Text copied!
CopyCompare
Gwo Ma Arumgimis - ṮAKWIIN

ṮAKWIIN 12

Help us?
Click on verse(s) to share them!
1Dhali Tap̱a ki owa Abraam gwo mo ki: Yaku/ mo ’peni bampam pini mo dhali ’peni ’kwani ma bas pini mo dhali ’peni ’kwani gi gu’b gi cim mo e mony’cesh jin miga/ ṯor /e mo.
2Dhali aha/ mina kar /e mmota dhan kal caaca mo, dhali aha/ mina ’bor /e mii mo dhali kar gway pini ki ca mo, wakan ki /e mini ’bora ’bor mii mo be.
3Aha/ mina ’bor uni gwansan mii gun ’bor /e mii mo dhali a’di jin midi jee /e mo tani aha/ si’da/ mina jee a’di mo, dhali gom /e mo tani arisa waḵ gi ’kwaniny’cesh mo tani minu ’bor mii mo be.
4Wakan Abraam yaki’d mo, me’d gwo jin ṯorkina Tap̱a a’di mo dhala Luuth yaki’d nyaḵki a’di mo. Dhala Abraam ’kokini yili issi kwara i’ce’dka ḵarpa’c mo me’d jin yakina a’di ’peni Pan Haraan mo.
5Dhala Abraam ki susa Saray jin ta ashim piti ilu/ mo dhali a’di ki susa Luuth jin ta’da ’ci ma kam mo, dhali aris tom buni kun tana uni mo uni gun tulkina uni is mo, dhali ’kwani kun gamkina uni e Pan Haraan. Dhali uni ’kakin ka ji sho’k ki bway Paŋ Kanaan mo. Ki uni p̱u’dkin e bampa/ gi Paŋ Kanaan mo tani
6Abraam yaki’d ki tur mo e mony’cesh gi bampa/ gi Pan Shakiim mo e dhan cwa jin wana e ka ’kwaṯṯan ma Murah mo. Ka cim c̱aan mo tani ’Kwani Kanaan uni ’kokin e mony’cesh c̱aan mo.
7Dhali yan’ko’d Tap̱a ki piya Abraam i is mo mmo/o gwo mo ki: E emen pini mo tani aha/ mina c̱i uni mony’cesh yansan mo. Wakan a’di ki nyaŋ agwaṯa/ jin miinuwa bas gom Tap̱a mo a’di jin piki a’di i is mo.
8Yan’ko’d a’di ki thoṯẖ mo e ’kuwosha turga/ gi mom’pesho’k ki Pam Beeṯ/iil mo dhali a’di ki ṯel gu’b burrinyem piti mo. Pam Beeṯ/iil di’d ka bora luŋgu’b mo dhali Pa Aay di’d ki ’ban gi mom’pesho’k mo. Dhali e mun mo tani a’di ki nyaŋa gwaṯa/ jin miinuwa bas gom Tap̱a mo dhali a’di ki yuḵ gway gi Tap̱a mo.
9Dhala Abraam yaki’d mo mmoya naskina/ ’kup̱ ki bway ma Januub mo.
10Dhali ṯe/ ’koshki’d kagahara mo e bampa/ mo. Wakan Abraam yaki’d ka luŋgu’b e Pam Masir mo ki ya yilkina/ mo e mun mo, haali/ ṯe/ shina ’kosh ki shi/ e bampa/ mo.
11Ki a’di ’dishi ’twa/ mmocic̱ Pam Masir mo tani a’di ki owa Saray gwo mo, a’di jin ta ash mo ki: Aha/ misha ki /e tana ’bom jin ta jaro/ ki jaro/ jin ṯeru/ mo.
12Dhali ki ’Kwani gi Pam Masir mini p̱ar /e e mo tani uni mini o gwo mo ki: A’di yansan ta ashim piti mo. Dhali yan’ko’d uni mini ’kosh aha/ jwa mo, hili /e minu dhalku/ ki e mo.
13/E mini o gwo mo ki /e ta ’bwah pem mo, ma a’di mina to ya ki ’bore/ gom aha/ gom /e mo, dhali mondiki/em pem minu ’tash ’twa/ ’peni jwa gom miim pini mo.
14Ka Abraam cic̱ki’d e Pam Masir mo tani ’Kwani gi Pam Masir p̱arki’da ’bom e jin shina jaro/ i me’d mo.
15Dhali ki iya/ ma P̱irawn p̱arki’da yim e mo tani uni maŋkina yim eya P̱irawn mo. Dhala ’bom suskunu mo e gu’b ma P̱irawn mo.
16Dhali gom gway ma yim mo tani a’di mii’d ki ’bore/ goma Abraam mo. Dhali a’di ta’dki ḵa’bal mo dhala morbip̱ mo dhali gwasin thuluny mo dhali ’kwani kun miina ṯu’c mo dhali c̱iŋkina/ nyara/ mo dhali kuman thuluny mo dhali kalman mo.
17Hili Tap̱a ’koshki’da P̱irawn dhali kuŋ gu’b piti ka dhan ’ba’th jin wo’cki is she/ mo goma Saray, a’di jin ta asha Abraam mo.
18Wakana P̱irawn yuḵki’da Abraam mo dhali o a’di gwo mo ki: Atinta tan jin miina /e aha/ kan mo? Atinta dina /e ki ṯor aha/ gwo ka yim ta ashin mo?

19Dhali /e ki ’cur gwo o ka yim ta ’bwahan mo. Wakan aha/ de budha yim mo mmo’taki ta ashim pem mo. Shwane/, ashim pini a’dan mo. Susi a’di mo, dhali iiyi mo.
20Dhala P̱irawn ki c̱i gwaṯẖ gwoŋḵan mo isi gom a’di mo. Dhali uni ki kar ki a’di ’pen mo nyaḵki ashim piti mo dhali aris to kun tana a’di mo be.