Text copied!
CopyCompare
Kâte Bible - Ʒare Biri

Ʒare Biri 23

Help us?
Click on verse(s) to share them!
1Eme Bileamzi Balake ʒiŋuc âzâcnewec: “Go ʒira alata 7 banarezemec, ehuc bulimakao 7 â lama 7 jaha râec‐jopazemec.”
2Eme Balake e Bileamzi âzâcnewec sâc ewec. I tarame Balake â Bileam jahe alata ŋerawec ira bulimakao â lama bâzi rikec‐jopapic.
3Iŋuc erâ Bileamzi Balake ʒiŋuc âzâcnewec: “Go qowi bâzigere maŋfuŋko domahaŋ no ipec rape Wofuŋzi fua‐nareocmu mecne. Eme dâŋ i me i naza nowatuc eme gazapemu.” Iŋuc murâ mâreŋ toŋnao fewec.
4Eme Anutuzi Bileam fuacneme eki ʒiŋuc âzâcnewec: “No alata 7 barâ irec fainao bulimakao â lama bâzi rikec‐jopapo.”
5Iŋuc mume Wofuŋzi Bileam dâŋ ʒiŋuc âzâcnewec: “Go Balakerao risierâ dâŋ gazapemu i âzâcnezemec.”
6Eme risierâ honeme Balake e mi Moabi ŋic fekicne jaŋehec bâzi‐ticnere maŋfuŋko jaha domanʒepieŋ i!
7Eme Bileam e jambuŋdâŋ fuŋkerâ kecʒiŋuc muwec: “Moabi ŋicwofuŋ Balake e Aram mâreŋkonec ʒoaŋ wewefunaopec tiki mâreŋkonec ʒiŋuc muhuc hefârecnume warepo: ‘Go nore erâ ware Jakobore ɋâricfâc sâwec‐jopac, erâ Israe ŋic jaŋe musoriŋ‐jopac!’
8Noni ine wemocko Anutuzi mi sâwec‐jopawec, ŋic iŋucne sâwec‐jopapemu, me Anutuzi mi musoriŋ‐jopawec ŋic iŋucne musoriŋ‐jopapemu.
9No tiki botâŋko domahuc honec‐jopakopac, â tikitoŋko ferâ hone manac ejarekopac. Honec‐jopape gâmbuŋ juŋgopieŋ ekac, eha ŋicguru gâcne jaŋehec qaja fuserâ mi juŋgopieŋ.
10Mozi Jakobore ɋâricfâc wosec‐jopaocmu, me Israe ŋic guru dindiŋ jaŋere ʒare manaocmu? Ŋic tiŋne jaŋe hâmoeŋgopieŋ hâmoc iŋucne hâmozo enarekac, â juju dameŋ‐jeŋic taraekac irec sâc nore juju dameŋ wâc tarazejec.”
11Iŋuc mume Balakezi manarâ Bileam ʒiŋuc âzâcnewec: “Go wemo mâsi enarekomec? Go râsifâc‐nane sâwec‐jopacmurâ hefârecgupo, goki ine mi sâsâwec‐jopa jambuŋ‐jopakomec i!”
12Eki ine dâŋ kecʒiŋuc bâtikiecnewec: “Wofuŋzi dâŋ naza mutâc ejec i wemocko moc huckezapo.”
13Iŋuc mume Balakezi ʒiŋuc âzâcnewec: “Go waretec mâreŋ toŋne mocko fenac, eme ira domahuc Israe ŋic ʒeŋgoma mâcne, mai juŋgopieŋ jaŋe sawa honec‐jopacmu. Honec‐joparâ sâwec‐jopa‐narezemec.”
14Iŋuc murâ jowame ruc bapa ŋic jaŋere toma Pisiga tiki toŋnao fowec ira fepic. Fe fisirâ Balakezi alata 7 barâ bulimakao â lama bâzi rikec‐jopawec.
15Ehame Bileamzi Balake ʒiŋuc âzâcnewec: “Go qowi bâzigere maŋfuŋko domahaŋ no ocna ra Wofuŋ bâfuazepec.”
16Eme Wofuŋzi fuacnerâ dâŋ ʒiŋuc muhuc âzâcnewec: “Go Balakerao risierâ dâŋ gazapemu i âzâcnezemec.”
17Eme risierâ honeme Balake e mi Moabi ŋic fekicne jaŋehec bâzi‐ticnere maŋfuŋko jaha domanʒepieŋ i! Eme Balakezi ʒiŋuc muhuc wiocnewec: “Wofuŋzi mo dâŋ moc gazajec?”
18Eme Bileam e ʒuhuckerâ jambuŋdâŋ muwec: “Balake, go faharerâ manac, Ziporore ŋokâ, go norao hazec râec.

