Text copied!
CopyCompare
Kasuyatan to Diyus - 2 Corinto

2 Corinto 6

Help us?
Click on verse(s) to share them!
1Na, su katimbang koy man to Diyus to trabahu din, oghangyuon noy sikiyu no pabogason duon to kinabuhi now sikan kadojow dow kayuuy to Diyus no nadawat now.
2Su meyduon sinuyat no kagi to Diyus no pig-iling, “Pag-abut to aedow no pigbootan ku, pigtabak ku to pag-ampu now. Pag-abut to aedow no igyuwas ku iyu, pigtabangan ku sikiyu.” Na, ligdongi now seini. Seinid to panahon no ognangonon to Diyus. Kuntoon on to aedow no ogyuwason kow din.
3Na, ogdilin koy no wada hinang noy no ogkahinang no balibadan no ogpakabaebag to otow no ogpasakup ki Cristo agun kona masawoy to trabahu noy no kaning Diyus.
4Nasi no inggad nokoy to oghinangon noy, igpakita noy no mgo suguonon koy to Diyus pinaagi to pag-antus to mgo kasakitan dow mgo kakulian.
5Nakabaja koy to mgo pagyatus dow pagprisu aw usahay oggubuton koy. Pigboyajan koy on hilabi tongod to trabahu, aw nakaantus koy to bontas dow kapuyow.
6Ogkamaanan no mgo suguonon koy to Diyus su wada igkasawoy kanami aw namaan koy to Diyus hasta mapailubon koy dow bootan. Pigmanduan koy to Ispiritu Santu, aw hamatuk to gugma noy.
7Iyan ing-anad noy to matuud, aw piggahoman koy to Diyus. Nahimu sikan tibo su pig-isip to Diyus no wadad sae noy, aw sikan to kibali tabae dow taming noy.
8Duon to pagtuman noy to Diyus, meyduon ogpasidongog dow ogsaja kanami, di ogpasikawan dow ogtamajon koy isab to duma. Tinood to og-ikagihon noy, di og-ilingon koy no gayuon.
9Og-iling to duma no wada pues noy no mgo otow, di nabantug koy gihapun. Og-atubang koy to kamatajon, di buhi koy da. Ogkastiguhon koy di wada koy kamatoy.
10Ogkaguul koy, di kanunoy koy gihapun malipajon. Mgo pubri koy, di mahan-in to ogpakadawat to kadojawan no wada katapusan pinaagi kanami. Wada mgo nokoy noy, di ogkaangkon noy to tibo.
11Ay iyu no mgo suun noy diyan to Corinto, wada lipod-lipod to pag-ikagi noy iyu to seini su pighilabi noy sikiyu.
12Wada noy pogongi to gugma noy iyu, di to gugma now kanami pigpogongan now.
13Og-isipon ku sikiyu no mgo anak ku, kaling oghangyu a no bayosan a now to gugma.
14Kona kow ogpagparis to otow no kona no angod now no sakup ni Jesu-Cristo su kona kow ogkahiangod. Su kona ogkaaagpot to madojow dow madoot. Kona isab ogkaaagpot to kaawang dow to kadigyom.
15Kona yagboy ogkahiujun si Cristo dow si Satanas, kaling to sakup ni Cristo wada kayabotan to kona no sakup din.
16To mgo diyus-diyus kona isab og-angajan duon to Bayoy to Diyus. Na sikita, angod ki to bayoy to Diyus su pig-ugpaan ki man to buhi no Diyus. Su mig-iling sikandin, “Og-ugpa a duon kandan. Og-angkonon a dan no Diyus dan, aw og-angkonon ku isab sikandan no kaotawan ku.”
17Kaling pig-ikagihan isab to Diyus to kaotawan din, “Padiyu kow to sikan mgo otow no kona no sakup ku. Kona kow oghinang to maligsom. Na, ogsakupon ku sikiyu.
18Ogkaamoy a now, aw ogkaanak ku sikiyu.” Sikan to pig-ikagi to Ginuu no Yabow no Gamhanan.