1Arumgimis oki’da Yakuub gwo mo ki: Cuyi mis mo dhali yayi ka gagamis e Pam Beeṯ/iil mo dhali c̱a’bi /e imun mo dhali ḵa’bi agwaṯa/ goma Arumgimis imun mo a’di jin piki /e i is mo me’d jin guskina /e mo ’pena kam pini ka Iisu mo.
2Wakan aYakuub oki gwo e kuŋ gu’b piti mo dhali aris uni ’baar mo kun nyaḵ ’ko ki a’di mo ki: Dhuya risa rum thus ’pen ka pije/ mo ma uni kun tana rum gi ’kwanim bunycani tiya mo ’peni bwam um mo dhali dhagami is bum mo dhali aḵi burrinyem bum e mo.
3Dhali dhalki ana cuna mis mo dhali iina ka gagamis e Pam Beeṯ/iil mo ki aha/ mina ḵa’b agwaṯa/ goma Arumgimis imun mo a’di jin thoḵki aha/ ’twa/ mo ka teem pem jin taka c̱is ka c̱is mo dhali a’di jin nyaḵki di ki aha/ mo eya ris mo gunn kun yakika/ mo.
4Wakan uni c̱ikina Yakuub arisa rum thus gi bunycan ’kwanin tiya mo uni kun takina uni mo dhali aris malla/ ’cem buni mo dhali aYakuub ba’kki uni mo e ’peny cwa ma c̱aww jin ’dish Pan Shakiim is mo.
5Dhali ki uni iikin ibway mo tani dhan moŋḵo/ is ’peni Arumgimis yayi’da p̱o/ ’peŋkuman bampa/ kun ’kamki uni is mo. Wakan uni ’koki ur iya/ ma Yakuub isho’k mo.
6Dhala Yakuub a’di ip̱u’dki’d mo e Pan Luus mo a’di jin ta’da Beeṯ/iil mo a’di jin di’d e bampa/ Kanaan mo a’di dhali aris ’kwani kun nyaḵki ’ko ki a’di mo be.
7Dhali imun mo tani a’di iḵa’bkina a’di gwaṯa/ mo mmomiiya basa ’cesh mo dhali yuḵ mo yan gway mo ka Iil Beeṯ/iil mo haali/ e mo yan mo tani Arumgimis ṯorki a’di is piti e eya tente/ mo me’d jin guskina a’di mo ’pena kam piti mo.
8Dhala Dabuurah jin ta’da manhila Rip̱ka mo a’di iwuki’d mo dhala yim a’di kankunu mo e ’peny cwa ma c̱aww e mo jin di’d ka luŋgu’b ki Pam Beeṯ/iil mo. Wakan a’di iyuḵkunu a’di gway mo ka Alluun Bakuut mo.
9Arumgimis piki’da Yakuubi is doḵ/e mo me’d jin p̱u’dkina a’di mo ’peni Pam P̱addaan/araam mo dhali ’bor a’di mii mo be.
10Dhali Arumgimis ki o a’di gwo mo ki: Gway pini be yuḵu ka Yakuub mo be dhali /e yisa minu doḵ/e yuḵ gway pini ka Yakuuba mo yisa. Hili gway pini minu yuḵ ka Israyiil mo. Wakan a’di iyuḵkunu a’di gway ka Israyiil mo be.
11Dhali Arumgimis ki o a’di gwo mo ki: Aha/ tana Arumgimis jin Eḵa/ Eḵ mo. Ḵali /e mamana dho’th mo dhali mari /e amar is mo. Kal ’kwaniny’cesh dhali arisa ṯa/ gi kal ’kwaniny’cesh mini piyu/ ’peni /e mo dhali imaliḵ ka ris mini du’du/ ’peni /e mo.
12Mony’cesh jin c̱ikika/ ka Ibrahiim dhala Is/hak mo tani aha/ mina c̱i a’di /e mo dhali aha/ mina c̱i a’di ki emen pini i’ko’d mo be.
13Dhali yan’ko’da Arumgimis borki is piti imis mo ’peni mo jin ṯorkina a’diya ṯor nyaḵki a’di mo be.
