ṮAKWIIN 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Dhali Tap̱a a’di yayi’d mo mmobuṯa Saarah me’d jin okina a’di mo, dhali Tap̱a a’di miiki eya Saarah mo me’d jin okina a’di gwo is mo be.

²Dhala Saarah bwaaki’d mo dhali ayim ki dhodha ’ci jin ta ya/ goma Ibrahiim mo ki yil jin cana a’di mmota dhan mo ka tee c̱aan mo a’di jin okin ma Arumgimis a’di mo be.

³Dhala Ibrahiim yuḵki gway gi ya/m piti jin dho’thkunu gom a’di mo tani, a’di jin dho’thkin ma Saarah mo gom a’di mo tani ka Is/hak mo be.

⁴Dhali me’d jin ḵankin ma Arumgimis a’di mo tani Ibrahiim ’ciṯẖki’da Is/haka munyjal yis mo ki ya/m piti ka Is/hak ’kon ma cimi pekwara mo.

⁵Dhala Ibrahiim ’kokina yil iss ’kwanimpa imudhe’d ka dhan piti mo tani me’d jin dho’thkunu ya/m piti ka Is/hak gom a’di mo.

⁶Dhala Saarah oki gwo mo ki: Arumgimis a’di c̱iki mo gi momp̱e’th gom aha/ mo. Aris ’kwani ’baar mo ka ’deṯe/ ’deṯe/ kun mini ciḵ gwo mo mini p̱e’th gom aha/ mo.

⁷Dhali ayim ki o gwo mo ki: Kaja a’di jin midi ’taki o ka Ibrahiim gwo mo ka Saarah midi ’taki c̱i uc̱i ako mmop̱i moyi? Hili aha/ be ki dho’th a’di ya/ mo ki yil jin cana a’di mmota dhan mo be.

⁸Dhali a’di ca’d mo dhali a’di dhalkunuwa koŋ kum ’pen mo dhala Ibrahiim miiki’da dhan mo jin yuḵunuwa yuḵ mo ka cim jin dhalkunuwa koŋ kum ’pen mo goma Is/hak mo.

⁹Hili Saarah p̱arki ya/ ma Haagar jin ta ji gi Pam Masir e mo, a’di jin dho’thkin ma yim goma Ibrahiim mo, dhali a’di ki mii a’di ka maḵ mo.

¹⁰Gom gwo gi wakan mo tani ayim ki owa Ibrahiim gwo mo ki: Uri a’bom c̱iŋkina/ yan ka pije/ mo nyaḵka ’cim piti mo haali/ ya/ ma ’bom c̱iŋkina/ yan mo tani midi diki pwaḵ mal bwa nyaḵki ya/m pem mo, isi a’di jin ta’da Is/hak mo.

¹¹Dhali gwo yan jwakaṯki’da Ibrahiima du e jis/em piti mo gom gway gi ya/ mo be.

¹²Dhala Arumgimis ki owa Ibrahiim gwo mo ki: Dhalku/ gwo yan ki kar mmojwagaṯ /eya du e jis/em pini mo goma ’ci yan mo, dhali gom gwo gi ashin jin ta’da ’bom c̱iŋkina/ mo. Dhali eya ris gwo kun on ma Saarah /e mo tani ciḵi ’twa/ ma yim mo ma haala Is/hak a’di midi ta emen pini jin minu yuḵ gway i’ko’d mo be.

¹³Dhali gom ya/ ma ’bom c̱iŋkina/ si’da/ mo tani aha/ mina kar a’di mmota kal mo haali/ a’di ta emen pini mo be.

¹⁴Dhala Ibrahiim cu mis mo mon’thamo/ ka’tum mo dhali bu’th maaŋḵuthu’d mo dhali ḵucaŋ yi’de/ mo dhali a’di ki c̱i ka Haagar mo mmokar ki a’di e ’kup̱a bi ma yim mo dhali a’di ki c̱i ka yima ’ci mo dhali karka ayim ’pen mo dhala ayim a’di yaki’d mo dhali yaki yany c̱a/ mo e mombwaasho e Pam Birsaba mo.

¹⁵Dhali yi’de/ jin di’di bwa ḵucaŋ mo tani a’di ḵu’thki’d mo dhala yim ki biṯa ’ci me’d e bwaman ma bwaabuuy mo.

¹⁶Dhala yim yaki’d mo dhali a’di ki c̱a’ba ’cesh mo mmoc̱i a’di ’ko’di is mo ari is ’ko’d mo kantaan me’d mo jin shiinu aththa mo kantaan, haala ayim oki gwo mo ki: Aha/ mina mii dhalku/ ki p̱ar jwa ma ’ci e mo. Dhala ayim ki c̱a’b mmoc̱i a’di ’ko’di is mo dhali a’di ki ’de’k ’twam piti mo dhali ko mo.

