Text copied!
CopyCompare
De riidz ni trat cub nu bicy nu Ñgyoozh mbecy: Salmos; Proverbios - 2 Corintios

2 Corintios 6

Help us?
Click on verse(s) to share them!
1Orzeꞌ como tublaazh la ricy den riiñ ni Ñgyoozh, de̱ ya̱ rnishba̱a̱ de̱ lo der nu cueꞌ zaan der nu leew la nap gyicy nu Ñgyoozh der.
2Gun lat de riidz nim nam: Tiem nu rlagy ñi zuub gyidaga̱ ni der. Nunu dzi nu gruu mbañ der, ya̱ locyuuba̱ der, nam. Na na la, tiem nu bzat mi zeꞌ. ¡Dzi na la dzi nu gruu mbañ der zeꞌ!
3Wagyicy de̱ ni tub la coz nu gyicy ñi nu gadza mbecy, gun orzeꞌ cueꞌ nu gnii zi mbecy ni riiñ nu ricy de̱,
4sinu gyicy de̱ tub mod par nu gabe nu nac de̱ mbecy nu ricy coz nu rlagy Ñgyoozh. Gun ornu rzac zi̱ de̱, nu pase̱z ragye̱e̱ de̱. Ornu ricy falt la coz ne̱ de̱, orzeꞌ ragye̱e̱ de̱. Ornu deet rac, orzeꞌ niꞌ ziꞌl ragye̱e̱ de̱.
5Ornu rgaaz dey de̱ ya̱, orzeꞌ ragye̱e̱ de̱. Ornu yet lag de̱ nañ yuꞌ gyiib, orzeꞌ ragye̱e̱ de̱. Ornu ryach mbecy, orzeꞌ ragye̱e̱ de̱. Ornu fers ricy de̱ riiñ, orzeꞌ ragye̱e̱ de̱. Ornu rach pcaal de̱, orzeꞌ ragye̱e̱ de̱. Ornu ran de̱, orzeꞌ ragye̱e̱ de̱.
6Ricy de̱ nu gabe nu nac de̱ mbecy nu ricy coz nu rlagy Ñgyoozh nu nac de coz nu ricy de̱. Rded de̱ nu gyel cacy. Nap yet lag de̱ cuen de coz rishli ni Ñgyoozh. Ricy cup de̱ pase̱z nu losa̱ꞌ. Yet lagy de̱ losa̱ꞌ. Nac du̱ de̱ Espiriit Yon ni Ñgyoozh. Nunu rishli rca̱ de̱ losa̱ꞌ.
7Rshaal de̱ de riidz rishli ni Ñgyoozh. Nunu Ñgyoozh coz ily ricy mi nu nac de̱ ya̱. Nu nac nu byanap de̱ par lo Ñgyoozh, cyiiñ de̱ nu chuco̱o̱ nu de losaꞌ yuum. Gac shet ya̱a̱ de̱ yu. Nunu gac ca̱ de̱ uba̱.
8Yuꞌ nu rca lagy mbecy lo de̱. Zeꞌ yuꞌ gaꞌ nu rgüii tañ dey lo de̱. Yuꞌ nu nap rnii dey nu nac de̱. Zeꞌ yuꞌ gaꞌ nu shiñ rnii dey nu nac de̱. Ricy dey de̱ ya̱ par mbecy rguu, mas rne̱e̱ de̱ coz rishli.
9Mas nap yuꞌ lo dey de̱ ya̱, tees ricy dey de̱ ya̱ par mbecy nu a̱ꞌ yuꞌ lo dey. Mas bi yuꞌ de̱ nu gata̱, tees gabee mbañ de̱. Mas rbic dey cashtig ne̱ de̱, tees wacut dey de̱ ya̱.
10Rlyu nu ricy shni de̱, tees dub laa tiem nap zu lagy de̱. Rlyu nu gyel zi zu̱ de̱, tees ricy de̱ nu yaguaniꞌñ zig mbecy nu nac coz ni Ñgyoozh. Rlyu nu sacaꞌ la coz ne̱ de̱, tees ricy cup de̱ dela coz nu ricy ñi presis.
11Orzeꞌ de ru bicy na nu yuꞌ Corinto, de̱ ya̱ naal la mne̱e̱ lo der. Pshaal de̱ dela coz nu yuꞌ nañ lardo̱o̱ lo der.
12Rila wagyicy zet lagy de̱ lo der, sinu de ru ricy zet lagy der lo̱ de̱ ya̱.
13Orzeꞌ ya̱ rne̱e̱ lo der gal nu rnii tub mbecy nuy iꞌñ yu. “O” nii der ne̱ de̱ ya̱, gal nu de̱ ya̱ “O” ne̱e̱ de̱ ni de ru.
14Cueꞌ gyicy losaꞌ der mbecy nu wayicy cup consuel lo Crisht. Gun mbecy nu nap ricy, wac gac losaꞌy mbecy nu shiñ ricy. Nunu tub zeꞌ nu yuꞌ yaa wac gac losaꞌñ zeꞌ nu cow.
15Gun Crisht walab tub ziꞌl shcab ricy cup mi nu nuras. Niꞌ ziꞌl de mbecy nu ricy cup consuel lom reñaꞌ na shcab ricy cup yu par mbecy nu a̱ꞌ ricy cup consuel lom.
16Nunu yuꞌ wedz ni Ñgyoozh wangyap ñi nu gyicy cup ñi nab. Gun de ub na nac naa yuꞌ wedz ni Ñgyoozh, biñ nu rbic gyel mbañ. Gal nu ub mi mniim: Ya̱ zu̱ lat dey, nunu chesa̱ du̱ dey. Ya̱ naca̱ Ñgyoozh ni dey. Nunu de yu zeꞌ gac dey mbecy ne̱.
17Orzeꞌ bruu der lat mbecy cyi, nunu bruu chu der lat dey, na Ñgyoozh, Shuaan den. Cueꞌ gyicy cuen der cushtom ni mbecy cyi. Orzeꞌ ya shet ica̱ nu gyechaꞌ der lo̱.
18Nunu ya̱ gaca̱ uz der. Zeꞌ de ru gac der iꞌñ gyeeya̱ nu iꞌñ fiñ mña̱a̱. Ni na Ñgyoozh Shuaan den, biñ nu gac gyicy dela coz.