1Dhala Yuusup̱ mol is piti non mo ibwambori aris ’kwani kun nyaḵ ’ko ki a’di mo, dhali a’di ’therki ko mo ki: Raḵa ris ’kwani ’baar mo mmo/ii ka pije/ ’peni aha/ mo. Gom gwo gi wakan mo tani wathin ṯal ’deŋ kamu/ yisa di’d nyaḵki a’di mo me’d jin ṯorkin ma Yuusup̱ is piti eya tente/ e ikam piti mo.
2Dhali a’di ’therki ko kagahara mo, wakan ’Kwani Masir ciḵki a’di mo dhali aris ’kwani gi gu’b ma P̱irawni ’baar mo ciḵki a’di mo.
3Dhali aYuusup̱ oki ikam gwo mo ki: Aha/ tana Yuusup̱ mo. A/ababam pem di’d ki e naskina/ mowa? Hili ikam piti mol a’di gwo thoḵ mo haali/ uni ḵo/ki is kagahara ibuŋ’kus piti mo be.
4Wakana Yuusup̱ oki ikam piti gwo mo ki: Shori aha/ is ki ’dishe/ mo. Dhali uni shorki a’di is mo. Dhali a’di oki uni gwo mo ki: Aha/ tana akam bum jin ta’da Yuusup̱ a’di jin yolkina um mo e Pa Masir mo.
5Dhali shwane/ dhalku/ is bum ki dhu ka madhan’kur mo walla ka nyor e bwaman is bum mo haali/ um yolki aha/ imahan mo, haali/ Arumgimis hashki aha/ nṯwa/a/ ki um mo mmo’tash mondiki/e ’twa/ mo.
6Haali/ ṯe/ diki’d e bampa/ yansan yili su/ mo dhali yil boc̱kini mudhe’d mo jin minu ’koki gorra ’cesh mo walla ’ciṯẖ to mo.
7Dhali Arumgimis hashki aha/ nṯwa/a/ ki um mo mmo’tasha/ ’tash ’twa/ gom um mo haali/ um tana ushalla/ e mony’cesh mo dhali mmodhuya dhu ki e gom um mo uni ka ris kun minu ’ko ki e mo.
8Wakan um yisa a’di ihashki aha/ imahan mo, hili Arumgimis mo dhali a’di karki aha/ mmota ababa goma P̱irawn mo dhali tap̱a gom kuŋ gu’b piti ’baar mo dhali ta amanji/a ji ap̱o/ bampa/ Masiri ’baar mo.
9Thosoni is ki jahanne/ mo dhali iiku/ ka gagamis mo eya babam pem mo dhali oyi a’di gwo mo ki: Gwo jin ona ya/m pini ka Yuusup̱ a’dihe/ mo ki: Arumgimis karki aha/ ki tap̱a ’Kwani Masiri ’baar mo. Yayu/ ka luŋgu’bi aha/ mo. Dhalka diiṯe/ ki miiyu/ mo.
10/E mini c̱a’b e bampa/ Jaasaan mo dhali /e mini ’dishaa/ is mo /e dhali uc̱im pini mo dhali uc̱i gi uc̱im pini mo dhali arisa ma’diny ḵa’bal pini mo dhali arisa ŋul’kup̱ bip̱ pini mo dhali aris to ’baar mo kun takina /e mo.
11Dhali e mahan mo tani aha/ mina thip̱ /e ki to mo haali/ yil boc̱kini mudhe’d naskina/ jin mina ṯe/ p̱u’du/ mmo’kosha/ ’kosh mo isi ciki/ /e dhali aris kuŋ gu’b pini dhali aris to kun tana /e mo mini war ki moha’th’ko’d pini mo.
12Dhali shwane/ em pini midi mish mo mo dhali e ma kam pem ka Benyamiin mishki mo mo ki a’di ta ’twam pem jin ṯorki’da ṯor nyaḵki /e mo.
13Um mini mii ṯora babam pem gwo mo goma ris to ma ra/ ra/ pem e Pa Masir mo dhali aris to ’baar mo kun p̱arkina um e mo. Thosoni is ki jahanne/ mo dhali susa babam pem ka luŋgu’b imahan mo.
14Dhali yan’ko’d a’di biṯki’d m’ba/ ma kam piti ka Benyamiin mo dhali ko mo dhala Benyamiin si’da/ goki’d e ’ba/ piti mo.
