1Ka Is/hak taki’da dhan mo dhali em piti si’da/ dhuruma/ dhurum wakan mo a’di imolkina a’di mo mmop̱ar e ki ’bore/ mo, a’di iyuḵkina a’di a/Iisu mo a’di jin ta ya/m piti jin ca’d mo dhali o a’di gwo mo ki: Ya/m pema, dhali a’di ki thoḵ a’di gwo mo ki: Aha/ dina imahan mo.
2A’di ki o gwo mo ki: Hili mo mo ma, aha/ tana adhan mo dhali aha/ dinaki misha cim jwam pem mo.
3Hili shwane/ buthi to gi mo/as pini mo dhala kulp̱em pini dhala bwam pini mo dhali ya ka pije/ e mombwaasho mo dhali par tom bwaasho mo gom aha/ mo.
4Dhali thosoni shum jin ’kunya’kuny gom aha/ mo, a’di jin enka/ mo dhali ḵali a’di ki aha/ ki aha/ mina shwa a’di mo dhali ’bor /e mii nṯwa/a/ ki aha/ dinaki wu mo be.
5Dhala Rip̱ka ciḵki gwo yan me’d jin okin ma Is/hak gwo e ya/m piti ka Iisu mo. Gom gwo gi wakan mo tani Iisu a’di yaki’d ka pije/ mo dhali par tombwaasho mo dhali ’koshi a’di mo dhali ḵali a’di mo.
6Rip̱ka si’da/ oki ya/m piti ka Yakuub gwo mo ki: Aha/ ciḵkina ’twa/ mmoṯora/ ṯor ka kan ka Iisu mo, ki:
7Ḵalaa/ shum tombwaasho mo dhali thosoni shum jin ’kunya’kuny gom aha/ mo ki aha/ mina shwa a’di mo dhali ’bor /e mii mo mbwambor ki Tap̱a mo nṯwa/a/ ki aha/ dinaki wu mo be.
8Hili mo mo ma, ya/m pem, hayi gwom pem e mo me’d jin ḵankika/ /e mo.
9Yaku/ e ma’diny ḵa’bal mo dhali kwanyi ushi guŋgulu mi isu/ mo ki aha/ mina thoson shum kun ’kunya’kuny ’peni uni mo gom cim mo a’di jin enkina a’di kagahara mo.
10Dhali /e mini ḵalki a’di ki cim mo mmoshwa mo. Wakan ki a’di midi ’bor /e mii mo nṯwa/a/ ki a’di diki wu mo.
11Hila Yakuub oki’da Rip̱ka jin ta kum gwo mo ki: Hili mo mo ma, akam pem ka Iisu a’di ta wathi/ jin ’kan ma muri is mo, dhali aha/ ’tiḵila/ buŋgwar ki ’tiḵil mo.
12Wariba/ ababa midi tayaa/ is is ki me’d mo, dhali aha/ mina e waki aha/ miina a’di ka maḵ mo dhali aha/ mina ḵal monyjee ap̱o/ is pem mo, yisa mom’bor mii mo.
13Kum ki o a’di gwo mo ki: Monyjeem pini midi di ap̱o/ aha/ mo ya/m pem mo, hili hayi gwom pem e mo dhali yayi mo dhali kwanyi uni gom aha/ mo.
14Gom gwo gi wakan mo tani a’di yaki’d mo dhali buthi uni mo dhali ’doyu/ uni ki kum mo, dhali kum ki thoson shum kun ’kunya’kuny mo, me’d jin enkina com kagahara mo be.
15Dhala Rip̱ka ki bu’th burrinyem ’borga/ ma Iisu jin ta ya/ ma yim jin ca’d mo uni kun ’koni gu’b nyaḵka yim mo a’di ki hi’thki a’di ka Yakuub mo a’di jin ta ya/m piti jin gwa’da’d mo.
16Dhala yim ki hi’thki a’di ayi’c mi e ’bame’d piti mo dhali e ’bam piti jin ’tiḵila/ ’tiḵil mo.
17Dhali ayim ki c̱i shum jin ’kunya’kuny mo dhali maaŋḵuthu’d mo a’di jin thosonkin ma yim mo e me’d gi ya/m piti ka Yakuub mo.
18Wakan a’di yaki’d bway gu’b gi com mo, dhali o a’di gwo mo ki: Ababam pema, dhali a’di ki thoḵ a’di gwo mo ki: Aha/ dina imahan mo. Ki /e aja a’dun mo? ya/m pem.
19Yakuub oki com gwo mo ki: Aha/ tana Iisu jin ta’da bwanyaram pini mo. Aha/ miikina me’d jin ḵankina /e aha/ gwo mo dhali shwane/ c̱a’bi /e ki mis mo dhali ’kayi shum tombwaashom pem mo ki /e mini ’bor aha/ mii mo.
