Text copied!
CopyCompare
Esuquidistu Chuiquin Tantiamete - Codinto yacnocquidon Iste 2

Codinto yacnocquidon Iste 2 6

Help us?
Click on verse(s) to share them!
1Matses bëdambo icmenu, quequin Nuquin Papan chiaid bëpiscudmane queshun ambi tantiamiacpaden nabanec tabadta.
2Nuquin Papan chiampid chuinu. Tantia. “Mibi bëdambo icmete ushë chonoc cuënsho tantiombi. Tantiesa icboedi nëid ushënquio mibi tantiamiombi.” Aden Nuquin Papan chiampicpadomboen bëdamboen tantia. Nëbi Nuquin Papan bëdambo mibi icmenu cac, Ai, cata. Nëid ushënquio ambi aton bacuë icmete ushë nendac.
3Icsamboec tabadquimbi Pabadon Esuquidistu chuibansho, Tantiatiapibi, utsibo quetiapimbocnoc bëdamboec tabadec nebi.
4Nuquin Papan chuimiaid yec nadec tabadebi: Chieshenquio yec dayacquiocquin ambi chiaid chuibenec bëdamboec tabadec nebi. Natiamiaid yec adequi tabadebi.
5Utsin cuesaqui adequi bëdamboec tabadebi. Quënën nauedaqui adequi bëdamboec tabadebi. Nuquin Papan chiaid ëmbi chuibanac cuesnanubi padenquio yec bëdamboec tabadebi. Natia chonoadbudequi adequi bëdamboec tabadebi. Utsi tantiaquin nabanec natia ushcasequi adequi bëdamboec tabadebi. Bunquiec bëdamboec tabadebi.
6Icsainquio yec bëdamboec tabadebi. Nuquin Papan chiaid tantesa uainquio yec bëdamboec tabadebi. Tantiatiapimbo yec utsibo tabadsho isun adembidi Nuquin Papan chiaid chuibenec nebi. Naden chiac tantiatsiash, queshun chuibenembi. Adembidi, Nashunquin chiac tantiatsiash, quequin adquid nashunembi. Nuquin Papan Mayanën tantiamiaid yec bëdamboec tabadebi. Muainquiocquin utsi abimbo tantiec adecbidi tabadebi.
7Abimbo chuibanec tabadebi. Nuquin Papan nadatiambocquin nac adequi bëdamboec tabadebi. Nuquin Papan chiacpadomboen nabanec nebi ma utsibon abi icsaid ëmpanueshun.
8Ëbi chiec: Pabado bëdambo iquec, quenubi adequi tabadebi. Utsin ëbi chuioaic: Pabado icsambo iquec, quenubi adequi bëdamboec tabadebi. Ëbi icsamboen chuinubi adequi bëdamboec tabadebi. Ëbi bëdamboen chuinubi adequi bëdamboec tabadebi. Muaquid nec, quenubi abimbo chuiquid nebi.
9Ëbi isquidëmbi, Ëmbi isacmaid Pabado nec, caqui ëmbi chuibansho tantiaboedo nec caimbi. Ëbi unës uate bunubi abi chuibanec capucuenebi. Mëyanaqui unësabi yec nidebi.
10Unësquio icmiaqui Esuquidistu tantiec bëdambo iquebi. Con na nibëdsho isun adembidi Esuquidistu chuibanec nebi ma Esuquidistu tantiec utsibo bëdambo icpanueshun. Con na nibëdsho isash Nuquin Papan bacuë yec aton natedi con na nec, quequin tantiec tsadebi.
11Chuitiapibi, quenquiocquin ëbi natiaboedtedi mibi chuibanombi. Mibi comapenen tantiaquin ëmbi nabanaid mibi chuibanombi.
12Mibi tantiaquioquin chuibanquid ëbi icnubi ëbi tantiaquin chienquio mimbi iquec.
13Pabadon con bacuëbo caido nebi, quequin mimbi naid mimbi tantiaidbëdta ompoenquiocquin ëbi chuiban, caimbi mibi.
14Esuquidistu tantiesabëdtan icsamboen nainda. Adembidi, chido Esuquidistu tantiesa bedesa dadan. Adecbidi, Dada Esuquidistu tantiesa con champi imenu, quesa aton papa. ¿Nuquin Papan bëdambo icmiaidënda ambi chiaid niacquidbëdtan nabampadic? ¿Nuquin Papan Mayanën tantiamiaidënda Icbo chieshënquidbëdtambi chieshëmpadic?
15¿Esuquidistu Satanaspadquidta nedic? Padenquio. ¿Esuquidistu tantiaquid abi tantiesapadquidta nedic? Padenquio.
16¿Nuquin Papan ambi uaidbimboecnuc matsesën nacnenaid tantiaquidta aton Mayan Nuquin Papan meniaid icpadic? Padenquio. Abi tantiaquid aton Mayan menec. Nuquin Papan dada uamiampid dada uanu. Ista. “Ëbëd icquidbëd iquendabi; Aidbëdi capuebi; Aton papa nebi; Con matses adquido nec,
17Con matses icquin ëbi tantiesan ëmbi chiaid niacacpadomboen nainda. Adecbidi aid icsacpadec tabadenda. Adecbidi icsainquio yec tabad. Adquid ëbëd iquec cho caindambi.
18Adquidon papa iquendabi; Adquid ëmbi con madobëd con champi caid iquendac, quec Nuquin Papa.” Abi tantiaquido nadatiambocquidën aden chiec.