1Dhala Yakuub yaki’d mo e bway piti mo ntagi a’di p̱u’dki’d mo e ’kwani gi bampa/ gi mom’pesho’k mo be.
2Ki a’di hilki mo mo tani a’di p̱arki jis yi’de/ e mo e bwam bunto mo dhali hili mo mo ma, adhana ma’diny ḵa’bal ikwara kun ishkini shemen piti mo haali/ ’peni jis yi’de/ c̱aan mo tani ama’diny ḵa’bal wolkunu yi’de/ mo. Dhali wosh gi ’twaŋkal jis yi’de/ yan mo tani a’di caaca mo be.
3Dhali ka ma’diny ḵa’bal tulkunu isi monṯal ’de/ imaṯṯaan mo tani imanhil ḵa’bal ki ’daŋkal wosh ’peni ’twaŋkal jis yi’de/ mo dhali wolki ḵa’bal yi’de/ mo dhali karki wosh ka nyaŋ’ko’d mo e mom piti mo e ’twaŋkal jis yi’de/ mo.
4Yakuub ki o uni gwo mo ki: Ikam pema um iiyin ’peni mana mo? Uni ki thoḵ a’di gwo mo ki: ’Peni Pan Haraan mo be.
5A’di ki o uni gwo mo ki: A/um mishina Laabaan jin ta ya/ ma Nahur mowa? Uni ki thoḵ a’di gwo mo ki: Aman mishkina a’di mo be.
6A’di ki o uni gwo mo ki: A/dhali a’di ’bora is mo ’te/ tana? Uni thoḵki a’di gwo mo ki: A’di ’bora is mo, dhali hili mo mo ma, aRahiil jin ta ’bwa/ p̱u’dki’d mo nyaḵki ḵa’bal mo be.
7A’di ki o gwo mo ki: Hili mo mo ma, atente/ caaca kagahara mo, a’di diki ta atente/ jin minu tul to/e isi monṯal ’de/ mo, woli ḵa’bal yi’de/ mo ma dhali iiku/ mo mmoc̱i uni ashon dhii/i’d mo.
8Hili uni thoḵki a’di gwo mo ki: Aman mola mii ntaga ma’diny ḵa’bal minu tul isi ’baar mo imonṯal ’de/ mo dhali wosh si’da/ minu ’daŋkalu/ mo ’peni ’twaŋkal jis yi’de/ mo dhali yan’ko’d aman ki wol ḵa’bal yi’de/ mo be.
9Ki a’di mal ma ṯor mmoṯor ki uni mo tani Rahiil p̱u’dki’d mo nyaḵki ḵa’bal gi com haala yim a’di ita’da manhil uni mo be.
10Dhali ka Yakuub p̱arki’da Rahiil e mo a’di jin ta ’bwa/ ma Laabaan jin ta’da kam gi kum mo dhali ḵa’bal ma Laabaan jin ta’da kam gi kum mo tani Yakuub seki mis mo dhali ’daŋkal wosh mo ’peni ’twaŋkal jis yi’de/ mo dhali wolka ma’diny ḵa’bal ma Laabaan yi’de/ mo a’di jin ta’da kam gi kum mo be.
11Dhali yan’ko’d a’di p̱iki’da Rahiil ’twa/ mo dhali ’ther dhan ko kagahara mo be.
12Dhala Yakuub ṯorki’da Rahiil gwo mo ki a’di ta’da bas gi com mo dhali a’di si’da/ ta ya/ ma Rip̱ka mo, dhali ayim guski’d mo dhali ṯor com gwo mo be.
13Ka Laabaan ciḵki gwom ’borga/ goma Yakuub jin ta ya/ gi ’bwaham mo tani a’di guski’d mo mmogam a’di ’kup̱ mo dhali kar a’di mmota isa kony mo dhali p̱i a’di ’twa/ mo dhali susi a’di bway gu’b piti mo. AYakuub ṯorki’da Laabaan aris to gwansani ’baar mo be.
14Dhali aLaabaan ki o a’di gwo mo ki: Ka jiŋ gana/ /e tana simam pem mo dhali buŋgwar is pem mo. Dhali a’di c̱a’bki’d nyaḵki a’di ka appe i’de/ mo.
15Dhali yan’ko’da Laabaan ki owa Yakuub gwo mo ki: Haali/ /e tana bas pem mo tani a’di ’boro’da jin mina /e imii aha/ aṯu’c ki me’d mowa? Ṯoraa/ gwo mo gom tom pini jin mina /e gam ki ji gi mina /e ta mo tani midi ta atinta mo?
16Dhala Laabaan a’di ita gi i’bwa/i su/ mo: gway gi ’bwa/ jin ca’d mo tani a’di iyuḵu ka Le/ah mo dhali gway gi ’bwa/ jin gwa’da’d mo tani a’di iyuḵu ka Rahiil mo be.