15Dhali a’di p̱iki ikam piti ’twa/i ’baar mo dhali ko eya p̱o/i uni mo dhali yan’ko’d mo tani ikam ṯorkina ṯor nyaḵki a’di mo be.
16Ki gwo jin ḵalu ciḵkin ma P̱irawn e gu’b piti mo ki ikam ma Yuusup̱ p̱u’dkin mo tani a’di ’borki’da P̱irawn bwa mo dhali aris c̱iŋkinam piti gara/ mo be.
17Dhala P̱irawn oki’da Yuusup̱ gwo mo ki: Oyi ikam pini gwo mo ki: Miiyi mii yansan mo ma, suki to/e gwansan towa p̱o/ mo dhali iiku/ ka nyaŋ’ko’d e Paŋ Kanaan mo.
18Dhali susi ababam bum mo dhali aris kuŋ gu’b bum mo dhali iiyu/ i aha/ mo dhali aha/ mina c̱i um mom’borga/ e bampa/ mo dhali um mini shwa to ’pena ’cesh yan jin ṯu/aṯu/ mo.
19Ḵani uni gwo si’da/ mo ki: Miiyi mii yansan mo ma. Ḵala arabiya kun dira shumarum ’peni Pa Masir mo mmoḵala ris ushi uc̱im bum mo dhali goma ris up̱ bum mo dhali susa babam bum mo dhali iiyu/ mo.
20Dhalki gwoŋ kamu/ ki kulumi bwa gom tom bum mo haali/ mony’cesh jin mina um i’ko nycine/ mo tani a’di ta jim ’borgaŋ gana/ mo e bampa/ Masir mo a’di jin midi ta jim bum mo be.
21Iya/ ma Israyiil miikin kan mo dhala Yuusup̱ c̱iki uni arisa arabiya kun dira shumarum mo isi me’d gwo jin ḵankin ma P̱irawn mo dhali thosonki uni tonṯe/ kun mina uni ishwa e bway iim buni mo.
22Eya ris uni ka ’deṯe/ ’deṯe/ dhali eya ris uni ’baar mo tani a’di c̱iki uni burrinye/ ka kwa kwara mmo/aḵ e mo hili aBenyamiin mo tani a’di ki c̱iki a’di ariyaal iss ’kwanimpa ḵarpa’c mo ’pena guurush jin ta ’dolkon kush mo dhali burrinye/ imudhe’d kun mina a’di mii aḵ e mo.
23Goma babam piti mo tani to kun hashkina a’di gom a’di mo tani uni ta thuluny i’kume’d mo kun su’kkunu tom ’boron gi Pa Masira p̱o/ mo dhali kuman thuluny ’koni ’kume’d kun su’kkunu posa p̱o/ mo dhali maaŋḵuthu’d mo dhali tonṯe/ si’da/ thosonkunu is mo goma babam piti mo gom ya jin mina a’di iyayu/ i bway mo.
24Dhali yan’ko’d a’di dhuki ikam piti ’pen mo, dhali ki uni ḵwa/ is bwa mo tani a’di oki uni gwo mo ki: Dhalka wala ki wal i bway mo.
25Wakan uni cuki mis ka pije/ ’peni bampa/ Masir mo dhali p̱u’d e Paŋ Kanaan mo eya babam buni ka Yakuub mo be.
26Dhali uni ṯorki a’di gwo ka Yuusup̱ di’d ki e naskina/ mo dhali a’di iji’da ji ap̱o/ bampa/ Masiri ’baar mo, dhala dum piti a’di ’thikina buye/ mo haali/ a’di diki gam gwom buni is mo.
27Hili ki uni ṯorki a’di aris gwo ma Yuusup̱ i’baar mo a’di jin okina a’di uni mo dhali a’di p̱arki’da arisa arabiya kun dira shumarum e mo uni kun hashkin ma Yuusup̱ mo mmoḵali a’di mo tani shi/in ma babam buni ka Yakuub a’di warkunu is mo be.
28Dhala Israyiil oki gwo mo ki: A’di ’koshki jwa mo. Yuusup̱ jin ta ya/m pem a’di idiki’d ki e naskina/ mo. Aha/ mina ya mo dhali p̱ar a’di e mo nṯwa/a/ ki aha/ dinaki wu mo be.
