1Ibrahiim a’di bu’thki’da ’boma kamu/ mo a’di jin yuḵu gway ka Gathuurah mo be.
2Ayim dho’thki a’di aSimraan mo dhala Yagshaan mo dhala Madaan mo dhala Midyaan mo dhala Yishbaag mo dhala Shuha mo be.
3Yagshaan si’da/ a’di ita’da baba ma Shaba mo dhala Dadaan mo. Dhali iya/ ma Dadaan uni si’da/ annihe/ mo: Ashshuriim dhala Lathushiim dhala La/ummiim mo be.
4Dhali iya/ ma Midyaan uni si’da/ annihe/ mo: Ep̱ah dhala Ip̱ir mo dhala Hanuuk mo dhala Abiidaa/ mo dhala Elda/ah mo be. Aris uc̱i gwansan uni ta kuma Gathuurah mo be.
5Ibrahiim c̱iki’da ris tom piti kun tana a’di ka Is/hak i’baar mo be.
6Hili e iya/ gi up̱ lac̱am piti yan mo tani Ibrahiim ki c̱i uni to kun c̱inu ki me’d mo, dhali ki a’di di’d ki e naskina/ mo tani a’di ki dhuki uni ’pen mo ’peni ya/m pitiŋ gana/ ka Is/hak mo mmo/iiku/ mmo’koku/ ’kup̱ki mom’pesho’k isa dhana/ imun mo jin ta bampa/ gi mom’pesho’k mo be.
7Hili atee yil jin din ma Ibrahiim ki e annihe/ mo, a’di ’kona yili iss ’kwanimpa ipekwara i’ce’dka ḵarpa’c ap̱o/ mo be.
8Ibrahiim a’di c̱iki shi/in piti jiŋ ’ko’d mo dhali a’di wuki’d mo ki dhana dhan gana/ mo mmotana a’di dhan gumpan dhan ki yil piti mo dhali a’di gamkunu me’d nyaḵki ’kwanim piti mo be.
9Is/hak dhala Isma/iil uni kun ta iya/m piti mo tani uni kanki a’di e jurum wosh ma Makp̱iilah mo e bwam bunto ma Ip̱ruun jin ta ya/ ma Suuhar jin ta wathi/ Hiṯẖṯẖa jin di’d ’kup̱ ka bor ki mis ki Pa Mamra mo be.
10Bwam bunto yan yolkin ma Ibrahiim ’peni ’Kwani Hiṯẖṯẖa mo tani a’di ikankunu a’di nycine/ uni ka ashim piti ka Saarah mo be.
11’Ko’di jwa ma Ibrahiim mo tani Arumgimis ’borki’da Is/hak mii mo a’di jin ta ya/m piti mo. Dhala Is/hak a’di c̱a’bki’d mo e pam Birlahayru/i mo be.
12Uni kun ta emen ma Isma/iil kun yerkunu gwayi ’ko’d mo a’di jin ta ya/ ma Ibrahiim mo ka Haagar jin ta ji Masir mo a’di jin ta c̱iŋkina/ nyara/ ma Saarah a’di jin dho’thkina a’di ka Ibrahiim mo be.
13Gway gi iya/ ma Isma/iil mo tani uni annihe/ mo, a’di jin yerkunu ka baṯẖ ’pen ka dho’th buni mo: Nabayuut a’di ita’da bwanyara/ ma Isma/iil mo dhala Gidar mo dhala Adab/iil mo dhala Mibsaam mo,
14dhala Mishmaa/ mo dhala Duumah mo dhala Massa mo
15dhala Hadaar mo dhala Teema mo dhala Yathuur mo dhala Nap̱ish mo dhala Gidmah mo be.
16Uni gwansan uni ita iya/ ma Isma/iil mo dhali gway buni si’da/ uni anann mo be. Dhali gway bampam buni dhali aṯa/ kun ’kona uni tani uni ’kume’d i’ce’dka su/ mo ka waḵ buni kun tana uni iya/ ma maliḵ mo.
17Hili atee yil jin din ma Isma/iil annihe/ mo, a’di ’kona yili iss ’kwanimpa ipesu/ aṯẖ ikwara mo dhali a’di c̱iki shi/in piti jiŋ ’ko’d mo dhali a’di wuki’d mo dhali a’di nyaḵkunu is gam me’d ki ’kwani ma bas piti mo be.
18Uni ’peni Pa Hawiila ntagi Pan Shur mo a’di jin di’d ka p̱ar ’twa/ ki Pa Masir mo ’kup̱ki bway jin c̱uthi ’twa/ ’kup̱ki bway Pa Ashshuur mo be. A’di c̱a’bki’da p̱o/ aris ’kwanim piti mo be.
