ṮAKWIIN 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Dhali aDiinah jin ta ’bwa/ ma Le/ah a’di jin dho’thkin ma yim ka Yakuub mo a’di yaki’d mo mmobuṯa ris up̱ gi bampa/ yan mo be.

²Dhali ka Shakiim jin ta ya/ ma Hamuur jin ta Wathi/ gi Pan Hiwwi jin ta ya/ ma maliḵ gi bampa/ yan p̱arki’da yim e mo tani a’di bu’thki’da yim mo dhali ish nyaḵka yim mo dhali kara yim is ki gwa’d mo.

³Dhali aḵashiram piti dirkunu mo ’kup̱ ka Diinah mo a’di jin ta ’bwa/ ma Yakuub mo. A’di enki nyara/ yan mo dhali wal ’twa/ ka yim ki wala teṯe/ mo.

⁴Wakan Shakiim ṯorki’da ṯor ki com jin ta’da Hamuur mo mmo/o gwo mo ki: Guyaa/ nyara/ yan mo ma mmota a’bom pem mo.

⁵Dhali ka Yakuub ciḵki gwo mo ki a’di shi/ki ’bwa/m piti ka Diinah is mo tani, hili iya/ ’koyina mo mmohil to/em piti e bwaasho/ mo. Wakana Yakuub bu’thki moŋḵu’th is piti mo ntagi uni p̱u’dkin mo be.

⁶Dhala Hamuur jin ta’da baba ma Shakiim mo tani a’di yaki’d ka pije/ mo mmoṯora ṯor ka Yakuub mo.

⁷Dhali iya/ ma Yakuub p̱u’dkin mo ’peni bwaasho mo ki uni ciḵki gwo yan mo dhali ’kwani gwan shwan ma anyor eya du mo dhali miiya anyor kagahara mo haali/ a’di wakaski tonthus yan jin ta p̱us e ’Kwani ma Israyiil mo mmo/ishi ’bwa/ ma Yakuub mo haali/ tonthus gi wakan ḵa ba/ iminu ’koki mii mii mo be.

⁸Hila Hamuur ṯorki’da ṯor ki uni mo dhali o gwo mo ki: Aḵashira/ gi ya/m pem ka Shakiim a’di ’thoṯẖa bwa gom ’bwa/m bum mo, aha/ ’thona um mo, mmoc̱iya yim ki a’di mo mmomash mo.

⁹Thosoni gwo gi miimash nyaḵki aman mo, c̱iyu/ i’bwa/m bum ki aman mo dhali buthi i’bwa/m bam gom is bum si’da/ mo.

¹⁰Um mini nyaḵ ’ko ki aman mo dhali mony’cesh midi di ki ḵany gom um mo. ’Koyi mo dhali miiya ṯu’c e a’di mo dhali gami mal e a’di mo.

¹¹Shakiim si’da/ oki gwo eya baba ma yim mo dhali e ikam ma yim mo ki: Dhalki aha/ gama mii ma ’the e jis/em bum mo dhali aris to gunn kun mina um i o aha/ mo tani aha/ mina c̱i uni mo be.

¹²Doṯi aha/ mo ma, ma to gom miimash jin taka/ ki nyanye/ mo a’di jin ta tontaḵ dhali to kun c̱inu ki me’d mo dhali aha/ mina c̱i uni isi me’d jin ona um aha/ mo, hili c̱iyaa/ nyara/ yan mmota a’bom pem mo.

¹³Dhali iya/ ma Yakuub thoḵkina Shakiim gwo mo dhali com ka Hamuur gwo ka he’k e mo haali/ a’di shi/ki ’bwah buni ka Diinah is mo be.

¹⁴Uni oki uni gwo mo ki: Aman mola to yan mii mo mmoc̱i ’bwah bam ki wathi/ jin ’konuki ’ciṯẖa/ munyjal yis mo haali/ mii yan a’di imidi ta mii jin midi ’the aman is mo be.

¹⁵Hili e mii yan mo tani aman mina gam gwo me’d nyaḵki /e mo ki /e mini mii war mo mmowa ki aman mo dhali aris ’kwaniŋ gwaṯẖ pini minu mii ’ciṯẖa/ munyjal yis mo be.

¹⁶Dhali yan’ko’d aman mina c̱i i’bwa/m bam ki um mo dhali aman si’da/ mina bu’th i’bwa/m bum gom is bam mo dhali aman mina ’ko nyaḵki um mo dhali warki ’kwani en ’de/ mo.

¹⁷Hili waḵki/ /e diki ciḵ gwom bam mo dhali ’ciṯẖa/ munyjal yis mo tani aman mina bu’th ’bwa/m bam mo dhali aman mina ii mo be.

¹⁸Gwom buni ’borki’da Hamuur bwa mo dhala Shakiim jin ta ya/ ma Hamuur mo be.

