1Huajca Balaam quiilhui Tanahuatijquet Balac: ―Techchihuili nica chicome taixpame, huan techcualtalili chicome becerros huan chicome borregojme.
2Huan Tanahuatijquet Balac quichijqui senquisa quej Balaam quinahuatijtoya. Huan ipan sesen taixpamit quitencahuilijque se becerro huan se borrego.
3Huan teipa nopa tachixquet Balaam quiilhui Balac: ―Ximocahua nica ica motacajcahualis tatatili huan na niyas nepa para niquitas sinta TOTECO technamiquiqui. Teipa nimitzilhuis cati ya techilhuis para ma nimitzilhui. Huajca Balaam yajqui ipan se piltepetzi cati amo teno quipiya,
4huan Toteco hualajqui quinamiquico huan quiilhui: ―Na nijcualtalijtoc chicome taixpamit huan ipan sesen taixpamit nimitztencahuilijtoc se becerro huan se borrego.
5Huajca TOTECO quimacac Balaam nopa camanali cati quinequiyaya ma quiijto, huan quiilhui: ―Xitacuepili campa itztoc Tanahuatijquet Balac huan xiquijto nochi senquisa quej nimitzilhuijtoc.
6Huan Balaam mocuetqui huan quipantico Tanahuatijquet Balac ijcatoc nechca nopa tacajcahualisti cati quitatijtoya. Huan ihuaya itztoyaj nochi nopa tayacanani ten nopa tali Moab.
7Huajca Balaam quiijto ni camanali: “Techchijtoc ma nihuala nica nopa hueyi Tanahuatijquet Balac ipan ni tali Moab. Huan nihualajtoc ten nopa tepeme ipan tali Aram ica campa quisa tonati. ‘Xihuala’, yaya techilhui, ‘xiquintelchihuaqui ni israelitame. Xijcahua mocualancayo ma tejco ica inijuanti para ma ininpanti cati fiero.’
8Pero amo hueli niquintelchihuas sinta Toteco amo quintelchijtoc. Amo hueli niquincualancaitas cati TOTECO amo quincualancaita.
9Niquinita ten nica itzonco ni hueyi tepet. Nojquiya niquintachilía piltepetzitzi. Niquinita para moiyocatalijtoque ten sequinoc. Inijuanti seyoc tamanti masehualme. Amo quej sequinoc taltipac ehuani.
10Tahuel miyaqui inijuanti hasta itztoque quej taltepocti. Amo aqui hueli quinpohua. Yon se amo hueli quimatis quesqui itztoque. Nipaquisquía sinta nimiquisquía xitahuac iixpa TOTECO quej inijuanti. Ma nimiqui ica nopa tatiochihualisti cati se israelita quipiya.”
11Huajca nopa Tanahuatijquet Balac quiilhui Balaam: ―¿Taya tijchijtoc? Na nimitzhualicac para xiquintelchihua nocualancaitacahua, huan ta tiquintiochijtoc.
12Huan Balaam quinanquili: ―Monequi san niquijtos cati TOTECO techilhuis.
13Huajca Tanahuatijquet Balac quiilhui Balaam: ―Xihuala nohuaya huan ma tiyaca sejcoyoc. Huan ten nopona hueli tiquitas san se achi ten nochi nopa miyaqui israelitame. Ten nopona huelis tiquintelchihuas san se achi ten inijuanti.
14Huajca Tanahuatijquet Balac quihuicac Balaam ipan se mili campa itoca Zofim itzonco nopa tepet Pisga, huan nopona quichijqui chicome taixpamit huan quitencajqui se becerro huan se borrego ipan sesen taixpamit.
15Huajca nopona Balaam quiilhui Tanahuatijquet Balac: ―Ximocahua nica nechca motacajcahualis tatatili huan na niquitati Toteco Dios nopona.
16Huan TOTECO quinamiquico Balaam huan quimacac nopa camanali cati quinequiyaya ma quiijto. Huan nojquiya quiilhui: ―Xitacuepili campa itztoc Tanahuatijquet Balac huan xiquilhui cati na nimitzilhuijtoc.
17Huan Balaam tacuepili huan quiitac Balac ijcatoc nechca nopa tacajcahualisti tatatili, huan ihuaya itztoyaj nopa tayacanani ten tali Moab. Huan Tanahuatijquet Balac quitatzintoquili: ―¿Taya mitzilhuijtoc DIOS?
18Huajca Balaam sempa pejqui camanalti huan quiijto ni camanali: “¡Tanahuatijquet Balac, ta cati tiicone Zipor, cuali techtacaquili!
19Toteco amo itztoc quej titacame. Yaya amo istacati. Yon amo moyolpata quej se tacat. Cati yaya quiijtohua para oncas, ya nopa oncas. Cati yaya quitencahua, ya nopa quichihua.
20Technahuatijtoc ma niquintiochihua ni masehualme. Huan pampa yaya ya quintiochijtoc, amo hueli na niquijtos para amo.
21TOTECO amo quipantía tajtacoli ipan ni israelitame. Inijuanti cati iteipan ixhuihua Jacob. Amo hualas tequipacholi ipan inijuanti pampa TOTECO cati inintata quihueyichijqui itztoc inihuaya. Yeca inijuanti tzajtzij ica paquilisti, pampa tahuel hueyi inintanahuatijca cati inihuaya yahui.
22Quej se hueyi toro quipiya icuacua, ni masehualme quipiyaj TOTECO quej ininchicahualis, yaya cati quinquixti ipan tali Egipto.
23Amo aqui hueli quintelchihuas ni iteipan ixhuihua Jacob. Ni israelitame amo teno huelis quinchihuilis se tenahualhuijquet. Nochi quiijtohuaj: ‘Toteco Dios quinchihuilijtoc huejhueyi tamanti.’
24Ni masehualme motananaj huan temajmatíaj, quej se tecuani cati amo mosiyajquetza, hasta quicuas cati moitzquilijtoc, huan quiis ieso cati momictilijtoc.”
25Huajca Tanahuatijquet Balac quiilhui Balaam: ―Masque amo hueli tiquintelchihuas, amo xiquintiochihua.
26Pero Balaam quinanquili: ―¿Amo nimitzilhui para na san niquijtos cati TOTECO techilhui?
27Huajca Tanahuatijquet Balac quiilhui: ―Techchihuili se favor, xihuala nohuaya huan nimitzhuicas sejcoyoc. Huelis ten nopona Toteco mitzcahuilis xiquintelchihua.
28Huan Balac quihuicac Balaam hasta itzonco nopa hueyi tepet Peor campa nesiyaya nochi nopa huactoc tali cati eltoya tatzinta.
29Huan nopona Balaam quiilhui Tanahuatijquet Balac: ―Techchihuili nica chicome taixpamit, huan xiquinsencahua chicome becerros huan chicome borregojme quej tacajcahualisti.
30Huajca Tanahuatijquet Balac quichijqui nochi senquisa quej quinahuati Balaam Huan ipan sesen nopa taixpamit quitencajqui se becerro huan se borrego.