19Anutu e ŋic aricne, irec burec moc mi eekac, e ŋicte ɋâric wâc aricne, irec maŋne mi risieocmu. Eki dâŋ moc mume sâcne mi sanaŋkeocmu me? Me mumupaŋ dâŋ mume fârinehec sâcne mi eocmu me?
20Manakic, no jambuŋdâŋ mupemurâ mutara‐narekicne. Eki jambuŋ‐jopawecte no sâcne mi sâwec‐jopapemu.
21Jakobore ɋâricfâc jaŋerao wiac hâhâwicne moc mi fome honekopac, erâ Israe ŋic jaŋere ŋondeŋko ʒârâ ʒâpâ wâc mi fokac. Wofuŋ Anutu‐jeŋiczi jaŋehec juekac, ehame ŋicwofuŋ iŋucne ofac hecneeŋgopieŋ.
22Anutuzi Aigita mâreŋkonec jowac‐jopame wefumbiŋ, irec ere manapie tâpiri sâkohec eekac.
23Jakobore ɋâricfâc jaŋerao qaŋgec qapene fâri tâmiric eocmu, â Israe ŋic sâwec‐jopapene fârimâc jaha eocmu. Dameŋ ʒiŋuczia hâcne Jakobo â Israe ŋic jaŋere ʒiŋuc mueŋgopieŋ: ‘Anutuzi jaŋerao mâsi sâko bawec i!’
24Opoŋ, jaŋe ŋicsaric! Laioŋ ŋokacne iŋucne fahareeŋgopieŋ, â iaioŋ ŋicne iŋucne tarahuc he raeŋgopieŋ. Jaŋe qowi qarâ mi nâfârehuc ine mi waha foniŋmu, â qowi qakicne irec soc mi nâhuc wâc mi fomananiŋmu.”
25Eme Balakezi Bileam ʒiŋuc âzâcnewec: “Go sâwec‐jopazore manatec quŋkeme ine jajambuŋ‐jopa i wâc mi ezemec.”
26Iŋuc mume Bileamzi dâŋ kecʒiŋuc bâtikiecnewec: “No ʒiŋuc gazapac i! ‘Wofuŋzi dâŋ nazaocmu i sawa mupemu.’”
27Bileam e iŋuc mume Balakezi ʒiŋuc âzâcnewec: “Go waretec hae mâreŋ mocko jowacgu rapemu. Eme Wofuŋzi ira mecne maname sâckeha nore erâ sâwec‐jopazemec.”
28Balake e iŋuc murâ Bileam Peoro tikio jowame fepic. Ira hâcne domahuc mâreŋ burocne hone‐fârepic.
29Ehuc Bileamzi Balake ʒiŋuc âzâcnewec: “Go ʒira alata 7 banarezemec, ehuc bulimakao 7 â lama 7 jaha bâfuac‐jopa‐narezemec.”
30Eme Balake e Bileamzi âzâcnewec irec sâc ehuc alata ŋerawec ira bulimakao â lama bâzi rikec‐jopawec.