1Dhali shwane/ ṯe/ p̱u’dki’d mo e bampa/ mo mmowaki ṯen dhamo/ mo me’d jin din ma Ibrahiim mo. Dhala Is/hak a’di yaki’d mo e Pany Jaraar mo eya Abimaalik jin ta’da maliḵ gi ’Kwani P̱ilisthiin mo.
2Dhali Tap̱a piki a’di i is mo, dhali o a’di gwo mo ki: Dhalku/ ki ya ka luŋgu’b bway Pa Masir mo. Hili c̱a’bi /e eya ’cesh jin miga/ ṯor /e mo.
3Tayi ac̱a/ eya ’cesh yan mo dhali aha/ mina di nyaḵki /e mo dhali ’bor /e mii mo, dhali gom /e mo dhali gom emen pini mo tani aha/ mina c̱i aris bampa/ gwan ki /e mo dhali aha/ mina thim gwom pem jin oka/ is mo mmothul gwo me’da p̱o/ goma Ibrahiim jin ta’da babam pini mo be ki:
4Aha/ mina mar emen pini is mo me’da cul gi momis mo dhali aha/ mina c̱i emen pini aris bampa/ yani ’baar mo. Dhali gom gway gi emen pini mo tani aris kal gi mony’cesh mini ’bor is buni mii ki uni mo be.
5Haala Ibrahiim haki gwo gi ’twam pem e mo dhali dhu gwo kun ḵanka/ a’di mo dhali gwoŋḵan pem mo dhali gwoŋḵan pem kun c̱inu ki ’twa/ mo dhali gwoŋḵan pem jin c̱inu mo be.
6Gom gwo gi wakan mo tani Is/hak a’di c̱a’bki’d mo e Pany Jaraar mo be.
7Ki ’kwaniŋ gwaṯẖ gi mo yan doṯki a’di gwo mo gom ash mo tani, a’di ki thoḵ gwo mo ki: Ayim a’di ita ’bwah pem mo, haali/ a’di ḵo/ki is mo mmo/o ki a’di ta ashim piti mo isi ciki/ ’kwani gi mo yan imini ’taki ’kosh a’di jwa mo gom gway ma Rip̱ka mo, haala yim dina jarom piti ki she/ mo mmohil mo be.
8Ki a’di diki’d e mun ki rash rash mo tani Abimaalik jin ta’da maliḵ gi ’Kwani P̱ilisthiin mo tani a’di hilki mo ki e shu’d gu’b mo dhali p̱ara Is/hak e mo mmolo’bkina a’di aRip̱ka jin ta ash mo.
9Gom gwo gi wakan mo tani Abimaalik yuḵki’da Is/hak mo dhali o a’di gwo mo ki: Hili mo mo ma, ayim ta ashin mo ba/, kata jan ona /e gwo oki ayim ta ’bwahan mo? Is/hak ki thoḵ a’di gwo mo ki: Haali/ aha/ kulumkina gwo ibwa mo oki aha/ mina wu mo gom gwo ma yim mo be.
10Abimaalik ki o a’di gwo mo ki: Atinta a’dan jin miikina /e wakan ap̱o/ aman mo, wathiŋ kamun ’de/ wariba/ midi ’taki ya mo isha ’bom pini mo dhali /e mini ’taki guyu/ mo jin thamu mii ap̱o/ aman mo be.
11Gom gwo gi wakan mo tani Abimaalik ki ruma aris ’kwani ’baar ki gwo mo mmo/o ki: A’di yin jin midi ta wathi/ yan is ki cwa mo walla ashim piti mo tani a’di minu ’kosh jwa mo be.
12Dhala Is/hak siki to mo e bampa/ yan mo dhali a’di ’ciṯẖki to mo ki yila ’de/ yan mo ki iss ’kwanimpa imudhe’d mo. Haali/ Tap̱a a’di ’borki a’di mii mo be.
13Dhali wathi/ warki’d ki wathimpa mo dhali gama ris to ki nyanye/ kun markunu is mo ntagi a’di ta wathi/ jin eḵa/ ’pen ki eḵ mo.
14A’di taki’d ga ma’diny ḵa’bal kun jinu mo dhali bip̱ mo dhali aris c̱iŋkina/ tana ris mo kun ’kokin e gu’b piti mo, dhali gom gwo gi wakan mo tani ’Kwani P̱ilisthiin uni taki dhap̱an ap̱o/ a’di mo be.
15(Dhali shwane/ ’Kwani P̱ilisthiin uni ’dap̱kina aris jis yi’de/ ’twa/ ka dihar mo uni kun c̱wanykin ma ris c̱iŋkina/ gi com ka tee ma babam piti ka Ibrahiim mo.)
16Dhali Abimaalik ki owa Is/hak gwo mo ki: Yaku/ /e mo ’peni aman mo haali/ /e ta wathi/ jin c̱a’bki dem dem mmobol am e mo.
17Gom gwo gi wakan mo tani Is/hak yaki’d mo ’peni maṯṯaan mo dhali nyaŋ gu’b burrinyem piti e embul wosh ma Jaraar mo dhali c̱a’bi mun mo be.
18Dhala Is/hak c̱wanyki jis yi’de/ doḵ/e mo e mo jin ’thissa/ c̱wanykunu uni ka tee ma Ibrahiim jin ta com mo haali/ ’Kwani P̱ilisthiin ’thissa/ ’dap̱ki uni ’twa/ ka dihar mo ’ko’di jwa ma Ibrahiim mo dhali a’di yerki uni gway mo me’d jin yerkina com uni gway mo be.
