1Kanaaŋ ŋicwofuŋ Arada e Negebe mâreŋko juweczi, Israe ŋic jaŋe Atarim haeo warehuc juŋgopieŋ, biŋe iŋuc manarâ fahare jopahuc gâcne kâpâcwâru bacjopawec.
2Iŋuc fuame Israe ŋic jaŋe Wofuŋtao dâŋ ʒiŋuc mupaŋkembiŋ: “Go ŋic ʒi jaŋe menâŋecko râec‐jopatec nâŋe fic hae wiac‐jeŋic i hetâc qâtâtienʒepeneŋ.”
3Eme Wofuŋ e Israe ŋic dâŋjeŋic manarâ Kanaaŋ ŋic mejeŋicko râec‐jopawec. Eme Israe ŋic jaŋe ŋic mecne â fic hae wiac‐jeŋic mecne i bâsirowec‐jopa‐fârembiŋ. Iŋuc epie hae mâreŋ irec ʒâŋe Horima mumbiŋ.
4Eme Israe ŋic jaŋe Hora tiki beherâ Edom mâreŋ getâckeniŋte Hâwec Bâbâroŋkopec rambiŋ, rahuc juku aaric‐jopawec.
5Irec Wofuŋ â Mose dâŋ mujactehuc kecʒiŋuc mumbiŋ: “Ŋohe wemocte mâreŋ burocnao hâmonaŋte Aigita mâreŋkonec jowac‐nâpo warepic? Ʒira nânâ opâ mi fokac, â nânâ nâeŋgopeneŋ kecirec mamakâc‐nâpoekac.”
6Iŋuc mupie Wofuŋzi mume homa bâbâroŋ ŋic ŋondeŋko fisirâ Israe ŋic kicjopapie bocjahazi hâmombiŋ.
7Ehame ŋic jaŋe Moserao fisirâ ʒiŋuc âzâcnembiŋ: “Nâŋe Wofuŋhec ŋohe dâŋ muŋactehuc bahac bâfuambeŋ, irec go Wofuŋ numucnetec mume homa arictac ezejec.” Iŋuc mupie Mosezi jaŋere erâ numuwec.
8Eme Wofuŋzi Mose ʒiŋuc âzâcnewec: “Go aeŋ bâbâroŋzi homa qâqâtâc moc barâ jâmâ wâtuŋko qahasickec, eme homazi ŋic kicjopame homa qâqâtâc i hone dendeŋnerâ juniŋmu.”
9Iŋuc âzâcneme Mose e aeŋ bâbâroŋzi homa qâqâtâc barâ jâmâ wâtuŋko qahasickewec. Eme homazi ŋic kicjopame homa qâqâtâc hone dendeŋnembiŋ jaŋe biaŋkerâ jumbiŋ.
10Eme Israe ŋic jaŋe hata ʒuhuckerâ raku Oboti haeo teuŋ âterâ fombiŋ.
11Erâ Oboti haeonec raku Ije‐Abarim hae mâreŋko teuŋ âterâ fombiŋ. Hae mâreŋ i Moabi mâreŋ ŋifecnao ʒoaŋ wewefunaopec ira fowec.
12Eme irecnec raku Ʒerede wâneŋko teuŋ âterâ fombiŋ.
13Erâ irecnec raku Aronoŋ opâ ocniŋucnao fisirâ mâreŋ burocnao teuŋ âterâ fombiŋ. Mâreŋ burocne izi ine raku Amori ŋic jaŋere mâreŋko mickekac. Aronoŋ opâzi ine Moabi â Amori ŋic jaŋere ŋondeŋko fohuc Moabi mâreŋte ma ekac.
14Irec hâcne Wofuŋte ʒika papiao dâŋ kecʒiŋuc mukicne: “Wahebe opâ ʒâŋe i Sufa mâreŋko fokac, erâ wâc Aronoŋ opâre wâneŋ.
15Â wâneŋ irec tiki ŋifec â ŋifec ŋeraku Ari hae mâreŋko tarakac, ehuc Moabi mâreŋ mao siŋkekac.”
16Eme ŋic jaŋe irecnec raku Bere opâ nombâŋko fisimbiŋ. Opâ nombâŋ irec Wofuŋzi Mose kecʒiŋuc âzâcnewec: “Go ŋic ŋokac hetumaŋ‐jopatec opâ gumec‐jopapemu.”
17Eme Israe ŋic jaŋe dameŋ ira gae kecʒiŋuc hembiŋ: “Opâ, go siwiŋnerâ nombâŋkonec wefuhaŋ gae ʒiŋuc hegareniŋ:
18Ŋicwofuŋ jaŋe opâ nombâŋ i rombiŋ, ŋic fekicne jaŋe gunu â ɋaruc‐jeŋiczi nombâŋ i qaandaŋkembiŋ.” Eme jaŋe mâreŋ burocne i beherâ raku Matana hae mâreŋko fisimbiŋ.
