mpɑ pǝ́ mʋnɑ pǝ́ kpɛntɩ mǝ nɑ-wɛ tɔɣɔlɛ. Pǝ tɑɣɑ pʋlʋ tɔɔ, ɩsǝnɑɣɑlɛ kʋpɑm nɑ ɩsɑɣɑm pɩɩ siti? Nɑ ɩsǝnɑɣɑ ilim nɑ ɑhoo kɑ́ siti?
15Ɩsǝnɑɣɑ Kilisiti nɑ Ɩlɔɣɔʋ pɑɑ nɩɩnɑ tǝmɑ? Wei ɩ tɛŋ ɩ tɑɑ nɑ Ɩsɔ nɑ wei ɩɩ tɛŋ ɩ tɑɑ nɑ Ɩsɔ tɔ pɑ kɑɑ we?
16Yɑɑ ɩsǝnɑɣɑ Ɩsɔ tǝcɑɣɑlɛ nɑ mɑ tɑ nyɩ ɩsɔnɑɑ tɩɩŋ pɩɩ kɑɑ? Pǝ tɑɣɑ pʋlʋ, tɑ́ kɛnɑ Ɩsɔ weesuɣu tʋ tǝcɑɣɑlɛ. Ɩsɔ mɑɣɑmɑɣɑ yɔɣɔtǝnɑ mpʋ sɩ: Mɑɑ cɑɣɑ pɑ kiŋ nɑ mɑɑ wɛɛ pɑ hɛkʋ. Mɑɑ pǝsɩ pɑ Ɩsɔ nɑ pɑɑ pǝsɩ mɑ yǝlɑɑ.
17Pǝ tɔɔ kɛ́ Tɑcɑɑ yɔɣɔtɑɑ sɩ: Pǝ wɛɛ sɩ ɩ́ kɑ́ lɩɩ pɑ hɛkʋ nɑ pǝ́ yɑsɩ mǝ nɑ-wɛ. Ɩ́ tɑɑ yele nɑ ɑsilimɑ nyǝm nɑpǝlɩ tokinɑ-mɛ. Ɩlɛ mɑ́, mɑɑ mʋ-mɛ.
18Mɑɑ pǝsɩ mǝ Cɑɑ, nɑ mɩ́ɩ́ pǝsɩ mɑ pǝyɑlɑɑ nɑ mɑ pɛɛlɑɑ. Tɑcɑɑ tomɑ tǝnɑ tʋ yɔɣɔtǝnɑ mpʋ.