17E ma Le/ah mol mo hil ki ’bore/ mo haali/ em piti ’cwara’cwar mo, hila Rahiil a’di ta jaroŋ gana/ mo dhali enu kagahara mo be.
18Yakuub enki’da Rahiil mo dhali a’di ki o gwo mo ki: Aha/ mina mii /e aṯu’c ki yili pesu/ mo gom ’bwa/m pini jin ta’da Rahiil jin gwa’da’d mo be.
19Laabaan ki o gwo mo ki: A’di ’boro’d ki ’bor gana/ mo gom aha/ mo mmoc̱iki /e a’di mo, ma mo diki c̱i a’di ’kwanin tiya mo, c̱a’bi /e nyaḵki aha/ mo.
20Wakana Yakuub miiki’da ṯu’c ki yili pesu/ goma Rahiil mo dhali uni wana mo i e ka cim midi diki ta rash rash gom mo/en jin enkina a’di ayim mo be.
21Yan’ko’da Yakuub oki’da Laabaan gwo mo ki: C̱iyaa/ a’bom pem mo ki aha/ mina ya ayim mo haali/ mom pem ’baarki’d mo be.
22Wakan aLaabaan tulki’da aris ’kwani gi mo c̱aan isi monṯal ’de/ mo dhali shwa to jin yuḵuwa yuḵ ka tul ’kup̱ mo.
23Hili mom’pimpili/ mo tani a’di ki bu’th ’bwa/ ka Le/ah dhali suski a’di aYakuub mo dhali a’di yaki’da yim mo be.
24(Laabaan c̱iki nyarany c̱iŋkinam piti jin ta’da Silp̱ah e ’bwa/m piti ka Le/ah mo mmota c̱iŋkina/ nyara/ ma yim mo.)
25Dhali e mon’thamo/ mo tani hili mo mo ma, aLe/ah ayim ta a’di jin c̱ikunu a’di mo dhala Yakuub ki owa Laabaan gwo mo ki: Dika/ ki miiki /e aṯu’c goma Rahiil mo ’taa? Atinta he’kkina /e aha/ e wakan mo.
26Laabaan ki thoḵ a’di gwo mo ki: A’di yisa miinu wakana e bampam bam mo mmoc̱i jiŋ gwa’da’d nṯwa/a/ mmodhal a’di ma bwanyara/ i’ko’d mo.
27Thimi adhas nyaḵki jan ’de/ yan mo dhali aman mina c̱i /e jaŋ kamu/ si’da/ mo e mii jin mina /e doḵ/e doḵ sho’k mmomii aha/ to ki yili pesuŋ kamu/ mo be.
28Yakuub miiki’d kan mo dhali a’di ’baarki’da dhas ’de/ mo. Yan’ko’da Laabaan c̱iki a’di ’bwa/ ka Rahiil mo mmota ash mo be.
29(Laabaan c̱iki c̱iŋkina/ nyaram piti ka Bilhah ki ’bwa/ ka Rahiil mo mmota c̱iŋkina/ nyara/ ma yim mo.)
30Wakan aYakuub yaki’d mo eya Rahiil mo si’da/ dhali a’di enki’da Rahiil mmobola Le/ah e mo, dhali a’di miiki’da Laabaan aṯu’c mo gom yili pesuŋ kamu/ mo be.
31Ki Tap̱a p̱arki mo e ka Le/ah shi/kunu i e mo tani a’di ḵa’dki’da yim bwama dho’th piti ’twa/ mo, hila Rahiil a’di ta’da burum mo be.
32Dhali aLe/ah a’di bwaaki’d mo dhali dho’th ya/ mo dhala yim ki yuḵ a’di gway ka Ra/ubiin mo haala yim oki gwo mo ki: Haali/ Tap̱a hilki’d ap̱o/ to kun wo’cki aha/ is she/ mo, shwane/ akaṯẖim pem midi en aha/ ka jiŋ gana/ mo be.
33Ayim a’di bwaaki’d doḵ/e mo dhali dho’th ya/ mo dhali o gwo mo ki: Haali/ Tap̱a a’di iciḵki gwo mo ki aha/ shi/kunu i e mo, a’di si’da/ ic̱ikina a’di aha/ ya/m pem yan mo dhala yim yuḵki a’di gway ka Shim/uun mo.
34Doḵ/e ayim bwaaki’d mo dhali dho’th ya/ mo dhali o gwo mo ki: Shwanesan mo akaṯẖim pem midi gam is piti me’d ki aha/ mo haali/ aha/ dho’thkina a’di uc̱iŋgwaṯẖi kwara mo. Gom gwo gi wakan mo tani a’di iyuḵkunu a’di gway ka Lawi mo.
35Dhali ayim bwaaki’d doḵ/e mo dhali dho’th ya/ mo dhali o gwo mo ki: Aha/ mina maŋ Tap̱a mo ganne/ mo. Gom gwo gi wakan mo tani a’di iyuḵkunu a’di gway piti ka Yahuuda mo, dhali yan’ko’da yim daḵki’da dho’th mo be.
