1Wofuŋzi Mose dâŋ kecʒiŋuc âzâcnewec:
2“Go Israe ŋic jaŋere erâ Midiaŋ ŋic okacne bazu‐jarehuc mamacfâcge qâtec‐joparâ hâmozemec.”
3Iŋuc âzâcneme Mosezi ŋic ŋokac ʒiŋuc jazawec: “Ŋoŋe ŋondeŋ‐ŋeŋickonec ŋic baʒawiec‐jopapie ʒikao ranʒepieŋ, ehuc Wofuŋte ʒâŋeo Midiaŋ ŋic okacne bazu‐jarenʒepieŋ.
4Israe ŋic guru sâc irecnec ŋic wâŋ tauseŋ iŋuc rocjopapie ʒikao ranʒepieŋ.”
5Eme jaŋe iŋuc ehuc Israe ŋic guru sâc irecnec wâŋ tauseŋ wâŋ tauseŋ rocjopakupie ʒikao rarare biŋe ŋic 12 tauseŋ embiŋ.
6Eme Mose e ŋic i jaŋe hâcne ʒikao sorec‐jopame rambiŋ, ehame taha bapa Eleaʒare ŋokâ Pinehasi eki furuficte râqâc wiac â qeŋ rome mâmâc rambiŋ.
7Erâ Wofuŋzi Mose mutâcnecnewec irec sâc Midiaŋ ŋic joparâ jopa miziembiŋ.
8Ehuc Midiaŋ ŋicwofuŋ 5 kecʒiŋuc jaŋe mâmâc jopambiŋ: Ewi, Rekem, Zuru, Huru â Reba. Erâ Beoro ŋokâ‐ticne Bileam e wâc qâhâmombiŋ.
9Israe ŋic jaŋe Midiaŋ ŋokac â naru motecfâc‐jeŋic kâpâcwâru bacjopambiŋ, ehuc lama bulimakaofâc‐jeŋic â mafa wiac‐jeŋic sasawa mateŋ‐jeŋic eocte rofârembiŋ.
10Ehuc fic hae ŋerawec â teuŋ âterâ ŋeŋe juju embiŋ i rikepie ʒafârewec.
11Eme mafa mateŋ mecne, ŋic mecne â lama bulimakao i mâmâc rocjopambiŋ.
12Rocjoparâ Mose â taha bapa Eleaʒa erâ Israe kikefuŋ Moabi wâneŋko Jordaŋ opâ heririŋnao Jeriko hae ŋewec ira ŋec juc embiŋ jaŋerao bacjopa rambiŋ.
13Eme Mose â taha bapa Eleaʒa erâ kikefuŋte micnefâc sasawa jaŋe teuŋ râpenao bâfuac‐jopaniŋte hurâ rambiŋ.
14Mose e ine momori ŋic micnefâc‐jeŋic, tauseŋ guru â 100 guru jaŋere micnefâc hâcne ʒikaonec risiembiŋ jaŋere boc aaricke sâqorewec.
15Ehame ʒiŋuc jazawec: “Ŋoŋe ŋokac sasawa akic‐jopambiŋ me?
16Manaŋgopieŋ, ŋokac jaŋe hâcne Bileamte dâŋ reŋkehuc Israe ŋic eatuc‐jopapie Peoro nemurao qohotahuc Wofuŋ râpeckembiŋte kikefuŋ ŋondeŋko huc mimicne fuawec.
17Irec ŋoŋe motecfâc‐jeŋic â ŋokac ŋichec jukicne sasawa jaŋe qâhâmoc‐jopanʒepieŋ.
18Ŋokac naru mesawane jaŋe ine akic‐jopapie ŋaŋacne biŋe junʒepieŋ.
19Ŋoŋe teuŋ râpenao juhapie ʒoaŋ gie bapa 7 tarazejec. Ehame ŋic qâhâmoc‐jopambiŋ ŋoŋe mecne, me ʒikao hâmokicne ba bâuac ejarembiŋ ŋoŋe mâmâc ʒoaŋ gie bapa 3 â 7 ira ŋaŋacne â kâpâcwâru ŋicfâc‐ŋeŋic jaŋere sahac ʒure ɋaɋackenʒepieŋ.
20Ehuc ŋaqi wiac‐ŋeŋic sasawa â wiac qowi sahaczi me noniŋ kanʒaŋnezi bakicne sasawa erâ wiac jâczi bakicne sasawa i ʒurepie ɋaɋacke‐fârezejec.”
21Eme taha bapa Eleaʒa e momori ŋic ʒikaonec risiembiŋ jaŋe ʒiŋuc jazawec: “Wofuŋzi Mose sâcmutâc dâŋte dâŋsanaŋ âzâcne mutâc ewec i kecʒiŋuc:
22Ŋoŋe gol, siliwa, aeŋ bâbâroŋ, aeŋ, wapa, led,
23erâ wiac sanaŋne sasawa ʒocko rikepie mi ʒâtâcneekac i hâcne ʒocko râepie ʒame ɋaɋackezejec. Ehame sâqocne tâtâmire opâzi wâc ʒurenʒepieŋ; erâ wiac gâcne sasawa ʒocko ririkenere sâc mi eekac i opâzi ʒure‐fârenʒepieŋ.
24Ʒoaŋ gie bapa 7 ira hâcne ŋaqi wiac‐ŋeŋic ʒurerâ ɋaɋackenʒepieŋ; iŋuc efârerâ teuŋko wefunʒepieŋ.”