20Hila Is/hak oki ya/m piti gwo mo ki: Mii wakata ganne/ gamkina /e a’di ki jahanne/ kan mo? ya/m pem. A’di ki thoḵ gwo mo ki: Haali/ Tap̱a Arumgimis pini a’di c̱iki aha/ a’di ki ’ta’b kan mo be.
21Yan’ko’d Is/hak ki owa Yakuub gwo mo ki: Shoru/ is ki ’dishe/ mo ki aha/ mina ta /e is is ki me’d mo ya/m pem mo ki aha/ mina mish /e mo waḵki/ /e tana Iisu ka jiŋ gana/ jin ta ya/m pem mo, walla aja a’dan mo?
22Wakan aYakuub a’di yaki’d mo mmo’disha Is/hak is mo a’di jin ta com mo, a’di taki a’di is is ki me’d mo dhali o gwo mo ki: ’Twa/ a’di ita jim ma Yakuub mo, hili me’d uni ita me’d ma Iisu mo be.
23Dhali a’di diki nyiṯẖ a’di mo haali/ me’d piti ’kan ma mur nycine/ mo me’d ji ma kam piti ka Iisu mo, dhali gom gwo gi wakan mo tani a’di ki ’bor a’di mii mo be.
24A’di ki o gwo mo ki: A/e ta ya/m pem ka jiŋ gana/ mo jin ta’da Iisu mo? A’di ki thoḵ gwo mo ki: Aha/ tana a’di mo be.
25Dhali yan’ko’d a’di ki o gwo mo ki: Ḵali a’di ki aha/ mo ki aha/ mina ’ka shum tombwaasho gi ya/m pem mo dhali ’bor /e mii mo. Wakan a’di ḵalki a’di a’di mo dhali a’di ’kaki a’di mo dhali a’di ḵalki a’di yimana mura’th jin ḵa/u ki ŋahŋah mo dhali a’di p̱iki a’di mo be.
26Dhali yan’ko’d com ka Is/hak ki o a’di gwo mo ki: Shoru/ is ki ’dishe/ mo dhali p̱iyaa/ ’twa/ mo ya/m pem mo.
27Wakan a’di p̱u’dki’d ki ’dishe/ mo dhali p̱i a’di ’twa/ mo dhali a’di jiḵki’da shim burrinyem piti mo dhali ’bor a’di mii mo dhali o gwo mo ki: Hili yisawa/, ashim gi ya/m pem mo ma isi me’da shim gi wathi/ jin yayi’d ’pena pije/ mo, a’di jin ’borkina Tap̱a mii be.
28Dhala Arumgimis c̱i jap̱e/ gi momis mo, dhali aris tom ’boron gi mony’cesh mo, dhali pos mo dhala mura’th ki nyanye/ mo.
29Dhalka ris ’kwani ’baar mo mii /e to ime’d mo, dhali aris kal gi mony’cesh mina ’ko ka bamambor mmoluŋ /e mo. Tayi tap̱a ap̱o/ ikam pini mo dhali dhalki iya/in gi kwan mini ’ko ka bamambor mmoluŋ /e mo. Monyjee midi di ap̱o/ aris ’kwani ’baar ka ’deṯe/ ’deṯe/ kun jeeki /e mo, dhali mom’bor mii midi di ap̱o/ aris ’kwani ’baar mo kun ’borki /e mii mo.
30Dhali ka Is/hak daḵa/ ’baarki mii i’dishesan mmo’bora Yakuub mii mo, ka Yakuub ’tilki is mo mmoya ka pije/ mo ’peni bwambor ma Is/hak mo jin ta com mo tani Iisu jin ta’da kam mo tani a’di p̱u’dki’d mo ’peni mompar mo be.
31A’di si’da/ thosonki shum jin ’kunya’kuny mo dhali ḵali a’di e com mo. Dhali a’di ki o com gwo mo ki: Dhalka baba cu mis mo dhali ’ka shum tombwaasho gi ya/m piti mo ki /e mini ’bor aha/ mii mo.
32Ababam piti ka Is/hak oki a’di gwo mo ki: Ki /e aja a’dun mo? A’di thoḵki gwo mo ki: Aha/ tana ya/m pini, jin ta’da bwanyara/ jin ta’da Iisu mo be.
33Yan’ko’d a/Is/hak a’di dekina is ki bir bir ki ’bi’th mo, dhali o gwo mo ki: Kaja sa/ yaki’d mo mmopar mo dhali ’koshi tombwaasho mo dhali ḵali aha/ shum mo, dhali aha/ ’kakina a’di ’baar mo nṯwa/a/ ki /e diki p̱u’du/ mo dhali aha/ ’borkina a’di mii mo? Nye a’di minu mii ’bor mii mo.
