Text copied!
CopyCompare
Rau Ke Maro - 2 Korin

2 Korin 6

Help us?
Click on verse(s) to share them!
1Am nga amyei Maro ene ye urata yo ki i, le amwete le koomam mede ye betanga pang nen, matamim kalang dook leu, ole nen ngan dada dook mata ke Maro yo lono pang a iyeii pang koot i, in ole itara kanono tiap.
2Yesoo, Maro iwete nen, “Kagoro lal moolmool yo ataru be lok pang a ayei dada dook mata pang ye i, ngan le alongo tangini kiang. Inbe ye ke yo ataru be akau ang a apamulang ye so dook tiap yo be igarungang in nga, ngan alonang.” Le kakamata, lal yo katai i, in nookoot nga tagoro lal yo be Maro lono pang di tooltool a iyei dada dook mata pang di ye i. Inbe nookoot katai nga, ngan la lal yo be ikap di tooltool a ipamulu di ye so dook tiap yo be igarung di i.
3Am nga lomam be di tooltool lodi dook tiap ye urata kiam yo amyeii, in tiap. Nen le ke be amyeie so sa be nen ngan amtarkala di tooltool sa kedi ye a be nen ngan timol, nga tiap.
4Ngan nen le urata tina le imot yo amyei nga, ngan amkapye be ampatnai am pang di ben am nga kapraingi ke Maro. Le tina amkodo le tutube a amsolo urata moonoo masngana matana matana yo pompombe pang yam nga. Le moolmool, di tooltool tiyei dada dook tiap be tigarungam ye, inbe tikap masngana pam le lomam galanga ye soo dada yo be amyeii i, in tiap.
5Inbe di tooltool tirau am, inbe titaram lo amken rumu dook tiap ke di talnga dikidiki lono. Inbe di koi kiam tiwete kalakalam a tipadingam. Inbe am nga amrau am ye urata, inbe ye lal kapala ngan amken dook ye matamam tiap, inbe amsu pitolo.
6Bong am nga amyepe le tinimam igalanga ye Maro matana, inbe amyei urata ki ye lo galanga yo ikauu pam i. Inbe am nga amkap malmal tarai pang di tooltool tiap, bong amyei dada dook mata pang di leu. Inbe amtoo gurana ke Maro Amunu Silene, le lomam pang di tooltool mai san moolmool.
7Inbe am nga, gurana ke Maro iyepe yam le amwetewete pang di tooltool ye betanga moolmool ke bingi dook mata leu. Inbe amparama dada dook mata noonoonoo yo ke Maro nga, ngan le ben amkap dawa kiam ke patokongo ye baemam oonoo inbe ye ngas.
8Inbe ye urata ke Maro yo amyei nga, ngan di tooltool kapala tiyitmak emam ye, e di kapala ngan tirautoo emam du lopo, inbe di kapala ngan tikaua bingi dook mata pang di tooltool ye urata kiam, e di kapala ngan tiwete mur yam. Inbe am nga amwete betanga moolmool, bong di tooltool kapala ngan tiwete be am nga amkap lungunu.
9Inbe di tooltool kapala ngan lodi galanga yam, bong tiwete be am nga taukamam emam. Inbe kanakana ngan so moonoo be pombe pang yam nga, ngan amyeisa ole ammata, bong ngan tiap, nga amyepe matamam rrene go. Inbe di tooltool tiyemenai am le dook tiap, bong tiraumatam le ammata tiap.
10Am nga lomam modoko, bong kanakana ngan lomam iken dook mata le lomam ponana dook lapau. Inbe am nga ballingamam tiap, bong am nga amlon di tooltool alunu le ballingadi ye bingi dook mata yo amweteweta pang di i. Inbe am nga taukamam so, bong am nga dawa ben so kiam alunu san.
11Ang di tooltool ke Korin nga, ngan am nga amwete pobe pang, le amtarkoo betanga sa yang tiap. Inbe am nga amraia lomam le imot pang.
12Inbe am nga amtiukala dada kiam yo be lomam pang ye mai san, in tiap, bong ang ngan la katiukala dada kiang yo be lomim pam ye mai san i.
13Ngan akamatang dawa ben di natuk moolmool nga, le awete pang nen, kayei dada yo ben amyei pang nga le lomim pam mai san lapau.
14Ang inbe di tooltool yo titara lodi medana pang Kirisi tiap nga, ngan kaye di ngan gaongo tiap, le kin kaye di kagauagaua be. Nga yelei, dada dook mata yo noonoonoo nga, ngan iye dada dook tiap yo ke yeingi noonoo ngan tigaua, too? Inbe nga yelei, sul iye todo ngan ke be yaru tigaua, too?
15Inbe nga yelei, Kirisi iye Satan ngan tigaua lodi ye urata kidi, too? Inbe nga yelei, tool yo itara lono medana pang Yesu in be iye tool yo itara lono medana tiap i, in yaru tiparere, too?
16Inbe nga yelei, bareme mai ke sungunu pang Maro, in ni dook mata ke be di tooltool titar kai padodo kidi ye, too? Tiap yege! Idi nga la bareme mai ke sungunu pang Maro yo iyepe nen le taukan motingi i. Le dawa ben tina Maro iwete nga, “Au i ole ayepe ye di, inbe apa kataunu ye di. Inbe au i ole ayei Maro kidi, inbe di ngan ole tiyei ben di tooltool kiau.”
17Nen le Tool Mai iwete pang di tooltool ki nen, “Kayege di tooltool yo ke yeingi noonoo nga, a kala kayepe manga mooloo ye di. Inbe katoko so kidi yo giri leu, nga be. Ngan la be lok ponana yang a akau ang pau nga.”
18Inbe Tool Mai, yo gurana ki mai san le illos so nga le imot i, in iwete nen, “Au ole ayei ben ang Tamamim, inbe ang ngan ole kayei ben di natuk garup le tamoto.”