¹⁷Dhali Arumgimis ciḵki ’twa/ ma ara ’ci mo dhala man’doyu gwo ma Arumgimis yuḵki’da Haagar mo ’peni momis mo dhali owa yim gwo mo ki: Ata mii /e mo, Haagar? Dhalku/ is ki ḵo/ mo haali/ Arumgimis ciḵki ’twa/ ma ara ’ci e mo jin dina a’di mo.

¹⁸Cuyi mis mo dhali ’deka ’ci mo dhali susi a’di ki me’d pini mo haali/ aha/ mina kar a’di ki dhan kala caaga/ mo.

¹⁹Dhali yan’ko’d Arumgimis ki ḵa’d e ma ayim mo dhala yim ki p̱ar jis yi’de/ e mo. Dhala yim yaki’d mo dhali ’tu’d ḵucaŋ ki yi’de/ mo dhali a’di ki c̱i ka ’ci mmop̱i mo be.

²⁰Dhali Arumgimis nyaḵ di ka ’ci mo dhali a’di caki’d mo dhali a’di c̱a’bki’d e mombwaasho mo dhali warki’d ki wathi/ jin yuḵayuḵ mo mmoshiina aththa mo.

²¹Dhali a’di c̱a’bki’d e mombwaasho gi Pam P̱aaraan mo dhali kum ki ŋap̱ki a’di a’bom mo ’peni Pa Masir mo.

²²Dhali a’di warki’d ki mo jin peki’d mo ka tee c̱aan mo ka Abimaalik dhala P̱ikul jin ta tap̱a gi ’kwani ma mee mo oki’da Ibrahiim gwo mo ki: Arumgimis nyaḵ di e /e eya ris to kun miikina /e mo be.

²³Dhali gom gwo gi wakan mo tani thuli /e me’da p̱o/ mmahan ki gway ma Arumgimis mo gom aha/ mo ki /e mini diki mii to shiyi’da p̱o/ aha/ mo walla ap̱o/ ya/m pem mo walla ap̱o/ iya/m pem kun mini dho’th iya/ i’ko’d mo, hili gom mii kun miiga/ ki bwaŋkush gom /e mo tani /e si’da/ mini mii a’di gom aha/ mo be, dhali e mony’cesh a’di jin mina /e ya ki yaŋ’kus mo.

²⁴Dhala Ibrahiim oki gwo mo ki: Aha/ mina thul gwo me’da p̱o/ mo be.

²⁵Dhala Ibrahiim nyo/ki’da Abimaalik ki gwo mo gom jis yi’de/ mo a’di jin bu’thkina c̱iŋkina/ ma Abimaalik ki ’bi’th mo.

²⁶Dhala Abimaalik ki o ki gwo mo ki: Aha/ yisa misha wathi/ jin thami to mii kansan mo yisa. /E si’da/ diki ṯor aha/ gwo mo. Dhali kan si’da/ aha/ si’da/ dinaki ciḵ gwoŋ kamu/, hili jasi ki ’dishe/ ishunsan mo.

²⁷Dhala Ibrahiim bu’thki ḵa’bal mo dhala morbip̱ mo dhali a’di ki c̱i ki uni ka Abimaalik mo dhali uni su/ miiki gwo jin gamu me’d mo be.

²⁸Dhala Ibrahiim ki dhu ushi nas ḵa’bali pesu/ ’pen ka pije/ mo ’pena ma’diny piti mo uni ’cena mo.

²⁹Dhala Abimaalik ki owa Ibrahiim gwo mo ki: ’Pemen gwo yan ta’da ta mo mmodhuna /e ushi nas ḵa’bali pesu/ ’pen ka pije/ mo mmo’ko uni ’cena mo?

³⁰Dhali a’di ki o gwo mo ki: Ushi nas ḵa’bali pesu/ gwansan mina /e ibu’th ki me’d pini mo ki uni mini ta iman/o gwo gom aha/ mo ki aha/ c̱wanykina jis yi’de/ yansan mo be.

³¹Gom gwo gi wakan mo a’di iyuḵkunu mo yansan gway ka Birsaba mo, haali/ uni su/ thulki gwo me’da p̱o/ mo be.

³²Dhali gom gwo gi wakan mo tani uni gamki gwo me’d mo e Pam Birsaba mo. Dhala Abimaalik cuki mis mo dhala P̱ikul mo a’di jin ta wathi/ gom ’kwani ma meem piti mo dhali uni doḵkin ka nyaŋ’ko’d mo eya ’cesh gi Pam P̱ilisthiin mo.

³³Dhala Ibrahiim siki cwa jin wana e ka ’kwaṯṯan e Pam Birsaba mo dhali a’di ki yuḵ gway gi Tap̱a mo a’di jin ta’da Arumgimis jin di’d ki e ki sule/ sule/ mo be.

³⁴Dhala Ibrahiim yaki’d ki yaŋ’kus e Bampa/ gi Pam P̱ilisthiin yil ka ris mo be.