A Niluluk 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Una pait kaugu ta lavurua na uguugu na vartabar, ma una vaninare lavurua na bulumakau ma lavurua na sip, a umana tomotoina.

²Ma Balak i ga pait ia da Balam i ga vatang ia; ma Balak ma Balam dir ga tul tar tika na bulumakau ma tika na sip ta ra umana uguugu na vartabar tikatikai.

³Ma Balam i ga biti tai Balak: Una tur ati pire ra tinabar di tun tar ia, ma ina vana; kan ra Luluai na barat iau; ma nam ba na vaarike piragu ina ve u tana. Ma i ga vana ta ra ul a luana ba pa ta davai tana.

⁴Ma God i ga barat Balam; ma i ga biti tana: Iau ga vaninare lavurua na uguugu na vartabar, ma iau ga tul tar tika na bulumakau ma tika na sip ta ra umana uguugu na vartabar tikatikai.

⁵Ma ra Luluai i ga vung ra tinata ta ra ngie i Balam, ma i ga biti: Una lilikun tadav Balak, ma una tata dari.

⁶Ma i ga lilikun pirana, ma io, i ga tur pire kana tinabar di tun tar ia, diat ma ra umana luluai Moab.

⁷Ma i ga tur pa kana varvai ma i ga biti: Balak i ga ting pa iau maro Aram, A king Moab maro ra lualuana ta ra papar a taur: Una mai, una tata vakaina Iakob, Ma una vana uti, una tata na kankan ure Israel.

⁸Ina tata vakaina davatane nina God pa i tata vakaina? Ma ina kankanuane davatane nina ra Luluai pa i kankanuane?

⁹Tago ba iau ki ra ul a vat, iau gire, Ma ta ra ul a lualuana, iau bobe; Gire, a tarai nina dia ki varkolono, Ma pa di luk tar diat ta ra umana enana vuna tarai:

¹⁰To ia na luk valar pa ra tobon tai Iakob, Ba na luk puput pa ra vaivat na pakana tai Israel? Boina ba ina mat da ra minat kai ra tena takodo, Ma ra mutuai kaugu nilaun na da kana!

¹¹Ma Balak i ga biti tai Balam: Ava go u tar pait ia piragu? Iau ga ting pa u upi una tata vakaina kaugu lavur ebar, ma ea, u tar tia tata vadoane ke diat.

¹²Ma i ga bali ia dari: Dave, pa ina nuk pa ia upi ina vatang ika nam ba ra Luluai na vung ia ta ra ngiegu?

¹³Ma Balak i ga biti tana: Iau lul u, ba dor a varagur uro ta ra enana pakana, upi una gire diat mabara; una gire pa ka ta ngungu ta diat, pa una gire diat par; ma una tata vakaina diat mabara.

¹⁴Ma i ga agure ta ra pakana pia Sopim, ta ra ul a luana Pisga, ma i ga pait lavurua na uguugu na vartabar, ma i ga tul tar tika na bulumakau ma tika na sip ta ra umana uguugu na vartabar tikatikai.

¹⁵Ma i ga biti tai Balak: Una tur ati pire ra tinabar di tun tar ia, ba iau barat ra Luluai abara.

¹⁶Ma ra Luluai i ga barat Balam ma i ga vung ra tinata ta ra ngiene, ma i ga biti tana: Una lilikun tadav Balak, ma una tata dari.

¹⁷Ma i ga tadav ia, ma io, i ga tur pire kana tinabar di tun tar ia, diat ma ra umana luluai Moab. Ma Balak i ga biti tana: A Luluai i tar tatike ra ava?

¹⁸Ma i ga tur pa kana varvai, ma i ga biti: Una tut, Balak, ma una valongore; Una vatorome iau, u natu i Sipor;

¹⁹God vakir ia ra tutana, upi na vaongo; Ma vakir ia ra natu i ra tutana, upi na nukpuku; Dave, i ga vatang ta magit, ma pa na pait ia? Ba i ga tatike ta magit, ma pa na pait ot pa ia?

²⁰Gire, di ga vartuluai piragu, upi ina tata vadoane; Ina tata vadoane, ma i dekdek upi ina pukue.

²¹Pa i ga na tadav ta kaina tai Iakob, Ma pa i ga gire ta magit i bilak tai Israel; A Luluai kana God i ki pirana, Ma ra nioro ure ra king i tur livuan pire diat.

²²God i ben vaarike diat maro Aigipto; A dekdekina i da ra kuabar na bulumakau.

²³A dovotina i dekdek upi da papait ure Iakob. Ma i dekdek upi da ong Israel; Ma go da tatike ure Iakob ma ure Israel; God i tar pait ia muka damana!

²⁴Gire ra tarai dia tut rikai da ra leon, a tana, Ma i vatut pa ia iat mulai da ra leon; Pa na va mulai tuk i tar ian ta ra magit i tar ubu pa ia, Ma i tar mome ra gapu i ra magit i tar vavirua.

²⁵Ma Balak i ga biti tai Balam: Koko muka una tata vakaina diat, ma koko muka una tata vadoane diat.

²⁶Ma Balam i ga bali Balak dari; Dave, pa iau ga ve u ba ina pait ika nam ba ra Luluai na tatike?

²⁷Ma Balak i ga biti tai Balam: Una mai, ina agure u tar ta ra enana pakana kabila; ma kan God na mulaot ba una tata vakaina diat mabara.

²⁸Ma Balak i ga agure Balam urama ta ra ul a luana Peor, nina i gigira taun ra bil.

²⁹Ma Balam i ga biti tai Balak: Una pait kaugu ta lavurua na uguugu na vartabar ati, ma una vaninare lavurua na bulumakau, ma lavurua na sip, a umana tomotoina.

³⁰Ma Balak i ga pait ia da Balam i ga vatang ia, ma i ga tul tar tika na bulumakau ma tika na sip ta ra umana uguugu na vartabar tikatikai.