25Wofuŋzi Mose kecʒiŋuc âzâcnewec:
26“Go â taha bapa Eleaʒa erâ garikiŋne garikiŋne irec micnefâc ŋoŋe mafa mateŋ wiac ŋic me qowi i wosec‐jopafârenʒepieŋ.
27Ehuc kâdoc qapie guru jajahec eme guru moc i momori ŋic ʒikao rambiŋ jaŋere biŋe eha guru moc ine kikefuŋ jaŋere biŋe ezejec.
28Ehame momori ŋic wiac jarekicne irecnec Wofuŋte biŋe kecʒiŋuc râenʒepieŋ: Ŋic me bulimakao me doŋgi me noniŋ â lama 500 gurune gurune juraŋgopieŋ irecnec moc moc rocjopanʒepieŋ.
29Rocjoparâ taha bapa Eleaʒa râcnepie eki Wofuŋte biŋe qazejec.
30Erâ Israe kikefuŋ mafa mateŋ jarekicne irecnec ine wiac kecʒiŋuc ronʒepieŋ: Ŋic me bulimakao me doŋgi me noniŋ â lama 50 gurune gurune juraŋgopieŋ irecnec moc moc rocjopanʒepieŋ. Rocjoparâ Lewiŋic Wofuŋte tiri boze hone soŋaŋ eeŋgopieŋ jaŋe jarenʒepieŋ.”
31Eme Mose â Eleaʒa jahe Wofuŋzi Mose âzâcne mutâc ewec irec sâc efârepic.
32Eme momori ŋic jaŋe mafa mateŋ wiac rombiŋ irec nâfocne kecʒiŋuc bafisimbiŋ: Lama 675 tauseŋ,
33bulimakao 72 tauseŋ,
34doŋgi 61 tauseŋ,
35â naru ŋokac mesawane ine 32 tauseŋ.
36Eme kâdoc qapie tucne kecʒiŋuc i momori ŋic ʒikao rambiŋ jaŋere biŋe ewec: Lama 337 tauseŋ 500.
37Irecnec ine Wofuŋte biŋe 675 bâwosâec‐jopambiŋ.
38Bulimakao 36 tauseŋ. Eme irecnec Wofuŋte biŋe qambiŋ ine 72.
39Doŋgi 30 tauseŋ 500 jarekicne, eme irecnec 61 Wofuŋte biŋe râec‐jopambiŋ.
40Naru ŋokac mesawane 16 tauseŋ, eme jaŋeraonec Wofuŋte biŋe 32 bâwosâec‐jopambiŋ.
41Ehame Mose e Wofuŋzi âzâcne mutâc ewec irec sâc ehuc wiac Wofuŋte biŋe qakicne sasawa i taha bapa Eleaʒa râcne‐fârewec.
42Mafa mateŋ wiac bafisimbiŋ i Mosezi bâfâuckeme momori ŋic jaŋere guru moc ewec â Israe ŋic ŋokac sâko jaŋere moc ewec.
43Kikefuŋ jaŋere biŋezi ine kecʒiŋuc fuawec: Lama 337 tauseŋ 500.
44bulimakao 36 tauseŋ,
45doŋgi 30 tauseŋ 500,
46â naru ŋokac ine 16 tauseŋ.
47Eme Mose e Israe ŋic jaŋere biŋe kâdoc qakicne irec ŋic me qowi 50 gurune gurune jurambiŋ irecnec moc moc rocjoparâ Lewiŋic Wofuŋte tiri boze hone soŋaŋ ejumbieŋ jaŋe jarewec. Wofuŋzi mutâcnecnewec irec sâc ewec hâcne.
48Eme momori ŋic tauseŋne tauseŋne jaŋere micnefâc, tauseŋ gurune gurune â 100 gurune gurune jaŋere micnefâc hâcne, jaŋe Moserao fuarâ
49ʒiŋuc âzâcnembiŋ: “Kiŋaŋŋicfâcge nâŋe momori ŋic wahakicnefâc‐nâŋec wosec‐jopapene furu jaha jufâreŋgopieŋ.
50Nâŋe Wofuŋte biŋe tahare wiac i kecʒiŋuc bâfuarâ Wofuŋte maio kiwiric‐nâŋec ronaŋte bafisimbeneŋ: Wiac gâcne golzi bakicne, erâ maŋguc â qoqonaŋ wiac, meo fefe maqâreŋhec, hazec sarasa â kubu wiac.”
51Eme Mose â taha bapa Eleaʒa jahe jaŋere meonec eri wiac golzi bakicne i ropic.
52Tauseŋ gurune gurune â 100 gurune gurune micnefâc‐jeŋic jaŋe Wofuŋ taha bacneniŋte gol bafisimbiŋ irec ŋemâc i 16 tauseŋ 750 ewec.
53(Momori ŋic omane jaŋe ine mafa mateŋ wiac jaŋe jaŋacne biŋe sawa rombiŋ.)
54Eme Mose â taha bapa Eleaʒa jahe tauseŋ gurune gurune â 100 gurune gurune micnefâc‐jeŋic jaŋere meonec gol i rorâ tutumaŋ qoruc bozeo bafepic. I Wofuŋzi Israe ŋic jaŋere manasuhuc juocte iŋuc epic.