19Hili ki c̱iŋkina/ ma Is/hak c̱wanyki jis yi’de/ mo e embul wosh mo tani uni gamki jis yi’de/ kun kasha yi’de/ e ki kash mo.
20Dhali imanhil ḵa’bal gi Pany Jaraar uni walkin ki imanhil ḵa’bal ma Is/hak mo mmo/o gwo mo ki: Yi’de/ ta jim bam mo be. Dhali gom gwo gi wakan mo tani a’di yuḵki jis yi’de/ yan ki gway mo ka Isig haali/ uni askin gom a’di mo be.
21Dhali yan’ko’d uni c̱wanyki jis yi’deŋ kamu/ mo dhali uni si’da/ walkina p̱o/ c̱aan mo. Dhali gom gwo gi wakan mo tani a’di ki yuḵ jis yi’de/ yan ka Sithnah mo.
22Dhali a’di so’kki’d mo ’peni mun mo dhali c̱wany jis yi’deŋ kamu/ mo dhali ap̱o/ c̱aan mo tani uni ’koki wal mo, dhali gom gwo gi wakan mo tani a’di ki yuḵ jis yi’de/ yan gway ka Rahubut mmo/o gwo mo ki: Tap̱a a’di ithosonki ana embul mo mo dhali ana shwane/ mina ḵal mamana dho’th mo e bampa/ yan mo be.
23’Peni maṯṯaan mo tani a’di yaki’d ka gagamis mo e Pan Birsaba mo be.
24Dhali Tap̱a piki a’di i is mon’thiny mo dhali o gwo mo ki: Aha/ tana Arumgimis ma Ibrahiim jin ta’da babam pini mo, dhalku/ is ki ḵo/ mo haali/ aha/ mina nyaḵ di ki /e mo dhali ’bor /e mii mo dhali mar emen pini is mo gom gway gi c̱iŋkinam pem ka Ibrahiim mo be.
25Gom gwo gi wakan mo tani a’di nyaŋki’da gwaṯa/ jin miinuwa basa ’cesh mo e mun mo dhali yuḵ gway gi Tap̱a mo dhali thum gu’b burrinyem piti i mun mo. Dhali e mun mo tani c̱iŋkina/ ma Is/hak uni c̱wanyki jis yi’de/ ka ris mo.
26Dhali yan’ko’d Abimaalik yaki’di a’di ’peni Pany Jaraar mo nyaḵka Ahussaat jin ta’da amanlogom a’di ki gwo mo dhala P̱ikul jin ta’da ’kaŋ’kup̱ gom ’kwani ma meem piti mo.
27Is/hak ki o uni gwo mo ki: Atinta iiyina umi aha/ mo? ’Kona um ki misha ki um shi/i aha/ i e mo dhali ur aha/ mo ’peni um mowa?
28Uni ki thoḵ a’di gwo mo ki: Aman misha eya tenteŋ gana/ ki Tap̱a di’d nyaḵki /e mo, a’di i/ona aman gwo jin waki cise/ mo ki: Dhalki mo jin minu mii thul gwo me’da p̱o/ midi mii di mo e bwaman am dhali /e mo, dhali dhalki ana gama gwo jin gamu me’d mo nyaḵki /e mo.
29Ki /e mini diki mii to shiyi’da kamu/ ap̱o/ aman mo, me’d jin ’kona aman ki ta /e is ki cwa mo dhali aman si’da/ ’konaki mii toŋ kamu/ mo hili jasi tom ’boro’d mo dhali hashki /e mo ki moŋḵu’th is mo. /E shwane/ ’borkina Tap̱a mii mo be.
30Gom gwo gi wakan mo tani a’di miiki uni tonṯe/ jin shwanu ka tul ’kup̱ mo dhali uni shwaki to mo dhali uni p̱iki to mo be.
31Dhali mon’thamo/ mo tani uni cuki mis mo ki jahanne/ mo dhali thul gwo me’da p̱o/ ka rem’kup̱ mo, dhala Is/hak dhuki uni ’pen mo e bway buni mo dhali uni iikin mo ’peni a’di ki moŋḵu’th is mo be.
32Dhali ’pena cim ’de/ yan mo tani c̱iŋkina/ ma Is/hak p̱u’dkin mo dhali ṯor a’di gwo gom jis yi’de/ kun c̱wanykina uni mo dhali o gwo mo ki: Aman gamkina yi’de/ mo be.
33A’di yuḵki jis yi’de/ yan gway mo ka Shibah mo. Gom ’pemen gwo gi wakan mo tani a’di iyuḵkunu ’peŋkuman bampa/ yan gway ka Birsaba ntagi shwanesan mo be.
34Me’d jin ’kona yili Iisu i issu/ mo tani a’di bu’thki ash mo jin yuḵu gway ka Yahudiit jin ta ’bwa/ ma Biiri jin ta Wathi/ Hiṯẖṯẖa mo dhala Basmah jin ta ’bwa/ ma Iiluun jin ta Wathi/ Hiṯẖṯẖa mo.
35Dhali uni gwan mii moŋ’ko ap̱owa Is/hak dhala Rip̱ka mmoḵa/a ḵa/ mo.