14Dhala Yakuub thumki’da tiŋkiliŋ mo e mo yan jin ṯorkina a’diya ṯor nyaḵki a’di mo, a’di jin ta’da tiŋkiliŋ wosh mo dhali wolki’da tiŋkiliŋ tomp̱i i’kup̱i a’di jin c̱inu ki bwa ma ’the mo dhali wola yini ’kup̱i a’di mo be.
15Wakana Yakuub yuḵki mo yan gway ka Beeṯ/iil mo a’di jin ṯorkin ma Arumgimis aṯor ki a’di mo be.
16Dhali yan’ko’d uni iikin mo ’pena Pam Beeṯ/iil mo dhali uni si’dasi’d naskina/ ’peni Pan Ap̱raatah mo, aRahiil shwan ma ’ci mo dhali ayim di’d e mo jin shwana bwan dho’th mo.
17Dhali ka yim diki’d e mo jin shwana bwan dho’th mo tani a’bom jin karu mo mmowoṯẖa woṯẖ mo gom mondho’th up̱ mo tani oki a’di gwo mo ki: Dhalku/ is ki ḵo/ mo ma haali/ /e shwane/ murkini ta ga ’ciŋgwaṯẖa kamu/ mo be.
18Dhali me’da ḵashira/ ma yim di’di mmoḵwa/kina a’di is bwa ’pena yim mo (haali/ ayim wuki’d mo) tani a’di ayim ki yuḵ a’di gway ka Ben/uuni mo hili com a’di iyuḵki a’di gway mo ka Benyamiin mo.
19Wakana Rahiil a’di wuki’d mo dhala yim a’di kankunu mo e bway gi Pa Ap̱raatah mo, a’di jin ta Pam Beeṯlaham mo be.
20Dhala Yakuub thumki’da tiŋkiliŋ i’kup̱ jis jwa ma yim mo a’di jin ta’da tiŋkiliŋ i’kup̱ jis jwa ma Rahiil mo a’di jin diki’d imun ntagi shwanesan mo be.
21Israyiil a’di yaki’d mo dhali thum gu’b burrinyem piti e bwamp̱o/ gu’ba turga/ gi Pan Idir mo.
22Ka Israyiil c̱a’bki’d e bampa/ yan mo tani Ra/ubiin a’di yaki’d mo dhali isha Bilhah mo a’di jin ta’da ’bom lac̱a/ gi com mo dhala Israyiil ciḵki gwo yan mo. Dhali iya/ ma Yakuub uni ’koni ’kume’d i’ce’dka su/ mo.
23Iya/ ma Le/ah mo tani jin ṯwa/a/ a’di jin ta’da bwanyara/ ma Yakuub a’di ita’da Ra/ubiin mo dhala Shim/uun mo dhala Lawi mo dhala Yahuuda mo dhala Yassaakar mo dhala Sabuluun mo.
24Iya/ ma Rahiil uni si’da/ annihe/ mo: Yuusup̱ dhala Benyamiin mo be.
25Dhali iya/ ma Bilhah a’di jin ta nyarany c̱iŋkina/ ma Rahiil mo uni si’da/ annihe/ mo: Daan dhala Nap̱taali mo.
26Dhali iya/ ma Silp̱ah uni si’da/ annihe/ mo: Jaad dhala Ashiir mo. Uni gwansan ita iya/ ma Yakuub mo kun dho’thkunu a’di me’d jin dikina a’di e Pam P̱addaan/araam.
27Dhala Yakuub p̱u’dki’di com ka Is/hak mo e Pa Mamra mo walla e Paŋ Giryat/arba mo a’di jin ta Pa Habruun mo e mo jin yakin ma Ibrahiim dhala Is/hak iinyc̱a/ mo be.
28Dhali atee yil ma Is/hak uni ’koni iss ’kwanimpa ipedoŋon mo be.
29Dhala Is/hak a’di c̱iki shi/in piti jiŋ ’ko’d mo dhali a’di wuki’d mo dhali a’di gamkunu isi monṯal ’de/ nyaḵki ’kwanim piti mo mmotana a’di dhan guma dhan gana/ mo ka teem piti mo. Dhali iya/m piti jin ta’da Iisu dhala Yakuub uni kanki a’di mo be.
