Text copied!
CopyCompare
Luritja Bible - 2 Kurinytjiyalakutu

2 Kurinytjiyalakutu 6

Help us?
Click on verse(s) to share them!
1Katutjaku waarrka nganaṉatju kutu palyarinkupayi, paluru nganaṉanya kutu yaṉṯayaṉṯara rapalpayi. Katutjalu nyurrangarrinya aḻṯururringkula ngulytjuntjala nyurrangarri kutu palumpa tjukarurru nyinanytjaku.
2Katutjaku wangka yirriṯi tjunutja yalatji ngarrinyi, “Katutjaluṉa yirriṯi kuliṉu ngula yaṉangu tjuṯa ngulytjulkitjangku. Kala, kuwarrilpi ngayulu nyurrangarrinya ngulytjulku kutunyurra kana nyinanytjaku.” Yuwa, kuwarri Katutjalu nyurrangarrinya Kurinytjiyanya ngurrara tjuṯa ngulytjulku kana kutunyurra nyinanytjaku.
3Nganaṉatju Katutjaku waarrka tjukarurru palyalkitjangku kutu kulira nyinapayi. Wiyalatju yunytjurringanyi kutjupa tjuṯangku nganaṉanya panypurangkunytjaku. Nganaṉatju kutu Katutjaku waarrka palyalpayi wantinytjawiyangku. Nganaṉanyatju kutjupa tjuṯangku panypurangkula pungkunytjala kutulatju palumpa waarrka palyalpayi. Kutjupa tjuṯangku ngurrkurringkula nganaṉanyatju pungkunytjala kutulatju palumpa waarrka palyalpayi. Palumpa waarrka ngurra tjuṯawana palyalkitjangkulatju puṯu kulilpayi. Nganaṉatju mangarriwiyangku, maniwiyangkuṯarra puṯu kulilpayi palumpa waarrka kutju palyalkitjangku. Nganampatju ngurrkurringkula kutjupa tjuṯangku tjiilangka nganaṉanyatju tjarrpatjunu. Palumpa waarrkaku puntura kuliralatju nganaṉa ngarrirra puṯu yankurripayi.
6Yuwa, nganaṉatju yilta Katutjaku waarrkana tjuṯa nyinanyi. Nganaṉatju tjukarurru kutu Katutjaku nyinapayi. Kutjupa tjuṯangku wiyawanangku kulintjala nganaṉatju tjananya purinypangku wangkarra nintilpayi, parrpaṯu ngurrkurringkunytjawiyangku. Katutjaku kurrunpa nganaṉalawana nyinarra nganaṉanya kurrunpa rapalpayi, yaṉangu tjuṯaku yunytju nyinanytjaku.
7Nganaṉatju tjukarurru Katutjaku wangka tjakultjurinkupayi. Paluru nganaṉanyatju kurrunpa rapalpayi kututja tjakultjurinkula miiṉṯa tjuṯa palyantjaku. Yalatjilatju Katutjaku waarrka tjukarurru palyalpayi.
8Yaṉangu tjuṯangka nganaṉatju tjanala tjukarurru watjalpayi, ngunytji watjantjawiya. Yaṉangu kutjupa tjuṯangku nganaṉanyatju puḻkapungkupayi. Yaṉangu kutjupa tjuṯangku nganaṉanyatju panypurangkupayi. Kutjupa tjuṯangku yalatji nganaṉanyatju panypurangkupayi, “Puulalungarri ngunytji watjalpayi, tjukarurru watjantjawiya.”
9Yaṉangu tjuṯa ngurra tjuṯawana nyinarra nganampatju ngurrpa nyinanyi, kanya nyurrangarri nganampatju ninti nyinanyi. Yaṉangu ngurra kutjupa ngurrara tjuṯangku yalatji watjalpayi, “Tjinguru yunytjuwiya tjuṯangku Puulanyangarri mirri pungu, tjinguru tjana kana nyinanyi.” Mirriwiya kanalatju nyinanyi. Yuwa, paluru tjana nganaṉanyatju pungkula kutju wantipayi, mirri pungkuwiya.
10Watjilpalatju nyinarra yunypalpi nyinapayi. Kutulatju yunypa nyinanyi. Maralpa tjuṯa nguwanpalatju nyinarra Katutjaku wangka Yiitjunyatjarra nintilpayi. Wangka palunya yaṉangungku kulira walytjarringkula paluru yunypalingku nyinaku, mani tiṉaku yunypalingku nyinanytja nguwanpa.
11Kurinytjiyanya ngurrara tjuṯa, wangka ngaatjanyaya kulila! Tjukarurrulatju nyurrangarrinya watjaṉi, nganaṉatju yilta nyurrangarrimpa yunytju nyinanyi.
12Wiyalatju ngunytji wangka panyapa watjaṉi, iltalatju nyurrangarrimpa yunytju nyinanyi. Kutjupa tjuṯanyurra tjinguru wiya nganampatju yunytju nyinanyi.
13Nyurrangarri ngayuku pipirri walytja tjuṯa nguwanpa nyinanyi. Ngayulu nyurrangarrinya yalatji watjaṉi. Yuwankarranyurra nganampatju yunytju nyinanytjaku.
14Yiitjuku wangka wantipayi tjuṯangka wiya nyurrangarri tjanala tjungurringkula walytjarrinytjaku. Tjinguru yaṉangu kutjupa kuya palyalpayingka tjungurringkula walytjarriku. Yalatji walytjarringkula paluru kuya kutu palyalku. Wiya nyurrangarri tjanala tjungurringkula walytjarrinytjaku.
15Yiitju Kurayitjanya wiya mamuku mayutjuku wangka kulira palumpa walytjarringu. Yiitjuku walytja tjuṯa wiya tjungurringkula walytjarrinytjaku Yiitjuku wangka kulira wantipayi tjuṯangka.
16Katutjanya nguwanpa wiya Yiitjuku walytjangku waḻkuntjaku, Katutjanya kutju ilta waḻkuntjaku. Katutjalu nganaṉanya ngangkari tiṉatjarrangku kanyiṉi. Paluru yalatji watjaṉu, “Yaṉangu tjuṯangka ngayulu tjanala nyinaku. Mayutju tiṉangku ngayulu tjananya yaṉṯayaṉṯalku. Tjana ngayuku walytja tjuṯa nyinaku.”
17Katutjalu piyuku wangka yalatji watjaṉu, “Ngayuku wangka kulira wantipayi tjuṯa tjananya wanti!, kuya tjungurringkula palyantjawiya. Yalatjinyurra tjukarurru nyinanytjala ngayulu ngangkari tiṉatjarrangku nyurrangarrinya ngulytjulku. Nyurrangarrimpa paapa ngayulu nyinaku. Nyurrangarri ngayuku walytja nyinaku, katja, yuṉṯalpa nguwanpa.”