34Ka Iisu ciḵki gwo ’peni com mo tani a’di ’therki dhan ko ki ’bi’th mo dhali ko ki jabu’th ki ḵu’bu/ ḵu’bu/ mo, dhali o com gwo mo ki: ’Bori aha/ mii mo ma, isi aha/ gara/ si’dayi, ayy ababam pem mo.
35Hili a’di oki gwo mo ki: Akam pini a’di p̱u’dki’d ka maḵ mo, dhali a’di bu’thki mom’bor miim pini mo.
36Iisu oki gwo mo ki: A’di ’konuki yuḵ gway ka Yakuub ka jiŋ gana/ ’taa? Haali/ a’di thamki aha/ thum me’di su/ mo. A’di bu’thki mo ma bwanyaram pem jin taka/ mo, dhali hili mo mo ma, shwane/ a’di bu’thki mom’bor miim pem ’peni aha/ mo. Yan’ko’d a’di ki o gwo mo ki: A/mom’bor miiŋ kamu/ bunya/ dina /e ki ’tash ’twa/ mo gom aha/ mowa?
37Is/hak ki thoḵa Iisu gwo mo ki: Hili mo mo ma aha/ karkina a’di mmota tap̱am pini mo, dhali aris ikam piti aha/ c̱ikina uni ki a’di mmota c̱iŋkina/ mo mmomii a’di i me’d mo dhali pos dhala mura’th kun sinu mo aha/ c̱ikina uni ki a’di mo mmocil mo. Kata beseene/ imiga/ mii gom /e ya/m pem mo?
38Iisu ki o com gwo mo ki: A/e taki jasi mom’bor mii ’deŋ gana/ kan niina? ababam pem mo. ’Bori aha/ mii mo ma, isi aha/ gara/ si’dayi, ayy ababam pem mo. Dhala Iisu c̱eki ’twam piti mo dhali ko mo be.
39Dhali yan’ko’d Is/hak jin ta’da babam piti thoḵki a’di gwo mo ki: Hili mo mo ma, /e mini si’d mo ’peni mony’cesh jin minu si to mo haali/ a’di ita mom pini jin mina /e c̱a’bi cine/ mo, dhali /e si’da/ mini si’d mo ’peni jap̱e/ gi momis e mo jin ḵa’dama/ ḵa’dam mo.
40Shemen gandala turgam pini mo tani a’di imina /e ndi ki e mo be. Dhali /e mini miiya kan to mo, hili ki /e mini ḵwa/ is pini bwa mo tani /e ḵwa/ki dhaŋḵa’b tom’bam piti bwa mo ’peni ’bam pini mo be.
41Shwane/ Iisu shi/ki’da Yakuubi e mo gom mom’bor mii jin ’borkina com a’di mii mo, dhala Iisu oki gwo e is piti mo ki: Atee jin minu kowa ko goma babam pem a’di ’dishkina ’twa/ mo. Aha/ mina ’kosha kam pem ka Yakuub jwa mo ŋ’ko’d mo.
42Hili gwo gi Iisu a’di ṯorkunuwa Rip̱ka mo a’di jin ta’da bwanyara/ ma yim mo. Gom gwo gi wakan mo tani ayim hashki gwo mo mmoyuḵa Yakuub jin ta ari ya/ ma yim jin gwa’da’d mo, dhali o a’di gwo mo ki: Hili mo mo ma, akam pini ka Iisu a’di malaski is piti mo dhali thoson is mo mmo’kosh /e jwa mo.
43Dhali ’peni shwanesan mo, ya/m pem hayi gwo gi ’twam pem e mo, dhali cuyi mis dhali gusi pa mo a Laabaan mo a’di jin ta’da kam pem mo e Pan Haraan mo.
44Dhali c̱a’bi /e e mun mo nyaḵki a’di ki ari mo mo ntaga nyor ma kan yan jin ’batha’ba’th mina she/ i’thup̱ mo.
45Ntaga nyor ma kan yan mina she/ i’thup̱ mo dhali a’di midi this to gwan e mo kun miikina /e mo. Yan’ko’d aha/ mina hash gwo mo dhali susi /e ka nyaŋ’ko’d ’peni mun mo. Goma tinta imiga/ this um isu/ e mo mmonṯal ’de/ ka cim ’de/ kan mo.
46Yan’ko’d aRip̱ka ki owa Is/hak gwo mo ki: Aha/ ’baka/ mondiki/em pem e mo haali/ aris up̱ gi ’Kwani gi Pan Hiṯẖṯẖa mo. Waḵka Yakuub midi mash jan ’de/ ’peni up̱ gi Pan Hiṯẖṯẖa me’d uni up̱ gwansan kun ’kon e bampa/ yansan mo, dhali shim miim ’boro’da ta midi di gom mondiki/em pem mo?