19Erâ irecnec raku Nahalie hae mâreŋko fisimbiŋ; erâ irecnec raku Bamoti hae mâreŋko fisimbiŋ.
20Bamotionec fahare raku ine Moabi hae mâreŋko Pisiga tikitoŋko fisimbiŋ. Tikitoŋne i mâreŋ burocnao domahuc tâtâc ŋeme hone jumbieŋ.
21Eme Israe ŋic jaŋe Amori ŋicwofuŋ Sihoŋ erao kiŋaŋŋic ʒiŋuc muhuc sorec‐jopambiŋ:
22“Mana‐nârehaŋ mâreŋ‐ŋeŋic fotâcnenaŋte muŋgopeneŋ. Nâŋe hata qâsorierâ giegaŋko me waiŋ gieo mi raʒinaŋmu, erâ opâ nombâŋ‐ŋeŋickonec opâ wâc mi nânâ mâc hata sâkooa rahuc mâreŋ‐ŋeŋic fotâcnenaŋmu.”
23Sihoŋ eki ine Israe ŋic jaŋe mâreŋ‐ticne fotâcnezo mupie qatara‐jarewec. Ehuc momorifâc‐ticne hetumaŋ‐jopame Israe ŋic mâreŋ burocnao râsi ejare raku Jahazi haeo fisirâ Israe ŋic jopazo embiŋ.
24Israe ŋic jaŋe ine sanaŋkerâ jopa jâpec ejarehuc mâreŋ‐jeŋic Aronoŋ opâo fuŋkerâ raku Jaboko opâo â Amoŋŋic jaŋere mâreŋko mickekac i ro rauc efârembiŋ. Jazere haezi ine Amoŋŋic jaŋere mâreŋte masanaŋ ewec.
25Israe ŋic jaŋe Amori ŋic jaŋere hae sâko â hae piticfâc‐ticne i ro rauc efârerâ ira ŋeŋe juju embiŋ.
26Hesiboŋ i Amori ŋicwofuŋ Sihoŋ ere hae qizec hâcne. Sihoŋ eki mârâc jaha Moabi ŋicwofuŋ qa jâpec ecnehuc mâreŋ‐ticne ro rakume Aronoŋ opâo tarawec.
27Irec hâcne mu âke sisic gae ʒiŋuc hembiŋ: “Ŋoŋe Hesiboŋ haeo fisiniŋ, ehuc Sihoŋte hae heɋârerâ bapie honeniŋ.
28Ʒoczi Hesiboŋ hae, Sihoŋte hae qizeckonec hâcne bâruŋkerâ ʒarawec. Ehuc Moabi hae Ari i ʒâseŋkewec, â Aronoŋ opâre jâckâte i mâmâc ʒâtâmirewec.
29Jei, Moabi! Kemosi nemure qâjâpecfâc ŋoŋere dameŋ i tarakac hâcne. Moabi ŋokâfâc‐ticne jopa jâpec ejarembiŋ, â otâfâc‐ticne jaŋe kâpâcwâru bacjoparâ Amori ŋicwofuŋ erao bacjopa rambiŋ.
30Hesiboŋ haeo fuŋkerâ jopa qâhâmoc ejae raku Diboŋ haeo fisimbiŋ, ehuc ima samaki bapene foha ʒoczi ʒaraku Medeba haeo fisiwec.”
31Israe ŋic jaŋe iŋuc ehuc Amori ŋic jaŋere mâreŋko ŋeŋe juju embiŋ.
32Ehame Mosezi Jazere hae hone tâcneniŋte ŋic gâcne sorec‐jopame rambiŋ. Eme jaŋe hae i erâ hae piticfâc‐ticne ro rauc ehuc Amori haeo ŋic jumbiŋ jaŋe jâpec‐jopambiŋ.
33Jaŋe iŋuc ehuc risierâ Basaŋ haeopec rambiŋ. Ehame Basaŋ ŋicwofuŋ Ogo e â ŋicfâc‐ticne jaŋe Israe ŋic jaŋehec Ederei haeo qaqac eniŋte wahambiŋ.
34Wofuŋzi ine Mose kecʒiŋuc âzâcnewec: “Go jaŋere mi hâwicguoc, no ŋiwofuŋ â ŋicfâc‐ticne erâ mâreŋ‐ticne i gore meo râec‐jopa‐fârepo; irec Amori ŋicwofuŋ Sihoŋ Hesiboŋ haeo juhame wiac ecnemeŋ sâc ijaha Ogo ecnezemec.”
35Iŋuc mume jaŋe Ogo jahacne â ŋokâfâcne erâ ŋicfâc‐ticne sasawa jopaku jopa mizie‐fârepie nâfocne moc mi jumbiŋ; ehame mâreŋ‐jeŋic rauckembiŋ.