19Gway gi iya/ ma Is/hak uni kun ta emen piti mo a’di jin ta ya/ ma Ibrahiim mo: Ibrahiim jin ta’da baba ma Is/hak mo.
20Is/hak a’di i’kokina yili issu/ mo ka dhan piti me’d jin bu’thkina a’di aRip̱ka ki ash mo a’di yim jin ta ’bwa/ ma Baṯu/iil mo jin ta Wathi/ Araam gi Pam P̱addaan/araam jin ta ’bwah ma Laabaan Wathi/ Araam mo be.
21Dhala Is/hak ’thoki’da Arumgimis gom ash mo, dhala Rip̱ka jin ta ash a’di yim bwaaki’d mo be.
22Dhali uc̱i su/ gwansan uni gurunyki is e bwa ma yim mo, dhali ayim ki o gwo mo ki: Waḵki/ a’di wakan mo tani, ata si’da/ idika/ ki e mo? Gom gwo gi wakan mo tani ayim yaki’d mo dhali ’theḵ gwo yan e Tap̱a Arumgimis mo.
23Dhali Tap̱a ki owa yim gwo mo ki: Kal ’koni su/ e bwa ma dho’th pini mo, dhali ’kwani su/ gwan kun mina /e dho’th mo tani uni mini ḵwa/ bwa mo dhali jan ṯal ’de/ a’di imidi ’bitha’bi’th mo mmobola kamu/ e mo, dhali a’di jin ca’d a’di imidi mii ara kam to mo be.
24Ka tee ma yim jin mina a’di dho’th thimkunu mo tani, hili mo mo ma, ushi uc̱i su/ ’kon e bwa ma yim mo be.
25A’di jin p̱u’dki’di ṯwa/a/ mo tani a’di tagi ’per mo, dhali aris buŋgwar is piti wana e ki burrinye/ muri is mo. Gom gwo gi wakan mo tani a’di yuḵki a’di gway ka Iisu mo.
26Dhali yan’ko’d mo tani akam p̱u’dki’d mo, dhali me’d piti bu’thki ’pena ṯiŋkila/ ma Iisu mo. Dhali gom gwo gi wakan mo tani a’di yuḵkunu gway ka Yakuub mo. Is/hak ’kona yil issi kwara mo me’d jin dho’thkin ma yim uni mo be.
27Me’d jin cakina uc̱i su/ mo tani Iisu ta wathi/ jin kora e ki kor e mompar mo, a’di ta wathi/ ma shoŋ gana/ mo ka Yakuub ta wathi/ jin bu’th is piti ka mathaŋ’kur dhali c̱a’b e gu’b burrinye/ mo be.
28Is/hak enki’da Iisu mo haali/ a’di ’kaki shum piti kun parkina a’di mo. Hila Rip̱ka enki’da Yakuub mo be.
29Ka cima kamu/ me’d jin miikin ma Yakuub a’tash mo tani Iisu p̱u’dki’di pa mo ’peni bwaasho mo dhali a’di muṯṯa/ ṯe/ is kagahara mo.
30Dhali Iisu ki owa Yakuub gwo mo ki: Dhalki aha/ nyoḵa ’tash pini yan jin cesa /e e ki ’per ’per mo haali/ aha/ muṯṯa/ ṯe/ is mo (gom gwo gi wakan mo tani a’di iyuḵkunu a’di gway ka Aduum mo).
31Yakuub oki gwo mo ki: /E mini yolaa/ mo ma bwanyaran dho’th ganam pini yan mo.
32Iisu thoḵki gwo mo ki: Aha/ mura wu ’te/ mo be. Mo ma bwanyara/ yan midi miiya ta gom aha/ mo?
33Yakuub ki o gwo mo ki: /E mini thul gwo me’da p̱o/ nṯwa/a/ gom aha/ mo, dhali wakan a’di thulki gwo me’da p̱o/ gom a’di dhali yol mo ma bwanyaran dho’th pitiŋ gana/ ka Yakuub mo be.
34Yan’ko’da Yakuub ki c̱ika Iisu maaŋ guraasa dhala ’tasha p̱asuliya jin cesu/ mo dhali a’di shwaki a’di mo dhali a’di p̱iki to mo dhali cu mis mo dhali ya e bway piti mo. Iisu a’di ishi/ki mo ma bwanyaram pitiŋ gana/ i e mo be.