¹⁹Dhali dhuru’c wathi/ diki ta diiṯe/ mo mmomii to yan mo haali/ a’di ’kunya bwa ki ’kuny kagahara gom ’bwa/ ma Yakuub mo. Dhali a’di si’da/ ita wathi/ jin taḵu kagahara mmobol tiya ’baar mo e e bwaman ma waḵ piti ki montaḵ mo.

²⁰Wakana Hamuur dhali ya/m piti ka Shakiim uni iikin ka pije/ e ’twaŋkala goŋ gi ’peŋkuman bampa/ mo dhali ṯora ṯor ki ’kwani ki ’peŋkuman bampa/ mo dhali o gwo mo ki:

²¹’Kwani gwansan uni ita ikam bana mo. Dhalki uni ’kon mo e bampa/ yan mo dhali miiya ṯu’c ap̱o/ a’di mo haali/ hili mo mo ma, bampa/ beeyabee mo dhali midi ’kosh jwa mo gom uni mo. Dhalki ana butha i’bwa/m buni mo mmomash mo dhali dhalki ana si’da/ c̱ina uni ’bwa/m bana mo.

²²Hili jasi e mii yan ’de/ mo tani a’di imina ’kwani igam gwo me’d mo dhali nyaḵ ’ko ki ana mo dhali war ki ’kwani en ’de/ mo, ki aris ’kwaniŋ gwaṯẖ ’peni bwaman ana mo tani minu ’ciṯẖa/ munyjal yis mo me’d jin ’ciṯẖkunu uniya munyjal yis mo be.

²³Mina to/em buni dhali mal buni dhali aris toŋkal buni ’koki ta kum bana mowa? Dhalki ana gama jasi gwo yan me’d ki uni mo dhali uni mini nyaḵ ’ko ki ana mo be.

²⁴Aris ’kwani kun iikin ka pije/ ’peni ’twaŋkal ma goŋ ’peŋkuman bampam piti mo tani uni ciḵki gwo ma Hamuur mo dhali ya/m piti ka Shakiim mo dhali aris ’kwaniŋ gwaṯẖi ’baar mo tani uni i’ciṯẖkunu amunyjal yis mo, aris uni ’baar mo kun iikin ka pije/ ’peni ’twaŋkal ma goŋ gi ’peŋkuman bampam piti mo.

²⁵Dhali ka cim ’koni kwara mo ki uni ’kon ki jama/ i is mo tani iya/ ma Yakuub su/ mo a’di jin ta’da Shim/uun dhala Lawi uni kun ta ikam ma Diinah mo bu’thki gandala turgam buni mo dhali p̱u’dku/ e ’peŋkuman bampa/ ki e ka wu mo dhali ’kosha ris ’kwaniŋ gwaṯẖ gwan jwa mo ’baar mo be.

²⁶Uni ’koshkina Hamuur dhali ya/m piti ka Shakiim jwa ki gandala turga/ mo dhali susa Diinah ka pije/ ’peni gu’b ma Shakiim mo dhali uni ki ii mo be.

²⁷Dhali iya/ ma Yakuub uni p̱u’dkin e moŋ’kosha ’kosh mo dhali kar ’peŋkuman bampa/ mmota abar ka bar mo haali/ ’bwah buni a’di ishi/kunu is mo be.

²⁸Uni bu’thkina ma’diny ḵa’bal buni mo dhala buhany bip̱ buni mo dhali aris thuluny buni mo dhali aris to gunn kun ’kon e ’peŋkuman bampa/ mo dhali kun ’kon e bwam bunto mo.

²⁹Aris tom buni kun tana uni pa ki pa mo dhali aris ushi uc̱im buni mo dhali aris up̱ buni mo dhali aris to gwan kun ’kon eya ris gu’b mo tani uni bu’thki uni mo dhali war ki tom buni jin dilina uni ’kwani mo.

³⁰Dhali yan’ko’da Yakuub ki owa Shim/uun dhala Lawi gwo mo ki: Um ḵalki mo jin raḵu araḵ isa p̱o/ aha/ mo mmokar aha/ gway pem mmoshi/a shi/ e bwaman ’kwani gi bampa/ yan mo uni kun ta ’Kwani gi Paŋ Kanaan mo dhali ’Kwani gi Pam Pirissi mo. Aha/ tana a/ushala/ mo dhali waḵki/ uni mini tul isi monṯal ’de/ ap̱o/ aha/ mo dhali p̱u’daa/ i is mo tani aha/ minu ’ce’d sho’k mo aha/ dhali nyaḵki kuŋ gu’b pem ’baar mo.

³¹Hili uni oki gwo mo ki: A/miim piti ’boro’da? mmomii ’bwah bam me’da ’bom c̱al mowa?